شیتان ءُ جنک
پاؤلو کوئیلو
رجانکار: عبداللہ شوھاز
۔۔۔۔
جمیل مھراب
۔۔۔۔
برازیلی نبشتہ کار پاؤلو کوئیلو 24 اگست 1947 ءَ ودی بیتگ ۔ آ ھستیں دور ءِ ھما گدارنبیساں ھوار انت کہ آئی ءِ گدار دنیا ءَ گیشتریں زباناں رجانک ءُ وانگ بنت۔ آئی ءِ نامداریں گدار ”الکیمسٹ“ گیش بھا بوؤکیں کتابانی لڑ ءَ ھوار انت۔ آئی ءِ گدار ”یازدہ منٹ“ ءُ ”شیتان ءُ جنک“ اوں نامداریں کتابانی رم ءَ ھوار انت کہ بازیں زباناں رجانک بیتگ انت۔
پاؤلو ءِ گدار ”شیتان ءُ جنک“ نیکی ءُ بدی ءِ سر ءَ تران کنت کہ بنیاَدم وتی تہ ءَ شری ءُ بدی ءِ جنگ ءَ گلائیش انت، یک نیمگے آئی ءَ شیتانی تاگت وتی نیمگ ءَ چَک انت ءُ دومی نیمگ ءَ بنیاَدم وت ءَ شری ءِ نیمگ ءَ برگ ءِجھد ءَ انت، بلے اگاں تپاسگ بہ بیت، تنیگا انسان ءَ وت ءَ سرجم ءَ ردیانی پھریزگ ءَ سوبمندی نہ رس اتگ بلکیں داں دنیا ھست انت، انسان چہ ردیاں وت ءَ سرجم ءَ گستا کرت نہ کنت۔ پرچاکہ اے ردی انسان ءِ ابرم ءِ بھر انت کہ مدام آئی ءِ ھمراہ انت۔ بیت کنت باندا انسان چہ اے زمین ءِ سر ءَ سپر بہ کنت ءُ پہ وت ءَ دگہ نوکیں سیارھے ءَ جاہ ءُ مکامے در بہ گیج ایت۔ بلے کم کم ءَ ھمے سرکشی ھمود ءَ اوں بندات بنت پرچا کہ انسان ءِ روہ ھمے شری ءُ ردیانی نیام ءَ درنگ انت۔ پاؤلو ءَ ”شیتان ءُ جنک“ گدار ءَ ھمے انسان ءِ شری ءُ ردی ءَ گوں گِر ءُ چِلّی ءِ جنگ ءَ را جوانیں دابے ءَ پیش داشتگ کہ ناں انسان سرجم ءَ شر بوت کنت ءُ نیکہ بد ، بلکیں انسان ھمے شری ءُ بدی ءِ نیام ءَ ساہ کشگ ءَ لاچار انت۔ مرچی ما گند ایں کہ ھمک ملک ، پرد یا ٹولی یکے دومی ءِ دژمن جوڑ بوتگ ءُ انسان مرچی زمین ءِ سر ءَ چو دریا ءِ ماھیگ ءِ داب ءَ دومی بنیاَدم ءَ وران انت یا آئی ءِ ھک جنی ءَ گوں وت ءَ شرتریں زندے ءِ جھد ءَ گلائیش انت۔ بلے ھمے جنگ ءُ جیڑہ آئی ءِ شری ءُ ردیانی بنزہ آئی ءِ اندر ءَ انت۔ ”شیتان ءُ جنک“ ءِ دو بنکی کارست یکے دراَمد کارلوس انت کہ آ وسکوس ءَ ھمے واستا اتکگ کہ اود ءِ مردماں بدی ءِ نیمگ ءَ بہ بارت پرچاکہ اود ءِ مردماں وتی ھمک چیز گوں شری ءِ سر ءَ رد ءُ بند داتگ۔ بلکیں ھمے درامد ابرم ءِ ھما شیتانی تاگت انت کہ وتی ردی ءِ پارست ءَ اے منارینگ لوٹ ایت کہ انسان توری ھرچ داب ءَ شر ءُ نیک بہ بیت بلے ردی ءُ ھرابی آئی ءِ اندر ءَ الم ھست انت ۔ گدار ءِ بنکی کارست ”شانتل“ انت کہ یک کسانیں جنکے، آئی ءَ بیسہ انت کہ انسان باید اِنت، ردیں راھاں وت ءَ بہ پھریز ایت ءُ نیک ءُ تچک بہ بیت، بلے برے برے لالچ ءُ ردی ءِ شبین آئی ءِ مجگ ءَ اوں سر کش انت۔ شیتان کہ درامد ءِ دروشم ءَ وسکوس ءَ اتکگ، شانتل ءِ دل ءَ ترینگ لوٹ ایت بلے شانتل ءَ کہ نیک ءُ شریں چاگردے ءَ ردوم زرتگ، شیتان ءَ شریانی نیمگ ءَ آرگ لوٹ ایت۔ بلے ھمے شری ءُ بدی ءِ جنگ ءَ پادری کہ شری ءِ چیدگ انت، آ شیتان ءِ ھمراہ انت پرچاکہ شیتان ءِ راہ ءَ آ آسراتی کہ رس انت، ایدگہ کشکاں نیست انت۔ بلکیں دنیا ءَ بازیں نیکراھی مردم دگر ءَ نیکی ءِ سوج ءَ دے انت بلے آ وت شیتان ءِ ھمراہ انت۔ ھمے وسکوس چاگرد ءِ دراھیں مردم کہ وت ءَ نیک گش انت شیتان کارلوس آیاں رد دنت ءُ بدی ءِ نیمگ ءَ کاریت۔ کارلوس ءِ گشگ انت کہ توری ھرچ وڑیں مردمے بہ بیت، درست یک انت ءُ درستانی تہ ءَ ردی ءُ بدی الم ھست انت۔ درست ردی ءِ نیمگ ءَ اتک کن انت۔ پمیشکا پہ انسان ءَ الم انت کہ چہ زانت ءُ زانشت ءَ ھمے نیکی ءُ بدی ءَ دربگیج ایت ءُ وت ءَ ھما مردمانی ھمراہ بہ کنت کہ آیاں شری ءِ کشکے گپتگ۔ اے گدار ءَ عبداللہ شوھاز ءَ بازیں جکانسری کش اتگ ءُ جوانیں دابے ءَ بلوچی ءَ رجانک کتگ۔ چد ءُ پیش عبداللہ شوھاز ءِ سے رجانکی کتاب چاپ ءُ شنگ بوتگ ، چہ آیاں البیئر کامیو ءِ ”مرگ ءِ وشی“، ءُ سندھی نبشتہ کار گوبند مالھی ءِ ”رام“ ءُ ”اردلیں شھزادگ“ کہ آنتون دی سینٹ ایگزیوپیری ءِ نامداریں گدار ھوار انت۔ عبداللہ شوھاز بلوچی زبان ءِ جوانیں رجانکارانی رم ءَ ھوار انت ءُ آئی ءِ رجانک کتگیں کتاب ”شیتان ءُ جنک“ الم شمارا دوست بیت ۔
No comments:
Post a Comment