زندگی کا سفر

برے برے انچیں گوٛنڈیں چیز مردمءَ انچو وتی نیمگءَ کشّ اَنت کہ دمانےءَ گشئے زندگی ہمدءَ اوشتیت۔ چوکہ ڈولداریں پلّے، شوکیں جمبری کوکرے، کوہانی نیامءَ تچوکیں آپے گوں شیرکنیں توارءَ ، ڈولداریں سبزگیں ندارگے یا ھشکاوگیں ریگزارے، ماہ دروشمیں کاڈے یا شوکیں کتابے۔

پدا منءَ دو چیز سکّ دوست بیت۔ یکّے وَ مہگونگیں زالے بہ گنداں یا شرّیں کتابے تہ دل گشیت کہ شرّیں دمانےءَ زندءِ گاماں بداراں ءُ بس ہمیشیءَ بچاراں۔

ہمے ڈولیں کتابے " زندگی کا سفر " اِنت کہ سالم رحیم ءَ نبشتگءُ لہتیں روچ پیسر منی دیما گوٛست۔ بگندئے بلوچ ندکارءُ وانوکانی نزّءَ اے یک انچائیں کتابے بلئے من کہ وانگ بندات کت گڑا یکّیں نندگی جاہءَ سرجمیں کتاب ونتءُ نوں دم بالا آؤرت۔

زندگی کا سفر سالم رحیمءِ سرگوٛست اِنت کہ آئیءَ وتی گوٛستگیں روچانی یاتانی دروشمءَ نبشتہ کتگ۔ اے کتابءِ کلّیں در آئیءَ کروناءِ لاک ڈاؤنءِ وہدءَ نبشتگ اَنت وہدے دنیا چٹ اوشتاتگءُ پہ درءُ گوٛرءِ رؤگءُ کارءُ روزگارءَ سرکارءَ پابندی جتگ۔ اے روچانءَ سالمءَ پہ جْوانی کارمرز کتگءُ وتی فیس بکّ والءَ جتا جتائیں ونڈاں ہمے یاتے نبشتگ اَنت۔ پدا سنگتانی گشگءِ پدءَ درائیں بہرے یکجاہ کتگ اَنتءُ کتابی دروشمءَ دیما آؤرتگ اَنت۔ سالم فیس بکّ ہم منی سنگت اِنت بلئے کروناءِ وہدءَ چوکہ مئے گوٛرءَ نیٹ نہ بوتگ ہمے حاترءَ آئیءِ نبشتہ اوّلی رندءَ من کتابءِ دروشمءَ دیست اَنت۔ کتابءِ وانگءَ پد نوں من سما کت کہ سالم منی ہند بُلیدہءِ مردمےءُ چو منی ڈولءَ کالجءِ زہگاں وانینیتءُ وتی روچاں تیلانک دنت۔

اے کتاب گندگءَ وَ سرجمیءَ نبشتہ کارءِ گوٛستگیں روچانی یاتانی دپتر اِنت بلئے وانگءِ وہدءَ انچو سما بیت کہ یکّ حسّاسیں مردمےءِ جہتءَ نبشتہ کارءَ وتی چاگردءِ ہر جیڑہ مار اِتگءُ وتی یاتاں ہوار وتی چاگردی جیڑہانی سرءَ ہم وتی حیال درشانتگ اَنت۔

یکّءُ دو جاہ کتابءِ تہا انچیں اَتکگ کہ من اوشتاتگاں ءُ موبائل چہ منی دستءَ لرز اِتگءُ کپتگ۔ چوکہ یک جاہے نبشتہ اِنت:

"صبح بل جانے کے لئے میں نے موٹر سائیکل پیٹرول سے بھرلی اور گون (بستہ) اس پر رکھ دیا تاکہ تحائف کو امی جان تک پہنچایا جاسکے۔ خوش دامن کو کہہ دیا کہ من بلّ جارہا ہوں بل والی امّی سے ملنے، ہوسکتا ہے دوپہر کا کھانا وہیں کھاؤں اور شام کو واپس لوٹوں۔

