لبزانک ءِ جوانی اش اِنت کہ ہر وھدے نوکیں ربیتے سر کشّیت آ کوہنیں تیل ءُ بندشاں پروشیت۔ ہمے نوکی ءَ بازیں مردمے جارارت نہ کنت۔ چو کہ منی پیرک ءَ یک رندے عطاشاد ءِ بابت ءَ نبشتگ اَت کہ عطاشاد جنّانی زبان ءَ شاعری کنت۔ بگندئے آ زمانگ ءَ بازیں مردمے ءِ ھیال ءُ لیکہ ہمے بوتگ، بلئے مروچی جاور چوش نہ اَنت۔ عطا درجَنگ بوہگ ءَ اِنت، آئی ءِ شاعری ہر روچ نگد ءِ نوکیں راہ ءُ رِپکانی شاھیم ءَ تورگ بوہگ ءَ اِنت۔
ہمے ڈول ءَ بلوچی لبزانک ءِ ھبر ءَ بہ کن ایں گڑا اے تک ءَ سید ہاشمی ءَ ہرجاہے کہ دیستگ ات اے ”تہر“ یا اے تب نہ گواہیت، ہما دمان ءَ نشت ءُ نبیسّگے بندات کت۔ چو کہ بلوچی سیاھگ ءِ راست نبیسگّ، نمدی نویسی، لبز بلد ءُ دگہ بازیں کارے۔۔۔ بلئے آ دور ءَ جیڑہ ردانک ءُ شعری تہرانی اَت، نوں جیڑہ لبزانکی تب ءُ میل، لیکہ ءُ تھیوریانی اِنت۔۔۔
مرچیگیں دور ءِ ھبر ءَ بہ کن ایں گڑا بلوچی ءِ وشّ بھتی اش اِنت کہ نوکیں ورنا لبزانک ءَ گوں سنگینی ءَ وان اَنت، دری زباناں پوہ ءُ سرپد اَنت ءُ دنیا ءِ ایندگہ لبزانکاں گوں بلوچی ءَ دیم پہ دیم کت کن اَنت ءُ درستاں چہ وش تریں ھبر اش اِنت کہ ”نوکیں نگد“ ءِ پیچ ءُ تاباں سرپد اَنت۔ بلئے بیا بہ چار ایں کہ مرچیگ ءَ چہ بیست یا سی سال ساری بلوچی لبزانک ءِ جاور چون بوتگ اَنت۔
اے ھبر ءَ ما چہ اے۔آر داد ءِ کتاب”رپتگیں موسمے ءِ چہر“ ءِ نَمدیاں کیاس کت کن ایں کہ زی ما کجا بوتگ ایں ءُ مرچی کجا اوشتاتگ ایں۔ داد ءِ اے کتاب کہ ہمے زوتّاں چاپ بوتگ، اے دو بہر ءَ اِنت۔ یکّ بہرے ءَ شہید صبا دشتیاری ءِ 18 نمدی انت ءُ داد ءِ صبا ءِ نمدیانی وسیلگ ءَ ہما دور ءِ لبزانکی چست ءُ ایر ءُ تب ءُ میل ءِ سر ءَ سرجمیں درے۔ دومی بہر ءَ 22 نمدی اَنت کہ داد ءَ را جتائیں لبزانکی سنگتاں نبشتگ اَنت۔ اے نمدی چو کہ جِندی اَنت، ہمے ھاتر ءَ اشانی تہا صبا ءِ نمدیانی ڈول ءَ گیشیں لبزانکی تران ءُ باوست ودی نہ بیت بلئے ہما دور ءِ مئیل ، بلوچی زبان، تاک ءُ ماہتاکانی جاورال ءُ لبزانکی گلّانی چست ءُ ایر کیاس کنگ بنت کہ چے ڈول ءُ چے رنگ ءَ بوتگ اَنت۔ اے نمدی کساس سی سال ءِ مدّت ءَ جتائیں وھداں نویسگ بوتگ اَنت۔
شہید صبا ءِ نِمدیاں چہ زانگ بیت کہ اگاں آئی ءَ لبزانکی مردمے ءَ را نمدی نویس اِتگ ہم ہود ءَ سرّا برّائیں ھبر نہ کتگ، بلکیں سنگینی ءَ گوں نوک بائندیں نبشتہ کاران ءَ سر ءُ سوج ہم کتگ۔ دومی ھبر صبا ءِ بابت ءَ اے پدّر بیت کہ آ وت گوں بلوچی لبزانک ءَ باز سنجیدہ بوتگ۔ چیاکہ ہر تاک ءُ ماہتاکے چاپ بوتگ آئی ءَ نہ تہنا ونتگ بلکیں یکّ یکّ ءَ درائیں نکان چار اِتگ ءُ تپّاس اِتگ انت۔ بلوچی ءَ ابید دنیا ءِ ایندگہ لبزانک ہم ہمے سنگینی ءَ گوں آئی ءَ ونتگ اَنت ءُ اے سما کتگ کہ مئے جیڑہ چے اَنت ءُ اے چون گیشوار کنگ بنت۔ صبا ءِ منّگ ہمیش انت بلوچی لبزانک ءَ اے ڈکّال ءِ سبب ”کل وقتی ادیب“ ءِ نہ بوہگ اَنت۔ چیاکہ لبزانک انچیں چیزے پرائی ءَ سنگینی پکار اِنت، جوانیں ساچشت مزنیں جہد ءُ جکانسری یے ءَ پد ساچگ بیت۔ برے برے اَنچو گُمان بیت کہ صبا نوکیں دور ءِ وانوک ءُ ورناہانی درگت ءَ پُر اُمیت اِنت کہ اے بگندئے انچیں راہ ءُ رھندے بہ ٹہین اَنت کہ مئے سینئریں لبزانت مجبور بہ بنت کہ وتی کار ءَ گوں سنگینی ءَ بہ کن اَنت یا وَ لبزانکی وت کُشی بہ کن اَنت۔
