اے۔آئی ءِ دور ءُ رجانک ءِ باندات

 

رجانک ءِ میان اُستمانی روچ

اے۔آئی ءِ دور ءُ رجانک ءِ باندات!

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

زانت ءُ زانگ ءِ زِر ءَ رجانک چو ھما بوجیگ ءَ انت کہ دنیا ءِ یک کُنڈے ءَ تا دومی کُنڈ ءَ ھمے بوجیگ ءِ وسیلگ ءَ ساچ اِتگیں لبزانک، در کسّھی لبزانک یا زند ءِ ایندگہ تکاں گوں ھمگرنچیں زانشت چوکہ سائنس، راجدپتر، راجکاری ءُ راجمانی زانت ءَ دنیا ءِ کُنڈ کنڈ ءَ سپر کتگ۔

اگاں ارسطو مئے زانتگیں زباناں رجانک مہ بوتیں ما نگد ءِ بنداتی لوٹ ءُگزراں چہ آشنا نہ بوتگ اتیں۔ اگاں عربانی کتاب انگریزی ءَ رجانک مہ بوتین انت دنیا زانت ءِ مزنیں بھرے ءَ چہ زبھر ات۔ یا ھیروڈوٹس ءِ بن دپتری کتاب رجانک ءِ وسیلگ ءَ دنیا ءَ سر مہ بوتین انت، یا ھمے ڈول ءَ البیرونی ءِ سپرنامگ ءَ چہ مھلونک نا آشنا بوتیں، دنیا ءِ جتائیں ملک ءُ راجانی نیام ءَ ھمے سیادی کہ مروچی است انت، اے ڈول ھجبر نہ بوتگ ات۔ رجانک ءِ وسیلگ ءَ دنیا ءَ ھر راج ءَ چہ دومی راج ءِ چاگردی، لبزانکی ءُ راجمانی زند ءِ کتہ کاریاں نپ زرتگ ءُ پہ وت گھتریں زندے ءِ ٹاھینگ ءِ جھد کتگ۔

ھمے ڈول ءَ اگاں بلوچی لبزانک ءَ بہ چار ایں۔( چوکہ بلوچ ءَ لبزانک ءَ ابید ایندگہ پِڑاں رجانکاری ءِ نیمگ ءَ بازیں دلگوش نہ داتگ)   بلوچی لبزانک تری شیئر بہ بیت یا کسّھی لبزانک، ھردکاں نوکیں کتہ کاری ءُ نوکیں داب چہ دومی لبزانکاں زرتگ انت۔ اے سان ھم ھمے رجانک ءِ وسیلگ ءَ اتکگ انت۔ اگاں دنیا ءِ نامی ئیں کتاب اردو، انگریزی یا فارسی ءَ رجانک مہ بوتین انت، اے بلوچی ءَ اوں نہ بوتگ اتنت۔ بلئے بلوچ رجانکاراں ھمے زبانانی وسیلگ ءَ جوانیں نکان وتی زبان ءَترّینتگ انت ءُ بلوچی ءَ را چہ نوکیں مئیلاں آشنا کنائینتگ۔ اے کار بلوچی لبزانک ءِ نبشتھی دور ءِ بندات ءَ بنا بوتگ ءُ داں مروچی یکشل ءَ برجاہ اِنت۔

بلئے بیا کہ اے۔آئی ءَ وتی دور ءَ بازیں چیزے دھون دھان کتگ۔ نوں اگاں ترا چہ دنیا ءِ ھر ڈولیں زبانے کہ آئی ءَ اے۔آئی ءِ ٹول ونت ءُ سرپد بوت کن انت، کتابے کہ رجانک کنگی بیت تو ھما فائل ءَ ھود ءَ ایر گیج ئے، آ سرجمیں کتاب ءَ ترا یک دمان ءَ رجانک کنت ءُ دنت۔ بلوچی ءِ سر ءَچوکہ کار انگت برجاہ انت، پمشکا بلوچی ءَ سرجمیں رنگے ءَ رجانک کت نہ کنت۔ البت گوگل جمنائی ”بلوچی اکیڈمی“ ءِ رھبند ءَ کساس ھشتاد درسد سرجمیں رنگے ءَ رجانک کنت، پدا ھم تنیگت ءَ اشی ءِ سر پ بازیں کارے پکار اِنت۔