 ایک آہ بھرتے ہوئے خوش دامن بولیں "بیٹا تم نے بہت دیر کردی، تمہاری بلّ والی ماں کے لختِ جگر کو ناشناس لوگوں نے لاپتہ کردیا ہے۔ ان کی جدائی میں وہ روتے روتے زندگی کی بازی ہرگئیں۔  والد تو پہلے اللہ کو پیارے ہوچکے تھے۔ بیٹیاں اپنے گھروں کی ہوگئی ہیں۔  اب اس گھر میں کوئی نہیں ہے۔"

اے ردانی وانگءَ گوں من گشئے ھشکءُ ھیران بوتاں۔ داں زنڈیں دمانےءَ پہ دیمترءِ وانگءَ دل زرت نہ کت۔ من زاناں اے ردانی نبشتہ کنگءِ وہدءَ نبشتہ کارءِ ھال چے بوتگ۔ چیاکہ اے جیڑہ تہنا یکّ مردمےءِ نہ اِنت۔ بلوچستانءَ ہزارانی کساسءَ چوشیں لوگ اَست انت کہ ہودءَ تہنا پیریں ماتے یا پتے پشت کپتگءُ بازیں جاہاں چہ گنجیں گریوگءُ زاریاں کماشاں اوں چرے دنیاءَ لڈّ اِتگ۔ ورنائیں بچّ بیگواہ بوتگءُ تا عمر واتر نہ بوتگ یا چنڈءُ چارکیں جون اِش اتکگ اَنت۔

 بلوچستانءَ تعلیمی ادارہانی ھال چے اِنت ، اے ہم کتابءِ تہا گندگ بیت۔ اشاں ابید پہ روزگارءِ شوہازءَ بلوچستانءِ وانندگیں ورنا چنچو جنجال اَنت اے جیڑہ ءِ سرءَ ہم پہ جْوانیءَ نبشتہ کارءَ نبشتہ کتگ کہ آ وت ہمے آسءَ  ستکگ۔  دومی روزگارءِ رسگءَ پد ہم پہ آرامءُ دل اِدءَ مردم کسّءَ ترہگ نئیل انت چیاکہ اِد واجہ دگر اَنتءُ ملک چو شمبوءِ شگنزءَ اَنت۔ چوکہ وتی تُمْپ کالجءِ دؤرءِ یکّ قصّہ یے سالمءَ نبشتہ کتگ کہ چوں ایف۔سی آہانی لاجءِ پشتءَ کشّگءِ رندءَ کپ اَنتءُ آہاں چوداں گلّینگ لوٹ اَنت۔

کتابءِ یک مزنیں بہرے بُلیدہ زامرانءِ جیڑہانی سرءَ اِنت۔ چوکہ سالم بنءُ بیھءَ ہمودءِ مردمےءُ ہودءَ کارءُ روزگارے ہم کتگ۔ بُلیدہ چوکہ بلائیں مدّتےءَ بْراتی جنگانی وڈالی بوتگ۔ ہمے حاترءَ ہودءَ تنیگتءَ ہچ وڑیں آسراتی نیست، بلئے لہتیں سال اِنت کہ وانگءِ نیمگءَ مردم گیشتر دلگوش اَنتءُ ورنا چہ بْرات کُشیءَ شزار بوتگ اَنت۔ بازیں چیزّے مٹّ بوتگءُ بازیں انگت ہما ڈول اِنت۔ ہما جنجال انگت است اَنت، نہ روڑ است، نہ بجلی، نہ نادراہجاہءُ نہ کہ نیٹءُ نیٹ ورکءِ آسراتی۔ باریں کدی سالمءِ دعا مستجا بہ بنتءُ بُلیدہ چو ایندگہ ہندءُ دمگاں دیمروی بہ کنت!

اے کتاب سرجمیءَ انچیں رنگےءَ نویسگ بوتگ کہ وانوکءَ سما بیت کہ آ گدارے وانگءَ اِنت۔ بائد اِنت دیمترءَ سالم وتی ندءَ مہ داریتءُ وتی یاتءُ مارشتاں پہ وانوکاں دیما بْیاریت۔ کتابءِ زبان اردو اِنت ، بلئے من گشاں بائد اِنت ہرکسءَ اے آجوئی بہ بیت کہ کجام زبانءَ آ جْوان تر نبشتہ کت کنت ہما زبانءَ نبشتہ بہ کنت۔ کسے کہ بلوچیءَ نبشتہ کت نہ کنت بائد اِنت کڈّن کنگ مہ بیت۔