۔۔۔۔
تو بلکیں سما کرتگ۔مااَنچیں چیزے ءِ رند ءَ کپتگیں کہ آ ھردمان،ھر کترہ،وت ءَ سھرا کنت ءُ ھم ، سھرا نہ کنت۔کجام رنگیں چیزے بہ بیت آ سرجمءَ وت ءَ سھرا نہ کنت ءُ پیش نہ داریت۔
من وت برے برے جیڑاں کہ اے ھمے چیز ءِ وتی ازم انت کہ برے رنگے ءَ ،برے دروشمےءَ وت ءَ پیش داریت یا کسے چوشیں ھست کہ ایشی ءَ چابی دنت ءُ ھر روچ دگہ رنگے ءَ ٹِکّ،ٹِکّ ءَ پرمائیت۔توار بلکیں ھما یکیں بہ بیت بلے من کہ ایشی ءَ اشکنگ ءَ یاں ،اےتوار من ءَ ھر دمان ءَ دگہ رنگیں دَور ءُ باریگ،یات ءُ تْرانگے ءَ گوں دوچار کنت۔
من رَد ھم بوت کناں پرچا کہ چوشیں زانت ءُ زانشے نیست کہ دراہ آئی ءِ سر ءَ تپاک بہ بنت۔
ھمے سائنس ءِ جند ءَ بچار زمانگے ءِ بدل بیگ ءَ گوں آئی ءِ پولکاری رَد کنگ بیت ءُ نوکیں چیزے دیم ءَ آرگ بیت۔اے ھم بندر ءَ ھما اوّلی گپ انت کہ من گْوشتگ ات کہ ھر چیز ءِ اگاں یک دروشمے بہ بیت ھم،ھرکسی گور ءَ ھمے یکیں دروشم نہ بیت۔
ترا اگاں برٹنڈرسلؔ ءِ میز (ٹیبل) ءِ مسال ءَ بدیاں ھم،پد ءَ ھما گپ بیت کہ ھرکس دور ءُ نزیک ءَ اوشتاتگ ءُ ایشی ءَ چارگ ءَ انت،ھرکس ءَ اے دگہ وڑے ءَگندگ ءَ کیت۔یکے ھمود ءَ اوشتاتگ ءُ میز ءَ چارگ ءَ انت کہ آئی ءِ سر ءَ لیٹ ءُ رژنائی ءِ شھم کپگ ءَ انت،آ گْوش ایت میز درپشگ ءَ انت۔نوں دومی ھمود ءَ اوشتاتگ کہ اود ءَ میز سک تھاردیم انت یا بگندے آئی ءِ چم نزور بہ بنت یا کہ چَشمُکے چمان انت، چہ اشاں میز ءِ بارو ءَ ھرکسی وتی راستی یے بیت۔
نی کہ میز ءِ جند ءِ راستی انت،بلکیں آئی ءَ چوشیں راستی یے بہ بیت،بلے ما آئی ءَ زانگ ءَ نہ ایں۔چیز ءِ راستی ءُ گواچن ھمیش انت کہ من ئے سما کنگ ءَ یاں،چو ھم گْوشگ نہ بیت۔
افلاطون بلکیں بگوش ایت کہ اے میز بندر ءَ ارواہ ءِ دیستگیں میز ءِ گیگان(نقل) انت۔بلے آمیز کَے ءَ دیستگ؟من ءُ تو وَ راستی ءَ نہ دیستگ،بلکیں کسے بگوش ایت من واب ءِ تہ ءَ دیستگ ،آچہ ایشی ءَ ڈولدارتر ءُ زیبا انت۔اے ڈولداری ءُ زیبائی ءِ مانا ءُ بزانت ھرکسی گور ءَ ھمے یکیں بیت؟
اے ھما میز ءِ مسال بوت کہ ھرکس ھما جاگہ ءَ اوشتاتگ،ھما رنگ ءَ گندگ ءَ انت ئے،ھما آئی ءِ راستی انت۔