نوں اے۔آئی کہ رجانک کنت گڑا رجانکارانی چے زلورت اِنت؟ اسل ءَ اے انچیں جستے کہ دنیا ءِ جتائیں راجاں اے بابت ءَ جیڑ اِتگ ءُ اشی ءِ سر ءَ بازیں پٹءُپولی نبشتانکے ھم نویسگ بوتگ۔ آھانی منّگ ھمیش انت کہ اے۔آئی چو کہ مشینے ءُ آ ھما داتگیں کوڈانی وسیلگ ءَ یک زبانے ءِ نکان ءَ دومی ءَ ترّینیت، بلئے آئی ءَ نہ گوں دوئیں زبانانی نیام ءِ سیادی ءَ کار انت۔ نہ اے ھما نبشتہ کار ءِ درشانداب ءَ گپت کنت، نہ ھما نکان کہ سورس لینگویج انت، آئی ءُ ٹارگٹ لینگویج ءِ دودمانی ءُ چاگردی  پژدر ءِ ھیالداری ءَ کنت۔ پہ درور اگاں ”کھیر“ جاھے  بئیت ءُتو اشی ءَ اردو ءَ رجانک بہ کن ئے، بگندئے اشی ءِ جاہ ءَ اے۔آئی کیکر ءَ بیاریت۔ البت آئی ءَ اے چیز ءَ کار نیست کہ آ اے دوئیں زبانانی نیام ءَ رجانک ءَ چینچو مھکم کت کنت، بلکیں ھما داتگیں کوڈانی وسیلگ ءَ بس نکان ءِ جند ءَ ترّینیت۔

گڑا چریشی ءَ اے ھبر پدّر بیت کہ اے۔آئی ءِ اینچو دیمروی ءَ ابید ھم لبزانکی رجانک ءِ ارزشت ھما ڈول ءَ برجاہ انت۔ مردمے کہ نکانے رجانک کنت، آ ھما بن زبان ءِ نکانءَ تچک ءَ نہ ترّینیت، بلکیں آئی ءِ دودمانیءُ چاگردی پژدر ءَ اوں سرپد بوھگ ءِ جھد کنت۔ پدا ھما نکان ءَ کہ رجانک کنت ، ھود ءَ نبشتہ کار ءِ درشانداب ءَ سرپد بوھگ ءِ جھد کنت ءُ انچیں دابے ءَ رجانک کنت دانکہ نبشتہ کار ءِ درشانداب سان مند مہ بیت ءُ اشی ءَ ھوار آ ھما نکان ءَ وتی زبان ءِ  تب ءُ مئیل ءِ رِد ءَ ترّینت بہ کنت۔ یا ھمے ڈول ءَ چہ وتی زبان ءَ دگہ زبانےءَ رجانک ءِ وھد ءَ اوں ھمے ھیال دارگ بیت۔ بلئے اے کار ءَ اے۔آئی ءِ ٹول کت نہ کن انت۔

اے گپّ ءَ دنیا ءِ جتائیں نبشتہ کار ءُ رجانکار انگت دلجم انت کہ اے۔آئی ءِ دیمروی ءَ گوں رجانک ءِ ارزشت کم نہ بوتگ، بلکیں کمو مانگیشّ اِتگ، رجانکار ءِ کار گران تر بوتگ ءُ نوں آئی ءَ گیشتر جکانسری کشّگی انت۔ البت آئی ءِ ھما کرد کہ چہ زمانگاں بوتگ، آ انگت برجاہ انت۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

شوھاز

#InternationalTranslationDay