فوک لور ری ٹِلنگ ءُ شرف ءِ آزمانک "مریداں من"


 

فوک لور ری ٹِلنگ ءُ شرف ءِ آزمانک "مریداں من"


۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بلوچی آزمانک ءَ اے ھاتر ءَ کمے چمّ کپیت کہ گدار ءَ چہ گیش آزمانک ءَ تکنیک ءُ بنگپّ ءِ نوک نوکیں کتہ کاری بوھگ ءَ انت۔ بلوچی نوکیں آزمانک ءَ گوں مردم کمو دلجم بیت کہ چہ روایتی تب ءَ درکپتگ ءُ ھما تکنیکانی کتہ کاری بوھگ ءَ اِنت کہ دنیا ءِ ایندگہ لبزانکاں است انت۔ ما دُور مہ رو ایں، اگاں اردو یا وتی ایندگہ ھمساھگیں زباناں بہ چار ایں، ھود ءَ ھم نہ روایتی تب ءِ کسّہ ءَ بستارے است ءُ نہ اے ڈولیں ساچشتانی سر ءَ تران ءُ باوستے بیت۔

شرف شاد بلوچی ءِ ھما نبشتہ کاراں چہ یکّے کہ آ نوکیں کتہ کاری ءَ چہ نہ ترسیت۔ شرف ءِ بازیں انچیں آزمانک انت کہ ھود ءَ آئی ءَ جتائیں کتہ کاری کتگ ءُ اے آزمانک آئی ءِ کتاب "سفر ءَ دمبرتگیں راہاں" چاپ بوتگ انت۔ بلئے ھمے کتاب ءِ گڈّی آزمانک "مریداں من" پمشکا جوانیں آزمانکے لیکگ بیت کہ اد ءَ نبشتہ کار ءَ فوک لور ری ٹِلنگ ءِ کتہ کاری کتگ۔ اے ڈولیں کسّہ اے۔آر داد ءَ ھم نبشتگ، بلئے آئی ءَ میتھالوجیکل ری ٹِلنگ تکنیک کار گپتگ۔

اے انچیں تکنیکے کہ اشی ءِ وسیلگ ءَ نبشتہ کار کوھنیں داستان ءُ کسّھانی کارستاں دو بر تراشیت ءُ نوکیں دور ءِ ھساب ءَ کسّہ ءِ راجمان ءُ کارستانی تب ءَ مٹّینیت۔ کارست ھما بنت، بلئے کسّہ ءِ راجمان بدل بیت، بزاں دور ءُ باریگ، کارستانی "شخصیت" آھانی زبان، ربیدگ، نندگ ءُ پاداھگ ءُ گپّ ءُ ٹال درستیں چیز مٹّ بنت۔ پہ درور اے کسّہ ءِ کارست ھما اَنت کہ چہ شے مرید ءُ ھانی ءِ داستان ءَ زورگ بوتگ انت، بلئے اد ءَ نہ کہ چاکر سردارے ءُ نہ شے مرید  گدانے ءَ کپتگ۔ بلکیں شے مرید ھم مزنیں بنگلہ یے ءَ نشتگ کہ ھود ءَ سوئمنگ پول انت، مزنیں درملکی گاڑی ءُ نوکر ءُ چاکرانی واھند انت۔ شے مبارک اد ءَ کوھنگیں کاپرے ءِ بدل ءَ گوں وتی سنگت ھیبتان بیبگر ءَ کرسیانی سر ءَ نشتگ ءُ تازی ءِ بدل ءَ آئی ءَ "جرمن شیپرڈے" داشتگ۔

کسّہ کہ بندات بیت، وانوک یکبرے سما کنت کہ اے انچائیں شے مرید نامیں مردے، بلئے دیمتر ءَ پدّر بیت کہ اے ھما ھانی ءِ شے مُرید اِنت۔

"شے مرید وتی ماڑی ءِ سبزگ (Lawn) ءِ راستیں کش ءَ کِشتگیں پتن تاکیں لیوار ءِ سباہ ءِ ساہگ ءَ نشتگ ءُ  دو نلی ئیں توپک ءَ ساپ کنگ ءَ اَت۔ (تاکدیم۔138)