یک لُولُکءُ سھدارے ءِ یا نادراہی ءِ بارو ءَ بلکیں تچکیں راستی یےبیت کہ ایشی ءِ زند ءِ چارروچ انت یا ھپتگ ءُ چار ءُ پنچ ماہ ءَ پد ایشی ءِ زند ھلاس بیت۔ھمے رنگ ءَ نادراہی ءِ نیمون ھم زانگ بیت شیمُک ءُ سِلّ ءِ نادراہی پرچا مردم ءَ گور جنت۔پِگر ءُ سسّا ءِ رِد ءَ چست کرتگیں جستانی گڈسری مانا ءُ
بزانت ،ھماانت کہ ھر کسی وتی کیسگ ءُ مَلگّ۔
بیا اے شئیر ءَ مانا کنگ ءِ جھد ءَ کنیں کہ باریں ایشی ءَ چوشیں راستی ءُ منزلے ھست کہ دگہ منزلے مارا دیم ءَ مہ کپ ایت؟
من مرتگاں پہ تئی مہر ءِ مہکان ءِ نود
میار پمنی ادیرہ ءَ میار چراگ
عطاشاد
یکے وَ ایش انت کہ اے ,من، کَے انت۔پرچا پہ ,مہر ءِ مہکان ءَ مرتگ؟ اے مہر ءِ مہکان، مردمے،ھلک ءُ بازارے،راہ ءُ کِشکے،دوستدارے کہ دگہ واب ءُ ارمانے؟
مہر ءِ مہکان ءِ نود،بلوچی بزانت بلدانی تہ ءَ ایشی ءِ گستائیں ماناھست انت چو کہ مہر،مہکان،نود ،چے ءَ گْوش انت بلے مہر ءِ مہکان ءِ نود زانگ بُوگ ءَ نہ انت۔اشتاپ مکن بلکیں تو بگوشے اےدراہ چہر انت۔من ھم منّاں کہ اد ءَ مسال ءُ درور آرگ بوتگ بلے پہ کے ءَ ؟ اے من، کے انت۔ھمیشاں چہ بزاں، مہر،مہکان،نود ءَ چہ شئیر درشانی ءِ رنگے گرگ ءَ انت۔ دومی ابیدء نود ءَ، مہر ءُ مہکانی ءِ گوناپ سازی ھم، دلگوش کنگ لوٹ ایت۔پرچا کہ فارسی ءِ تہ ءَ مہر، روچ ءَ ھم گوش انت۔نود اد ءَ نور بوتیں ،گُڑا مَرگ (کبر ءِ تھاری) ءُ مہکان ءُ مہر ءِجْوانیں نزیکی یے تو سما کرتگ ات۔ پرچا کہ مہکان ،مہر ءُ نود، ڈنّی ءُ ابرمی چیز انت ۔اے ماں کبر ءُ مانش ءَ نیست انت ۔ اے گپ ءَ ھم بزان کہ مہکان ءُ نود ءُ مہر ءِ دیم ءَ چراگ ءَ چوشیں بستارے نیست کہ اشانیگ انت۔ اے من، یک جنینے ءِ درشانی ھم بوت کنت کہ زند ءَ آئی ءَ چہ وتی لوگواجہ ءَ مہر نہ رستگ ۔مَرگ ءَ پد آئی ءِ کبر ءِ منجار انت ءُ ھر روچ کیت ءُ چراگے روک کنت ءُ روت۔من اے شئیر ءَ گیشّوار کنگ نہ لوٹاں،اے بس کسانیں مسالے من ترا دات۔اَنچو کہ اے مانا ھم درکپ ایت کہ یک مزنیں مردمے ءِ بیانیہ انت کہ زند ءَ آئی ءَ شرپ دیگ نہ بیتگ،مَرگ ءَ پد آئی ءِ یات ءَ چراگ بالینگ بیگ ءَ انت۔اد ءَ من، ءُ تو،(پرچا کہ شئیر ءِ گپدیم تئی، انت۔