”جنگ ءِ یاتگار ءِ چپّ ءُ چاگرد ءَ گلاب ءِ پلّ اَنت۔“
کسّہ چہ بندات ءَ پدّر بیت کہ جنگ ءِ پرشت ءُ پروش ءُ تباہی ءَ چہ گوٛستگیں ھندے ءَ چاگرد کنت۔ جنگ ءِ آسر کدی اوں جوان نہ بیت، جنگ ہرچیز ءَ پرشت ءُ پروش کنت، مردمانی کوہنگیں ذہنی، نفسیاتی ءُ جذباتی رویّہاں بدل کنت۔ جنگے کہ پہ ایمنی ءُ وتی سرڈگار ءِ پہازگ ءَ بیت وَ آئی ءِ آسر ءَ راجے کہ باج بارت، باج پہ آئی ءَ نوکیں زندے ءِ مستاگ بیت، بلئے ہمے جنگ کہ سیاسی زورگیری ءُ دومی راجانی ایرماد کنگ ءَ مِڑگ بہ بیت آئی ءِ آسر پہ ہر دو دیماں گاری اِنت۔
بیستمی کرن ءَ ہمے ڈولیں دو جہانی جنگاں سرجمیں دنیا پتار دات ءُ اے جنگانی آسر ءَ سان مندیں راج ہما ذہنی درد ءُ تورشتانی کہ آماچ بوت اَنت آہانی اثر داں روزگار ءِ مروچی وڑے نہ وڑے ءَ است اَنت۔ اے جنگاں دنیا ءِ جتائیں کُنڈاں مردمانی مزنیں کساسے کُشگ بیت، لہتیں چہ وتی مرزبوم ءَ درانڈیھ کنگ بیت ءُ لہتیں انچیں ذہنی نادرہیانی آماچ بیت کہ تاں زند پہ وت ءَ نیا اَنت۔ اے جنگانی آسر ءَ مرُتگیں مردم وتی راہ ءَ گِر اَنت ءُ رؤ اَنت بلئے ہما کہ چہ وتی سرڈگاراں درانڈیھ بنت یا بیگار کنگ ءُ مزّور کیمپاں کارگرگ بنت، چہ درستاں گیش ہمے جنجالانی دیمپان بنت۔ بقولِ سید ہاشمی ئیگ ءَ ”رینگڑ“ بنت۔ نہ زندی بنت ءُ نہ مُرت کن اَنت۔
ہمے ڈولیں کارستے ہیرٹا ملّر ءِ گِدار ”پاسپورٹ“ ءِ کارست ونڈسِچ اِنت کہ آ جنگ ءَ پد درانڈیھ اِنت۔ درانڈیھی ءَ آ ہمنچو ذہنی کشّ ءُ چیلّانی آماچ بیت کہ برے وتکشی ءِ بابت ءَ جیڑیت ءُ برے پہ گہگیری ءَ جاڑی بیت بلئے آئی ءِ دزرس ءَ ہچی نیست۔ دومی جہانی جنگ ءَ جرمنی ءُ آئی ءِ پلّہ مرز کہ پروش ور اَنت، جرمن سپاہیانی مزنیں بہرے روس ءَ پشت کپیت ءُ روس ءِ سرکار آہاں انچیں دابے ءَ بندیگ کنت کہ آ عمری زندی ہمود ءَ پشت کپنت ءُ وتی ملک ءَ واتر شت نہ کن اَنت۔ ہمے ڈولیں یک کہولے ءِ کسّہ ہیرٹا ملّر ءِ گدار پاسپورٹ اِنت۔ ”پاسپورٹ“ دومی جہانی جنگ ءِ تباہی ءُ جنگ ءَ پد درانڈیھ ئیں مردمانی وتی ملک ءَ واتری ءِ واہگ ءِ پژدر ءَ نبیسگ بوتگ۔ اے ناسٹیلجک گدارے ءُ گدار ءِ بنگپّ ہمے درانڈیھ ئیں کہول ءِ چاگرد ءَ چکرّیت۔
