لہتیں کتاب نام ءَ چہ اَنچو درا بنت کہ گندگ ءَ گوں مردم ءَ وتی نیمگ ءَ چکّ اَنت۔ یک رندے شال ءَ جنّاح روڈ ءَ تڑہ ءِ سر ءَ اَنچیں کتابے ءَ چمّ کپت اَنت کہ نامے ”ع سے عشق“ اَت۔ آ وھدی ہمے ڈولیں بے سر ءُ پادیں ءُ مہرانکی گدارے ما ہرجاہے بہ دیستیں اگاں کیسّگ ءَ زرّ است اَت ما الّم زرت۔ پدا تڑہ ءِ سر ءَ مدام کتاب زرت کہ اِد ءَ ارزان ءَ رست اَنت۔ ہمے کتاب کہ وانگ من بندات کت انچو سما بوت کہ سکولی زھگے ءَ نبشتگ۔ پہ وانگ ءَ ہچّی یے مان نیست اَت۔ من ءَ اَنچو بژن بوت کہ دل ءَ گشت پریشی ءَ داتگیں زرّ من چاہے کتیں وارتین انت گہتر اَت۔
من چو نہ گشاں کہ صفدر زیدی ءِ نوکیں گدار”گْوادر کے سرخ کیکڑے“ ہما ڈولیں کتابے اَت، بلئے چو کہ نام اَت چو کسّہ نہ اَت۔ چوناہا جیڑہ اش اِنت کہ ایردستیں راج ءِ درد اوں بہا بیت۔ بلوچ راجی جیڑہ یا بلوچستان ءَ گوں ھمگرنچیں ہر ڈولیں کتابے بیت آئی ءَ الّم مردم زور اَنت۔ آ ہمے سرپد بنت کہ پہ ما چیزے نہ چیزے مان ئِے بیت۔ چو کہ چے۔گویرا ءَ وتی سرجمیں زند کیپیٹلزم ءِ بگیر ءَ جہد کت، وہدے مُرت پدا ہمے کیپیٹلسٹاں چے۔گویرا ءِ عکس بہا کت ءُ زرّ کٹّ اِت۔ پشکانی سر، کلاہانی سر ءَ ، یا دگہ ہمے ڈولیں بازیں پروڈکٹانی سر ءَ ”چے “ ءِ عکس جتگ۔ اَنچو بلوچ ءِ درد ءَ اوں بہا بوہگ ءَ اِنت۔۔۔۔ جاہے سیاسی پارٹی یے ہمے سودا ءَ جنت، جاہے تاکارے ءُ جاہے دانشورے۔۔۔
صفدر زیدی ءِ اے گدار چوناہا ”علامتی“ کسّہ یے کہ بلوچ راجی جُنز ءُ بیگواہیں بلوچانی جیڑہ ءِ پژدر ءَ نبیسّگ بوتگ۔
کسّہ ءِ بنجاہی کارست گولو اِنت۔ گولو ورنائیں تگسے کہ آئی ءِ مات آئی ءَ چہ گار ءَ درکپگ نئیلت۔ مات ءِ ترس ہمیش اِنت کہ گولو چو وتی پت ءِ ڈول ءَ دژمانی دست ءَ بیگواہ مہ بیت۔ اوّلی ھبر اش اِنت کہ دژمنانی ترس ءَ ہچ بلوچ وتی لوگ ءَ نہ نشتگ ءُ نہ کہ پہ نندگ ءَ اے جیڑہ گیشوار بیت۔ دومی گولو ءِ پت دژمناں چیا گپتگ ءُ بندیگ کتگ، ہچ سبب نیست۔ آئی ءَ آجوئی ءِ پلّہ مرزی کتگ، بلئے کجام آجوئی، چونیں آجوئی، چہ کئے ءَ آجوئی؟ اِد ءَ ہچّی گشگ نہ بوتگ۔ بندیگ کتگ، سیاہیں ”شارکاں“۔ اِد ءَ اگاں ہمے علامتانی ھبر بہ بیت، اینکاسیں مزنیں نبشتہ کارے کسّہ ءِ تکینک ءَ وَ سرپد اِنت، بلئے منی نزّ ءَ آئی ءِ بد نیّتی اِنت کہ آ ہرچی ءَ گیشّینگ نہ لوٹیت۔ بلّے تُری ”علامتی“ کسّہ یے بہ بیت۔
کسّہ ءِ گڈسر ءَ اوں اَنچو پیریں کسیپّ تگس، ڈولفن ءُ پگلاں یکجاہ کنت ءُ بندی جاہ ءِ سر ءَ اُرش کنت درستیں تگساں یکپارگی چہ سیاہیں شارکانی بندی جاہ ءَ آجو کنت۔ جنگ ءِ راہ ءُ رپک اَنت۔ آ جنگ تُری جناورانی بہ بیت یا مردمانی، راجی جنگے بیت آ شولّ کشّیت ءُ یکّیں دمان ءَ نہ بندات بیت نہ آسر بیت۔ پدا اگاں سیاہیں شارکاں سرجمیں دریا پُشت ءَ کشّ اِتگ گڑا اشی ءِ سان ہر لولک ءُ جوجک ءُ ماہیگانی سر ءَ کپنت۔ تہنا تگس ءُ پگل یا ڈولفن چیا گون اَنت؟