من مرتگاں پہ تئی) زانگ بیگ ءَ نہ انت۔ھمے رنگ ءَ مہر،مہکان،نود کہ اے نِبشت (Text) ءِ تہ ءَ اتکگ انت چہ اشاں دوستی ءُ واھگے سھرا بیت۔بزاں چہ اے سہیں لبزاں یک وشّی ءُ واھگے ءِ مراداں بیگ ءِ ارمانے سھرا انت۔چونیں وشی ءُ لزتے، اے زانگ نہ بیت کہ اے ساچشتی وشی یے ۔
سیر ءُ شادہ ءِ رنگیں ڈنی (خارجی) وشّی یے نہ انت۔اگاں بزیں دیوانے ءَ یکے دومی ءَ بگْوش ایت ,من مرتگاں پہ تئی مہر ءِ مہکان ءِ نود، ھما ئی ءَ کہ اے گوشگ بیگ ءَ انت ، آ بلکیں اے لبزانی اشارگ ءُ کوڈ ءَ بزانت۔اے دگہ دیوان ءَ نشتگیں ھرکس ایشی ءَ وتی نیمگ ءَ مانا کنت۔ اے شئیر ءَ کسے چو سرپد بیت کہ مزنیں کار ءُ جھدے ءِ آسر چراگے بوت نہ کنت کہ آئی ءِ رژنائی مہکان ءِ درور بوت نہ کنت۔من چو نیاں کہ تو من ءَ سرپد بیتگ ئے۔من مزنیں واب ءُ واھگانی مساپرے یاں منی جا ہ ءُ ھنکین کسانیں دنیایے بوت نہ کنت۔
اے شئیر گٹّیں راھے نہ انت ھم،گٹّیں راھے، ما ھمود ءَ اتکگ ءُ سربوتگیں کہ دیم ءَ رَوگ نہ بیت۔
ھمے دیم ءَ نہ روگ ءِ جست دگہ نوکیں راہ ءُ کِشک پیش داریت۔
ھمے کہ اے شئیر ءَ گیّشینگ ءَ انت آئی ءِ دل ءَ شکّے رستگ کہ راستی ءَ اَنچوش انت بزاں راہ نیست یا ھمے جیڑگ ءِ تہ ءَ نوکیں راہ ءُ کِشک درکپ انت؟ راہ بند نہ بیت بلے ھرکس پہ وتی واک ءُ وس۔
نی یک اَنچیں وانوکے یا گوشداروکے کہ آئی ءَ نوار گوشداشتگ،بگند ئے نورخان ءِ توار ءَ اےشئیر ءَ اشبُکنت ءُ وش بہ بیت ” یار مزگ دیگ ءَ انت۔چون نورخان ءَ جتگ۔“ آئی ءَ گوں زیمر ءُ ترز ءَ متلب انت۔گوں شئیر ءُ آئی ءِ ازم ءَ گوں کار نیست۔یک وانوکے ھما انت کہ لبزانک ءِ بارو ءَ اگاں دگہ نہ زانت،اینچو زانت کہ عطاشاد ءِ شئیر انت۔عطا مزنیں شاعرے،شئیر ھم مزن بیت۔ واہ یار! باز جْوان بلکیں بگْوش ایت۔ بلے چو نہ گْوش ایت اے مزنیں شئیرے نہ انت۔پرچا کہ آئی ءِ دودمان ءَ ،شئیر ءُ لبزانک ءَ چاگرد ءَ آئی ءِ پِگر ءُ سسّا ءِ تہ ءَ عطا ءِ مزنی ءَ انَچیں بُتے مِکّ کتگ کہ ھچ رنگ ءَ کور دیم نہ بیت۔دگہ وانوکے ھم بیت کہ آئی ءِ دیم ءَ شئیر بلکیں بہ بیت،شاعر ءُ دگہ نام نہ بیت۔