گوں بندات ءَ کسّہ ءِ سرجمیں setting بدلینگ بوتگ۔ شے مرید کھیرے ءِ ساھگ ءِ بدل ءَ لوگ ءِ دیم ءِ سبزگ ءَ لیوارے ءِ ساھگ ءَ نشتگ۔ زھم ءِ جاہ ءَ آئی ءَ نوکیں دور ءِ دونلی چرّھی توپکے گون انت ءُ ساپ کنگ ءَ انت۔ روایتی دیوان ءِ بدل ءَ شے مرید تھنا نشتگ ءُ آئی ءِ پت شے مبارک سوئمنگ پول ءِ کش ءَ نشتگ ءُ وتی کچکّ ءَ گوشت دیئگ ءَ انت۔ شے مبارک نوں نہ پنڈیت، بلکیں آ بنگلھانی واھند انت۔

 "اے تازی آئی ءَ چہ جرمنی ءَ وتی گڈّی سوداگری ترّ ءُ تاب (Bussiness tour) ءِ وہد ءَ آؤرتگ ات گوں۔" (تاکدیم۔138)

چریشی ءَ اے پدّر بیت کہ کسّہ ءِ زمانگ آ نہ انت کہ سواری ءُ اولاک ھر ءُ اُشتر انت۔ بلکیں نوکیں دور ءِ درائیں آسراتی است انت ءُ شے مبارک پہ سوداگری ءَ جرمنی ءُ دنیا ءِ ایندگہ ملکاں روآ کنت۔ دنیا درائیں آسراتی آئی ءِ گوٛر ءَ است انت ءُ ھما شوک ءُ ھبّناکی کہ اے دور ءِ ھزگاریں کھولانی انت، آئی ءَ گوں ھمے  چیزاں ھبّناکی است۔

"شے مبارک کچکّ ءَ گوشت دیان ءَ گوں نرم گفتاری ءَ دوشی ڈی۔وی۔ڈی (D.V.D) ءَ چار اِتگیں ھولی ووڈ (Hollywood) ءِ کلاسیک، شیکسپیئر ان لو (Shakespair in Love) ءِ وش تریں بہراں گوں وتی لوگی ءَ بیان کنان  ات۔" (تاکدیم۔138) اد ءَ شیکسپیئر ھم "تمثیلے" کہ چریشی ءَ پدّر بیت کہ نوں انٹرٹینمنٹ ءِ وسیلگ ھم مٹّ بوتگ انت۔ نوں شے مبارک گوں سنگتاں سردار چاکر ءِ شاھی کاپر ءَ نہ نندیت ءُ پھلوانانی شیئراں گوش نہ۔داریت، بلکیں ھولی ووڈ ءِ تامراں چاریت ءُ وت ءَ وشنود کنت۔ پدا شے مرید ءِ مات چوشیں جنگلی جئینے نہ انت کہ تھنا بہ نندیت ءُ لوگ ءُ دلوتاں بہ پودیت، بلکیں آ ھم انچو "ماڈرن" اِنت کہ گوں مرد ءَ نشتگ ءُ ھردو کلاسیکل تامرانی سر ءَ گپّ ءُ تران ءَ انت۔ شے ءُ مرید ءُ ھانی ءِ داستان ءَ جنین ءِ ھما چاگردی بالاد کہ بیان کنگ بوتگ، اے آزمانک ءَ ھما تب ھم رَد کتگ۔ اد ءَ جنین ھم ھمنچو وت واک انت کہ وتی مرد ءِ ھمکوپگی ءَ اوشتاتگ۔ دیمتر ءَ بیبگر  ءُ گراناز ءِ کسّہ کہ کئیت، آ ھم ھمے دور ءِ کالب ءَ جاہ دیئگ بوتگ۔ "اے تامر (film) آئی ءَ ہما وہد ءَ چار اِتگ ات، وہدے لوگی گوہرام ءِ جاہاں بیبگر ءِ  آوار جتگیں اوگانی جنک ءِ چارگ ءَ شتگ ات ءُ آ لوگ ءَ تہنا بور (Bore) بیگ ءَ اَت۔ (تاکدیم۔139) اد ءَ نہ باھوٹی ءِ کسّہ آرگ بوتگ ءُ نہ ھما رند ءُ لشکر ءِ کہ بیبگر ءِ دمب ءَ چہ اوگانستان ءَ۔کپتگ، بلکیں تھنا ھمے گشگ بوتگ کہ بیبگر ءَ اوگانی جنکے آوار جتگ ءُ آؤرتگ، جنک۔گوھرام ءِ لوگ ءَ اِنت کہ میتگ ءِ جنین رمب رمب ءَ آئی ءِ چارگ ءَ رو اَنت۔ دومی کارست ءِ بابت ءَ کسّہ کار ءِ گپّ ھم استیں دور ءِ رِد ءَ انت۔ چوکہ آ وتی لوگ ءَ تھنا بور بیگ ءَ اَت۔ ھر کسّہ ءِ زبان ھمائی ءِ راجمان ءِ ھساب ءَ بیت، اے ڈولیں کارستاں گوں کسّہ یے کہ دوار ساچگ بیت ءُ آئی ءِ راجمان استیں دور یا انچیں نوک تریں پھناتے پدّر بہ کنت گڑا اشی ءَ Contemprory reimagining گش اَنت۔  پہ اشی ءَ الّم اِنت کہ تھنا کارستانی گپّ ءُ ٹال ءُ ربیدگ نہ بلکیں ھما کسّہ ءِ آرگ ءُ درشانداب کلّ ھما دور ءِ ھساب ءَ بہ بنت کہ ھما زمانگ ءَ نبشتہ ءَ دوار ساچگ  ءَ انت۔ اد ءَ تھنا کسّہ کار نہ۔بلکیں ھما کارستانی گپّ ءُ ٹال ھم ھمے دور ءِ رِد ءَ ساچگ بوتگ انت۔

