(چم دیست)
گْوادر کتاب میڑہ گْوادر ءِ دیریگیں روایتے ءُ باریں چنچو وہد اِنت کہ ہمک سال برجم دارگ بیت۔ منی مدام واہگ بوتگ کہ اے میڑہ ءَ بیاآں، بلئے ہمے کہ میڑہ ءِ جار شنگ اِتگ من ءَ الّم انچیں کارے کپتگ کہ یلہ کت نہ کتگ۔ نوں دو سال اِنت کہ گْوادر ءَ آں، بلئے گوٛستگیں سال ءَ ہار ءِ سوَب ءَ میڑہ مہتل بوت۔
اے سال ءِ ہمیش اِنت مروچی بندات بوت۔ ما وَ پیش ءَ چیز اینچو گوں ہورتی ءَ نہ چار اِتگ انت کہ اے ڈولیں میڑہ ءُ مراگشانی مول ءُ مُراد چے اِنت۔ ما ہمے سرپد بوتگ ایں کہ بگندئے چرے مراگشاں کتاب وانگ ءِ کلچر کمّو دیمروی بہ کنت ءُ مردماں نوکیں زانت ءُ سرپدی یے بہ رسیت۔
بلئے۔۔۔
ھدا ءِ گرگ ءَ بچار کہ ہمے کتاب میڑہ ءَ چہ کمّو وہد ساری گوادر ءِ جند ءَ پولیس ءَ کتابانی سٹالے ءِ سر ءَ اُرش کت، نودربر گوں کتاباں دزگیر کت ءُ بندیگ کت اَنت۔ مرچی پدا ہمے کتاب ”کتب میلہ“ ءَ سٹالاں ایر اِتنت۔ پدا ہمے مرد کہ ڈی۔سی گْوادر اِنت، ہمیشی ءِ چیردستی ءَ کتاب گرگ ءُ بندیگ کنگ بوت اَنت، مرچی سٹیج ءِ سر ءَ نشتگ ءُ کتاب ءُ کتابجاہانی ارزشت ءِ سر ءَ گپّ کنگ ءَ اِنت۔ چد ءُ مستریں منافقت چے بوت کنت کہ شہر ہمے یکّین اِنت، کتاب ہمیش اَنت، ہود ءَ ھرام اَنت اِد ءَ ھلار بنت۔
نوں یک ھبرے گیشّ اِت قول ءِ زلفقار زلفی ئیگ ءَ کہ اے کتاب میلہ نہ اَنت بلکیں شغل میلہ اَنت۔ اشانی مول ءُ مراد بلوچستان ءِ ”سوفٹ فیس“ ءِ پیش دارگ اِنت ءُ بلوچ ءَ را ہمے باور کنائینگی انت کہ آ چنچو بزّگ اِنت، چنچو نہدر اِنت، آئی ءِ جیڑہانی گیشواری تپنگ نہ اِنت بلکیں آئی ءَ ”وتگڑیں جمہوریت “ ءِ راہ گرگی انت۔ اصل ءَ اے ڈولیں مراگہاں چہ لس بلوچ ءَ ہچ ڈولیں فائدگے نہ رسیت۔
مروچی کہ من شت آں من یکّ چیزے مار اِت ریاست ہرچی جہد بہ کنت بلوچ نہ چہ وتی زمین ءَ سدیت ءُ نہ کہ چہ وتی زبان ءَ ۔
کتابانی سٹالانی سر ءَ گردگ ءِ وھد ءَ من یکّ چیزے سما کت کہ بلوچی کتاب چہ درستاں گیشتر بہا بوہگ ءَ اِنت۔ یک جوانیں بدلی یے اتکگ کہ بلوچ وتی زبان ءَ وانگ ءَ اِنت۔
مراگش ءِ بندات ءَ جوان تریں ھبر اے۔آر داد ئیگ اِتنت کہ آئی ءَ کتاب ءِ ارزشت ءِ سر ءَ ھبر کت، ایندگراں بس روایتی رنگ ءَ رپٹ اِت ءُ ایر کپت اَنت۔
بیگاہ ءِ لمراگش اوں جوان اِتنت۔ یکّ ایشنے کلائمیٹ ءِ سر ءَ اَت ءُ گڈّی سیشن ءَ کہ داد ڈاکٹر فضل خالق ءَ گلگدارے گرگ ءَ اَت اے اوں بے دروریں سیشنے اَت۔ اے ڈولیں سیشنانی فائدگ اش اِنت کہ یکّے وَ نبشتہ کار گوں وتی وانوکاں دیم پہ دیم بیت ءُ دومی وانوک اے ھبر ءَ سرپد بنت کہ نبشتہ کار ءَ ہرکارے کہ کتگ کجام نیمون ءَ کتگ۔ چوکہ فضل خالق ءَ وتی کتاب ”ہفت تلار“ ءِ بابت ءَ گشت کہ مئے گوٛر ءَ چوشیں مڈّی باز اِنت کہ درجَنگ نہ بوتگ اَنت ءُ من ہمے سما کتگ کہ ما اے گلزمین ءَ کہ نشتگ ایں اشی ءِ ہر بچیلّ ءَ مارا وتی پجّار شوہازگی اِنت دانکہ ما وت ءَ را زانت بہ کن ایں ءُ وتی ہاک ءَ گوں وتی سیادی ءَ سرپد بہ بئیں۔ چریشی ءَ یکّ ھبرے گیشّیت کہ نبشتہ کار ءَ پہ ہر کارے ءَ نیمونے لوٹیت۔
ھیر سیشن برجاہ اِتنت، ما کتابانی اسٹالان ءَ گول اِت، پہ وت ءَ توشگ زرت ءُ در کپت ایں۔
No comments:
Post a Comment