نہ کہ آ اے منّگ ءَ تیار بیت کہ عطا ءِ ھمک شئیر بے مٹّ بیت۔آ چو زانت کہ مزنیں شاعراں ھرابیں شئیر ھم باز گْوشتگ۔نہ اود ءَ زبان ءِ جْوانی یے گندگ بوتگ،نہ ھیال ءُ ازمی سپتے۔ اے رنگیں وانوک ایشی ءَ ھم زانت کہ دستونک ءِ شئیر ءَ چون بیگ لوٹیت، ءُ اے چون دستونک ءِ شئیر گوشگ بیت،اے رنگیں جستانی پسّہ آئی ءِ گور ءَ بنت۔ھمے کہ اے جستاں دیم ءَ آرگ ءَ انت کہ راستی ءَ اے دستونک ءِ شئیرے۔فارسی ءُ اردو ،بلوچی ءَ دستونک انَچو گوشگ بیت بزاں زبان تچک ءُ راست مہ بیت،چہر بہ بیت۔چیدگ اگاں نہ بیت گوناپ سازی یے بہ بیت۔ھمنچو ھیال انت،ھمنچو لبز بہ بنت ۔دگہ آئی ءَ گیش ءُ پِرکنگ مہ بیت۔ایشی ءَ ھم چارایت کہ اولی بند(مصرعہ) اگاں سرجم انت دومی بند ,میار پہ منی ادیرہ ءَ میار چراگ، پرچا آرگ بوتگ۔پد ءَ ھمد ءَ چرت ءَ کپ ایت کہ دومی بند اگاں آرگ مہ بوتیں شئیر سرجم نہ بوتگ ات۔نی ھمد ءَ آچو ھم سما کنت کہ ,کجامہکان ءُ کجا چراگ، شئیر ءِ ,من، مہکان ءِ واھگدار بوتگ کہ آئی ءِ رژنائی سرجمیں آزمان ءَ درپش ایت ءُ تو،پمن ءَچراگے آرگ ءَ ئے ،کہ چہ وتی نزیک ءُ گور ءَ آزات نہ انت۔
ھمے یک ھّدے ءَ اے گْوشت کنت کہ مہکان ءُ نود ءُ مہر ءِ واھگدار بندر ءَ نمیرانیں زندے ءِ واھگدارانت،مزنیں پگر ءُ سسّایے ءِ لوٹوک بوتگ ،تو پہ آئی ءَ چراگے آورتگ کہ موتک ءِ نشانی انت۔
دگہ وانوکے ھم بیت کہ آئی ءِ گْوشگ ھمے بیت کہ نود،مہکان،مہر،اشاں مانا نیست۔
۔۔۔۔
ما مردماں یا مئے زند ءُ چاگرد ءَ دوستی، ءَ مہر گوشتگ ءُ ساچان ءَ نود ءُ ساھیل،ھمے رنگ ءَ مہکان کہ وت بندر ءَ مہکان،نہ انت۔کسے ءِ نام ھم بوت کنت،شھر ءُ بازارے ھم گْوشگ بوت کنت۔گوں ما یک کْوھنیں پِگر ءُ سسّایے(ذہن) ھست کہ کرناں چہ یک چاگردے ءَ زندگ انت، آمہر ءَ سیکس سرپد نہ بیت نہ کہ نود، ءَ امباز ءُ گلائیش، نہ مہکان ءَ کدہ ءُ شراب،اگاں بہ منّ ایت بس ھمے گپ ءَ منّ ایت کہ اے دراہ چہر (استعارہ)انت۔پہ دگہ چیزے ءِ بیان ءَ بدل زرتگیں لبز انت کہ وشّی ءُ لزت ءِ مانا ءَ گوں ھمگرنچ انت۔ادیرہ ءُ چراگ نہ وشّی ءِ بیانیہ انت۔