صبا ءِ نمدیاں چہ سما بیت کہ داد ءَ چہ آئی ءَ مزنیں اُمیتے داشتگ، بس داد ءِ یکّ ھبرے ءَ چہ نہ وشّ اِنت کہ آ اشتاپ کاری کنت۔ چو کہ وتی نمدی ءَ داد ءَ را نبشتہ کنت:
”ماہتاک بلوچی ءِ ایریل ۱۹۹۲ ءِ شمارہ ءَ ”ٹہیت گوں پھلوان ءَ چنگ“ منی دیما گوٛست۔ چد ءُ پیش ہم تئی مضموناں پہ ہوش ءُ دھیان وانان ءَ پیداکاں۔ نام ھدا نثر نبشتہ کنگ ءِ تئی تہا صلاحیت است، خاص شعری تنقید ءَ سرپد بوہگ ءِ ٹیلنٹ تئی تہا باز اِنت۔گوں تو ایوک یکّ دزبندی یے کنگ لوٹاں کہ یکّے وَ نبشتہ کنگ ءِ وھداں ”جذباتی“ مبو دومی ایش کہ ہر چیز ءِ تہا ”ری ایکٹ“ مکن پرچاکہ اے پیم ءَ صلاحیت فکر متاثر بیت ءُ انسان وت ءَ وت ”کنٹراڈیکٹ“ کنت۔ گڑا ”نظری “مضمون نبشتہ بہ کن۔ من ءَ امید انت کہ یک روچے کئیت تو بلوچی زبان ءُ ادب ءَ لہتے سنجیدہ ئیں چیزے دات کنئے۔ تئی صلاحیت گیشتر ”شارپ“ بنت۔“
چرے نِمدی ءَ ہمے پدّر بیت کہ صبا ءَ پہ داد ءَ مزنیں اوست ءُ اُمیتے داشتگ ءُ مدام استادے ءِ جہت ءَ آئی ءَ را سر ءُ سوج ہم کتگ۔ مروچی ہمے استاد نہ بوہگ ءِ سبب ءَ ما دروا سرّا برّا ایں ءُ وت نزان ایں کہ چے نبشتہ کنگ ءَ ایں۔ اشںی ءَ ابید آ چو ہم گشیت کہ پہ نبشتہ کنگ ءَ چے وانگی اِنت ءُ چون وانگی اِنت۔
منی نزّ ءَ اگاں کسے صبا ءِ ہمے نمدیاں بہ زوریت ءُ ہمیشانی تہا ہما لبزانکی جیڑہانی سر ءَ کہ ھبر بوتگ، آہاں زیکّ ءُ مرچیگ ءِ آدینک ءَ تپّاس اِت ءُ یک سرجمیں کتابے نبشتہ کت کنت۔
صبا ءِ نمدیاں اے ہم درا بیت کہ بلوچ ٹولی بازی ءِ وئیل ءَ انچو گوٛر جتگ انت کہ ہر یکّے دومیگ ءِ پادانی چکّگ ءَ مشکول اِنت۔ ہمے واست ءَ آ دلجم نہ انت کہ باریں بلوچی ءِ باندات چون بیت۔
صبا ءِ نمدیاں ابید ایندگہ گیشتریں نمدی سنگتانی نبشتگین انت۔ چریشاں اوں آ دور ءِ لبزانکی چست ءُ ایر سما کنگ بنت۔ چو کہ امبر سمین وتی نمدی ءَ نبشتہ کنت کہ ”زندمان“ وتی مردمانی نبشتانکاں چاپ کن اَنت۔ بزاں لبزانکی ٹولی مہکمیں رنگے ءَ است اَنت، ہمے ھال مروچی ہم است اِنت۔ یا رفیق حاجز ءِ نِمدی ءَ چہ زانگ بیت کہ ناصر آباد ءَ لبزانکی چست ءُ ایر ءُ کتاب ءَ گوں نزّیکی ہما وہد ءَ اوں گوں جوانی ءَ بوتگ۔
البت من ءَ صبا ءِ نمدیاں درستاں گیش متاثر کت، حاص آئی ءِ ہمے لیکہ کہ آ چہ روایتی رنگاں بلوچی ءَ درکنگ ءُ گوں نوکیں دور ءَ ہمگام کنگ لوٹیت۔ پدا اے کار چون بیت ءُ اشی ءِ راہ ءُ رِپک چے اَنت ایشاں اوں جوانی ءَ بلد اَت۔
”رپتگیں موسمے ءِ چہر“ ءِ وانگ ءَ بازیں تہل ءُ ترپشیں ھبرے دیما گوٛزیت، بلئے راستی، راستی انت۔ اے نِمدیانی وانگ پہ مرچیگیں دور ءِ نبشتہ کاراں اے ھاتر ءَ الّمی اِنت کہ آ وتی لبزانک ءِ زیکّ ءُ مرچیگ ءَ دیم پہ دیم کت بہ کنت ءُ وت سما بہ کنت کہ نوں چے کنگی اِنت؟؟
No comments:
Post a Comment