بازیں نزوریاں ابید اوں نبشتہ کار ءَ جہد کتگ کہ جوانیں کسّہ یے نبشتہ بہ کنت۔ چو کہ گومل مادگیں تگسے ءُ سہرو ءِ لوگبانک اِنت۔ وتی ٹکّ ءِ تگسانی سردار اِنت۔ چریشی ءَ ہمے پدّر بیت کہ آئی ءَ نوکیں دور ءَ بلوچ چاگرد ءِ عکّاسی ءِ جہد کتگ کہ بلوچ ءِ رھشونی ءَ جنین اوں گون اَنت۔ یا دگہ ھبرے کہ وتی جند ءِ تگسانی دلّاری ءَ تگس کن اَنت، بزاں برات ءِ گار ءُ بیگواہ کنگ ءَ جند ءِ برات ءِ دست مان اِنت۔ پہ کلدار ءَ یا پہ ادارکی وشّی یے وتی برات وتی براتانی دلّاری ءَ کن اَنت ءُ دژمن ءِ رم ءَ ہوار بنت۔
صفدر زیدی چو کہ بلوچ ءِ ھاک، آئی ءِ تب ءُ اِد ءِ چاگرد ءَ سرپد نہ اِنت ہمے واست ءَ پہ دل وشّی آ کسّہ یے نبشتہ کت کنت ءُ اے ھبر ہم منّگی انت کہ آ جوانیں نبشتہ کارے بلئے اے کتاب ءِ نبشتہ کنگ ءَ آئی ءَ سکّ اشتاپ کتگ۔ باز جاگہ سما بیت کہ آئی ءَ بس گْوادر ءِ نام ءَ یا ہمے جیڑہ ءِ سر ءَ تہنا کسّہ یے نویسگی بوتگ۔
پہ درور کارستانی گپّ ءُ ٹال چو پٹّ ءُ پولی کتابے ءِ سرشوناں نبشتہ کتگ اَنت دانکہ کتاب ءِ تاکدیم گیشتر بہ بنت۔ یا گولو وتی مات ءَ گشیت کہ تو من ءَ در ءَ رؤگ نئیل ئے من چوں پہ تو نشارے شوہاز کناں ءُ ترا نماسگ بیت؟ جنگ الّم چاگرد ءِ بازیں چیزاں دہون دہان کنت بلئے چو ہم نہ انت کہ مردم سور ءُ سانگ نہ کن اَنت، چکّ پیدا نہ کن اَنت یا وتی چاگردی چست ءُ ایراں یلہ کن اَنت۔
دگہ جاہے گولو وتی سنگت خوش گلو ءَ گشیت: واجہ تیری آواز میں اب اور درد اُتر آیا ہے۔“ نبشتہ کار چو نزانت کہ بلوچ وتی سنگت ءَ واجہ نہ گشیت۔ یک جاہے افسرے گوں ملّایے ءَ فون ءَ گپّ ءَ اِنت ، سرجمیں گپّ ءُ ٹال پنجاپی زبان ءَ اِنت۔ اگاں دگہ زبانے ءِ گپّ کسّہ ءَ ہوار کنگ بنت گڑا بائد اِنت آہانی بزانت دیئگ بہ بنت، شعرے بیت وَ سر پِر بیت بلئے انچائیں گپّ ءُ ٹال دومی زبان ءَ پرچے بیت اشی ءَ حاصیں سوَبے نیست۔۔اشاں ابید بازیں جاہ ءَ انچو اشتاپ کاری کتگ ئِے کہ گپّ جنوکیں کارست وتی جند ءِ گوما گپّ ءَ اِنت۔ اگاں اینچو بے سردری کنگ بہ بیت گڑا چریشی ءَ ہمے پدّر بیت کہ اے پہ اشتاپ کاری ءَ نبیس اتگیں کسّہ یے۔
بہر ھال ”ماحولیاتی“ ھساب ءَ بچارئے کسّہ جوان اِنت۔ چو کہ گجّوہانی سوَب ءَ سرجمیں ماہیگ ءُ لولکانی نسل ھلاس بوہگ ءَ اِنت یا نائلون ءِ ماھورانی سوَب ءَ دریائی مہلونک ءَ تاوان رسگ ءَ اِنت ءُ ہمے ڈولیں دگہ بازیں جیڑہ کہ آہانی سر ءَ کسّہ کار ءَ دلگوش گوٛر کتگ۔ بلئے سرجمی ءَ بہ چار اَیں من گشاں اے پہ نام ءَ ”گْوادر کے سرخ کیکڑے “اِنت۔ اشی ءَ نہ گوں بلوچ ءَ کار اِنت ءُ نہ گوں بلوچ ءِ جیڑہاں۔۔۔ البت کتاب بہا بیت، مردم وان انت ئِے، شنگکار ءَ پہ تاوان نہ انت۔۔۔
No comments:
Post a Comment