نی کہ مہکان،مہکان مہ بیت،ادیرہ کبر ءُ مانشے مہ بیت،چراگ ھم چراگے مہ بیت،گُڑا ھمے بیت کہ ما اے راہ ءَ گاربوت کنیں،مانا ءَ رست نہ کنیں۔یکے وَ ایش انت کہ چراگ ما ایوک برق ءُ کندیلے ءَ ھم نہ گوشیں۔وت چراگ ھما وھدے مانا دنت کہ ما اشی ءَ ربیدگ ءِ رھبندانی پد ءَ اَنچیں جاگہ یے ءَ ببراں کہ چریشی موتک،وشی یےگوں ایشی ءَ ھمگرنچ بہ بیت۔
بلوچی ءَ چمءچراگ، کُل ءِ چراگ، وشی ءِ مانا ءَ کارمرد بیتگ۔اے دوئیں جاگہ ءَ چراگ موتک ءِ نشانی نہ انت۔چو کہ بچی منی چم ءِ چراگ، یا سید گوش ایت
منی کل ءِ چراگی ءَ بہ منّ ایت۔
چراگ ءِ جند ءَ مانا نیست۔ایشی ءَ کہ ما ھرجاہ یا نِبشتے(متن) ءِ تہ ءَ کارمرد کنیں ایشی ءِ مانا ھما بیت کہ نبشتگین ءِ تہ ءَ انت۔ چراگے کہ ھرجاہ وتی مانا ءَ بدل کت کنت،گُڑا ایشی ءِ یک مانا ئے وَ ھمے بوت کہ ھمے چراگ ءِ مانا ھر نبشتے ءِ تہ ءَ سھرا بیت،آئی ءِ ماناھم ھما بیت۔بلے ایشی ءَ ھم منّگ نہ بیت کہ ادیرہ ءِ سر ءَ ایریں چراگ موتک یا دوستی ءِ نشان انت۔نہ کہ ادیرہ کبر ءُ مانشے،ادیرہ پرشتگ ءُ ویرانیں گِسے ھم بوت کنت۔گمجتیں دلے ھم بوت کنت۔اَنچو مَرگ یا من مرتگاں، مرگ نہ انت بلکیں لوٹگ انت۔,یار من پہ پلانی ءَ مرتگاں،پلانی ءَ پہ گنوکاں،من آئی ءِ شیدایاں۔پد ءَ اے ھم چارگ لوٹیت کہ ادیرہ، گیشتر بزرگ ءُ ولیانی مانش ءَ پہ کارمرد بیت کہ کسانکیں کمپانکے ءِ دروشم ءَ بیت۔
اے شئیر ءِ تہ ءَ ھمنچو لبز کہ کارمرد بیتگ چو کہ مہکان،نود،مہر،ادیرہ،چراگ،اے اشانی بندریں مانا نہ انت۔اےمانا ءِ زانت مارا چاگرد ءُ زبان ءَ داتگ انت۔چو کہ نہ ادیرہ کبر ءُ مانشے،نہ چراگ تھاری ءِ دیم ءِ داروک انت۔اے بلوچی زبان انت کہ مارا گوش ایت اشانی مانا ایش انت۔اَنچو ما چراگ ءِ درور دات کہ ایوک کبر ءِ سر ءَ ایریں دوستی ءُ ستک ءِ نشانی یےنہ انت ،نہ کہ تھاری ءِ دیم ءِ داروک انت۔
چراگ اگاں ویرانگے ءَ یا رھسرے ءَ روک بہ بیت آئی ءِ دگہ مانایے بیت ءُ پیر ءُ زیارتے ءِ سر ءَ روک بہ بیت ،دگہ مانا یے دنت۔اَنچو کہ ما کبرانی سر ءَ پُلّ ایر کنیں یا اگربتی روک کنں اد ءَ اشی ءِ مانا گوں مُردگ ءَ مئے دوستی ءُ نزیکی ءَ پیش داریت۔اد ءَ نود،مہکان،مہر شئیری کوڈ انت ،ھما کہ شئیر ءِ گپدیم انت ھما بلکیں بگوش ایت کہ اد ءَ نود،جمبر نہ انت،نہ کہ مہر،دوستی انت۔