چوکہ،  "شے مبارک ءَ کندان ءَ۔گشت، "توپک ءِ ساپ کنگ حمام (Bath room) ءِ ساپ کنگ نہ انت کہ مردم کارداراں بہ پرمائیت۔"(تاکدیم۔140) یا ھیبتان گشیت، "حانی من یک ءُ رند ءَ دینار ءِ لوگ ءِ پارٹیاں (Parties) دیستگ، شرّیں چکّے ات ماشااللہ۔" (تاکدیم۔140) دیمتر ءَ شے مبارک ءِ اے گپّ، "حانی ہمائی ءِ گرل فرینڈ (Girl Friend) ات۔ شے مرید ءَ گوں آئی ءَ دوستی کتگ۔ گوں ہمائی ءَ گرد اِتگ۔ ہمائی ءَ شام ءُ سبارگ کتگ۔ وہدے آئی ءَ حانی ءِ بخشگ ءِ چرت پِر نہ انت، گڑا مارا چیا  بہ بیت۔"(تاکدیم۔140)

اد ءَ کارستانی گپّ ءُ ٹالاں چہ پدّر بیت کہ اے نوکیں دور ءِ ھزگاریں شھری کھول انت کہ پہ دپ وشّی ءَ ھر ھبر ءَ انگریزی یے ھوار کن۔انت۔ چوکہ گرل فرینڈ، پارٹی ءُ دگہ ھمے ڈولیں ھبر۔ پہ ھر کسّہ ءَ الّمی انت کہ آئی ءِ زبان کسّہ ءِ راجمان ءَ گوں ھمدپ بہ بیت۔ اگاں کسّہ ءِ دور مرچیگ ءَ چہ دو سد سال پیسر ءِ زمانگ انت ءُ ھود ءَ کارست گاڑی یے ءَ سوار بہ بیت، یا ٹیلپون ءِ سر ءَ ھبر بہ کنت گڑا کسّہ درا نئیت۔ بلئے اے تکنیک ءَ کوھنیں کسّھانی کارست کہ نوکیں دور ءِ رد ءَ ساچگ بنت ءُ کسّہ نوک کنگ بیت، گڑا آئی ءِ زبان ءُ بیان ھم ھمے دور ءِ ھساب ءَ بہ بیت۔

دومی ھبر اِد ءَ شے مرید ءِ دشتاری ءِ بدل ءَ ھانی آئی ءِ گرل فرینڈ انت۔ پدا شے مرید ھانی ءَ کہ بکشائیت، آئی ءَ ھچ چُرتے پِر نیست۔ نشتگ تپنگ ءِ ساپ کنگ ءَ انت ءُ پہ شکار ءَ چن ءُ لانچ ءَ انت۔ شے مبارک ھم دلجم انت کہ مرید ءَ ھانی بکشاتگ وَ ھمائی ءِ بوتگ، ما چیا مپت ءَ دل ءَ بہ ور ایں۔ پدا ھم کسّہ ءِ کوھنیں تب، شے مرید ءِ مات ءِ گپّاں چہ پدّر بیت۔ "درست ہمے بحتاوریں مرید ءِ نالائقی انت۔ مرید ءِ مات ءِ دیم ءِ سر ءَ پریشانی ءِ کسانیں لکیرے ودی بیت۔"چونیں جنکے ات۔ دست ءِ برائینت۔ نوں وت ہم پشومان انت ءُ مارا ہم پریشان ئِے کتگ۔" (تاکدیم۔141) پدا ھمے گپّ ءِ پسو ءَ شے مبارک گشیت، "وتی قول قول ئی کتگ۔" (تاکدیم۔141) 