چو اگاں کسےبہ لوٹیت شئیر گران نہ انت بلے آسان ھم نہ انت۔یک ھیالے ھرکسی دل ءَ کیت کہ مااینچو کہ پہ مزنیں واھگے ءَ مرتگیں،اینچو تچ ءُ تاگ کتگ،سر داتگ ءُ ھزاب سگّ اتگ، آئی ءِ داد ءُ مُزّ کسانیں چیزے، یاکسانیں لوٹ ءُ تماھے بہ بیت گُڑا بَے نہ انت۔
چو کہ پیربخش پیرل ءِ شئیر انت کہ آ ھساب ءِ شئیرے نہ انت بلے آئی ءِ جوڑشت (ساخت)ھمے رنگ ءَ انت کہ وانوک ءِ ھیال بازنیمگ ءَ روت۔
باگ ءِ بُنپان من ءَ بِلّ کہ شوھاز کناں
دل منی گار انت ھمے سھریں گلابانی پد ءَ
اے کجام باگ ءِ پُلّ انت؟ راستی ءَ پُلّ انت کہ وشرنگیں مردمانی چہر انت۔اےبُنپان ھدا انت یا اَنچیں لوگے ءِ مستر ءُ کستر انت کہ آئی ءِ گور ءَ سھریں گلاب (مردم، جنک ءُ بچک)ھست؟شئیر ءِ ,من، ءِ چمیشاں یکے ءَ دل بوتگ۔اے ایوک ایشی ءِ سربری ءُ سھرائیں مانا انت۔ ایشی ءِ اندری جوڑشت مارا دور بارت۔
اَنچو عطا شاد ءِ مہر،مہکان ،نود ھم ڈی کوڈ کنگ کپنت۔چو بلکیں کسے ءَیکے مہر،مہکان،نود بگوش ایت اد ءَ دگہ مانگیّشگی ءِ جستے پاد نئیت۔ پرچا کہ دیم ءِ مردم زانت پلانی،پرچا آئی ءَ مہر یا نود،مہکان گوش ایت بلے ماکہ درست دیوان نشتگیں پمارا اے لبز ڈی کوڈ بیگ ءَ نہ انت۔مادراہ وتی دل ءَ مانایے وَجیڑگ ءَ بہ ایں کہ پلانی ءَ مہکان،پلانی پمیشکا گوش ایت کہ آ زیت گپ ءَ سرپد بیت۔نود، پمیشکا گوشیت ئے کہ چودنز ءَ مانشانیت ءُ دیم ءِ مردم ءَ بیوار کنت۔مہر،پمیشکا گوشیت ئے کہ ھمے بودناکیانی مِنت ءَ ھرکس آئی ءَ دوست داریت ءُ مہر، ءِ نام ءَ توار کنت۔
اے دیوان ءَ نشتگیں یک مردمے ءِ شکّ ات کہ اینچو مانا کشت ئے۔اگاں ما عطا ءِ شئیر ءِ لبزاں نِبشت ءِ منّت ءَ چارگ ءِ جھد ءَ بہ کنیں،رست وَباز جاگہ ءَ کنیں بلے یک جاگہ یے ماٹِکّ ءُ نشان کت نہ کنیں۔
نی کہ پد ساختیاتی شرگدارانی گور ءَ مانا ءُ بزانت ءَ منزل نیست،منزل ءُ آپسر کاینت بلے وانوک ھمے سما کنت کہ ما پہ ھما آپسر ءَ درکپتگیں اے آ آپسر نہ انت۔ اے رنگ ءَ گُڑا لبزاں بنجاہ ءُ منزل مہ بیت ،شئیر ءُ شاعر ،دوئیں چو مانا ءِ پیم ءَ بے مانا نہ بنت؟
No comments:
Post a Comment