اد ءَ شے مبارک ءُ جن ءِ ھبر  بلوچ ءِ استیں دور ءُ گوٛست ءِ تب ءُ مئیل ءِ جھگیری ءَ کن انت۔ بلئے ھردکانی کارست چہ روایتی کسّہ ءَ چپّ انت۔ شے مرید ءُ ھانی ءِ داستان ءَ شے مبارک مرید ءَ۔گشیت کہ ترا چون انت تو پہ جنکے ءَ وت ءَ را چو ابدال ءُ گنوک کتگ۔ بلئے نوں مبارک گشیت نہ مرید ءَ شرّ کتگ، اگاں دشتارے بکشاتگ، بلئے وتی کول ءَ نہ بجّ اِتگ۔ مات ءِ وَ ھیر ھود ءَ ھچ نام ءُ نشان نیست کہ مات ءَ چے گشتگ، بلئے اد ءَ مات نوکیں دور ءِ جھگیری ءَ کنت۔ آئی ءِ منّگ ھمیش انت ھانی ءِ ڈولیں شوکیں جنکے کئے پہ کولے ءَ بکشائیت کہ آ گوں مرید ءَ شوک شوک بوتگ۔

دیمتر ءَ نوکیں دور ءُ اے دور ءَ جنک ءُ بچکّ ءِ نیام ءِ سیادی چہ مرید ءِ مات ءِ ھبراں پدّر بیت۔ "من ءَ ترس انت کہ وت مونج (Depression) ءِ آماچ مہ بیت۔ آئی ءَ حانی سک دوست ات۔ درائیں روچ ہواری ءَ گرد اِتگ انت۔ درائیں شپ ءَ فون ءِ سرا ہلوت ءُ سک سک اش کتگ۔"(تاکدیم۔142) چداں اے دور ءِ شے مرید ءُ ھانیانی سیادی ءُ نزّیکی ءُ آھانی گپّ ءُ تران ءِ وسیلگ پدّر بنت۔ شے مرید ءَ۔وَ وتی زند ءَ ھانی نہ دیستگ ات، بلئے نوکیں دور ءِ مرید گوں وتی ھانی ءَ پون ءَ ھبر کنت، یکجاہ ترّ ءُ تاب کن انت ءُ یکّے دومیگ ءَ سوگات ءُ ٹیکی دیئنت ءُ یکّے دومیگ ءِ لوگ ءَ روآ کن انت۔

بلئے کسّہ ءِ وش تریں جاہ ھمیش انت کہ ھود ءَ مرید شے مریدی ءِ گوستگیں درائیں ربیتاں پروشیت ءُ وتی نوکیں گرل فرینڈ ءَ گوں درکپیت۔ 

ھمے وھد ءَ کہ مرید ءِ پت گوں مردماں دیوان ءَ انت، زیبائیں جنکے لوگ ءَ پتریت ءُ تچک ءَ مرید ءِ کرّ ءَ رؤت، گوں آئی ءَ دست ءُ دروہ بیت ءُ ھردو وتی گلّاں ملّارین انت۔ مرید پدا ھمے جنک ءَ زوریت ءُ کماشانی دیوان ءَ کئیت ءُ گشیت، "اے منی امّا انت۔۔۔ اے منی ابّا شے مبارک۔۔۔۔۔اے منی پت ءِ درکسانی ءِ سنگت انکل ہیبتان بیبگر۔۔۔۔ ءُ دیوان اے منی نوکیں گرل فرینڈ شدری انت۔" (تاکدیم۔143) اے ھما جاہ انت کہ سرجمیں کسّہ ءِ مجگ انت۔ چریشی ءَ ھمے پدّر بیت کہ اگاں شے مرید ءُ ھانی مرچیگیں دور ءَ بوتین انت، مرید ءَ گنوکی ءِ بدل ءُ وتی جان ءِ داگ دیئگ ءَ بدل ءَ دگہ نوکیں گول فرینڈے شوھاز اِتگ ات ءُ پدا وشدل ءُ شادان بوتگ ءُ ترھتگ ات۔ کوھنیں داستان یا گیدی کسّھانی دوار ساچگ ءِ مول ءُ مراد ھم ھمیش انت کہ استیں دور ءِ ھساب ءَ اگاں ما ھما کارستاں "ری امیجن" بہ کن ایں گڑا چون بنت۔ آھانی تب ءُ مئیل، نندگ ءُ پاداھگ ءُ زبان ءُ گپّ ءُ ٹال یا جیڑگ ءِ راہ ءُ رِپک چے داب ءَ بنت۔ دومی اے ڈولیں کسّھانی دوار ساچگ ءِ مکسد ھمیش انت کہ کوھنیں۔کارست پہ تژن ءُ ملنڈ زورگ بنت۔ ھود ءَ ھما۔دودمان ڈالچار کنگ بیت ءُ کارست استیں دور ءِ ھساب ءَ چارگ بنت۔چوکہ ھمے کسّہ ءَ مرید ءِ مات پہ تژن آئی ءِ پت ءَ گشیت، "بلئے من ءَ چہ آئی ءَ سک ترسیت۔ گوستگیں رند ءَ تو نہ دیست چون ئِے کت۔ نازاہکیں جان ءَ ہپتاد ءُ ہپت داغ ئِے دات۔ گنوک ءُ گژدال ءَ جنگل ءُ گیابان ءَ یلہ بیت۔ کس ءَ پتوا ندات کجانگو شتگ،گڈسر ءَ سرئِے پہ پاکیں مکّہ ءَ حج ءَ کشّ اِت۔ "(تاکدیم۔142) اے پہ ھما مرید ءَ تژنے کہ پہ جنکے ءَ اینچو گنوک ءُ گژدال بوت ءُ مرچیگیں دور ءِ ھانی ءِ سور انگت ھلاس نہ اِنت ءُ مرید گوں وتی نوکیں گرل فرینڈ ءَ انچو دلجم انت گشئے ھچ نہ بوتگ۔

اے ڈولیں کسّھانی جوانی اش انت کہ ھما سرجمیں نفسیات کہ کسّہ یے یا داستانے ءِ پژدر ءَ است انت، دوار ساچگ ھما نفسیات ءِ جند ءَ مٹّینیت۔ چوکہ ھود ءَ شے مرید پمشکا مزنیں راجدپتری کارستے کہ آئی ءَ پہ کولے ءَ وتی دشتار بکشات،  اد ءَ مرید ءَ دشتار ھم بکشاتگ، بلئے اے پہ آئی ءَ انچائیں ھبرے۔ دشتار ءِ روگ ءَ آئی ءَ ھچ سدّے پِر نیست۔ پدا اے ڈولیں کسّھانی آسر ھم مٹّینگ بیت۔ چوکہ داستان ءِ کارست مرید  پہ ھانی ءَ داں زندگ انت ودار کنت ءُ گڈسر ءَ پیریں ھانی آئی ءَ رسیت، بلئے اے آزمانک ءَ نہ ھانی ودار کنت ءُ نہ مرید۔ اد ءَ مرید بامردے ءِ بدل ءَ انچائیں انسانے ءِ دروشم ءَ پیش دارگ بوتگ کہ آئی ءِ جیڑگ ءُ مارشت ءُ پیسلہ کل لس مردمی انت۔ آ پہ ھانی ءِ پیریں ءَ ودار نہ۔کنت، بلکیں دمان ءَ شدری نامیں دگہ گرل فرینڈے پٹّیت ءُ گوں ھمائی ءَ سر ءُ لینڈ بیت۔

اے آزمانک ءَ شرپ شاد ءَ اے تکنیک ءِ جوانیں کتہ کاری یے کتگ۔ البت اے چاگرد کہ آئی ءَ پیش داشتگ، اے ھما کھولی زندمان انت کہ مزنیں شھراں نشتگ انت، اگاں کسّہ ءِ راجمان مرچیگیں دور ءِ بلوچ دمگ بوتیں، انگت وش تربوتگ ات۔ دومی ھمے ھبر کہ نبشتگ انت ءُ اشانی دیما انگریزی نبشتگ انت، بائد انت تھنا انگریزی نویسگ بوتین انت۔ چوکہ مونج ءُ ڈپریشن، ھردکانی بدل ءَ تھنا یک لبزے زورگ بوتیں۔ پدا ھم اے تکنیک ءِ کتہ کاری جوان انت کہ چریشی ءَ نوکیں آزمانکار ھم سکین زور  اَنت۔


کتاب:

شاد،شرف، سفر ءَ دم برتگیں راہاں، 2020، انسٹیٹیوٹ آف بلوچیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

شوھاز

No comments:

Post a Comment

فوک لور ری ٹِلنگ ءُ شرف ءِ آزمانک "مریداں من"

  فوک لور ری ٹِلنگ ءُ شرف ءِ آزمانک "مریداں من" ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ بلوچی آزمانک ءَ اے ھاتر ءَ کمے چمّ کپیت کہ گدار ءَ چہ ...