ہیرٹا ملّر لبزانک ءِ دنیا ءَ ہما وھدی نام کپیت کہ آئی ءَ را 2009 ءَ لبزانک ءِ پِڑ ءَ آئی ءِ ساچشتانی سبب ءَ نوبل داد دیئگ بیت۔ نوبل داد ءِ بابت ءَ بگندئے بازیں نگدکارے ءِ لیکہ ہمے بہ بیت کہ لبزانکی بودناکی چہ نوبل داد ءَ کیاس کنگ نہ بیت، بلئے ملّر ءِ کسّہانی وانگ ءَ پد وانوک وت ماریت کہ آ اے داد ءِ لائق اِنت۔ ملّر ءِ مستریں پجّار آئی ءِ ردانکانی شعری زبان اِنت۔ ردانک ءِ نویسگ ءِ وھد ءَ اوں آ انچو نبشتہ کنت کہ برے برے گُمان بیت کہ شعرے۔
”فرش کوٹی ءِ چاریں کُنڈانی رنگاں شودیت۔ دوئیں دریگ یکّے دومی ءِ تہا اوژناگ کن اَنت۔ دوئیں فرش دیوالاں دیمی نیمگ ءَ تیلانک دیئنت۔“
اے ڈولیں شعری زبانے اگاں بلوچی کسّہی لبزانک ءَ کارمرز بہ بیت گڑا وانوک درستاں ساری ہمے زبان ءِ سر ءَ گُلّاں گوات دیئنت کہ اے ردانکے نہ اِنت بلکیں شعری ردانکے۔ بلئے ہمے شعری درشان ملّر ءِ کسّہانی پجّار اِنت۔ آئی ءِ کارست تہنا مردم نہ اَنت، چاگرد ءِ ہرچی کہ کسّہ ءَ ہوار اِنت آ الّم یک چہرے یا چیدگے ءِ دروشم ءَ کسّہ ءِ بہرے۔ اسل ءَ ردانک ءَ چیدگ ءِ کارمرز کنگ ءِ رواج ہم چہ روس ءَ پیداک اِنت۔ نبشتہ کارے کہ چاگردی یا سیاسی بندشے ءِ سبب ءَ وتی ھبر ءَ تچک ءَ تچک کت مہ کنت گڑا پہ کسّہ ءِ بیان کنگ ءَ آ جتائیں چیدگ کارمرز کنت۔
چو کہ یک جاہے سروپ ءِ درچک وتی دپ ءَ پچّ جنت ءُ وتی جند ءِ براں وارت۔ اد ءَ اوں سروپ چیدگے۔ درچک پہ درانڈیھ ئیں مردمے ءَ سہارہ یے۔ پہ مسافرے ءَ ادارکی ہنکینے۔ درچک چو کہ گوں زمین ءِ بندوک اِنت ءُ آئی ءِ روتگ زمین اَنت ہمے ھاتر ءَ درچک پجّار ءِ چیدگ اوں بوت کنت، یا سبز ءُ بورّ ءُ بریں درچکے شادمانی ءِ چیدگ بوت کنت۔ پدا ہمے درچک کہ چرچ ءِ دیما اِنت ءُ وتی براں وت وارت، ماندارگ بیت۔ درچک ءِ ماندارگ کدی اوں نیکیں پالے نہ اِنت۔ بلئے ہمے درچک ءِ ستکگیں تاک پدا لوگانی پیژگاہاں شنگ ءُ شانگ بنت۔ مطلب درانڈیھہی ءَ ہر ڈولیں جیڑہ ءُ جنجالے بیت آ یکبرے درانڈیھ ئیں مردمانی سر ءَ کپیت، آ تُری سبزیں مانداشتگیں درچکے ءِ ستکگیں تاک بہ بنت۔
گدار ءِ چاگرد جنگ ءِ پژدر ءَ ٹراٹسکی ءِ زوراکیں ھکومتی ءِ دور اِنت کہ ہود ءَ فادری ءُ پولیس ہر دو ہمنچو زوراک اَنت کہ کسّ چہ آہانی دست دراجیاں رکّ اِت نہ کنت۔
ونڈسچ (گدار ءِ بنجاہی کارست) کہ یک ہارت ءِ کارجاہے ءَ کار ءَ اِنت برے پولیس ءِ سپاہی ءَ ہارتی گونی یے دنت ءُ برے میئر ءَ ہارت بارت ءُ دنت دانکہ آئی ءَ پاسپورٹ دیئگ بہ بیت ءُ آ وتی ملک (جرمنی)ءَ واتر شت بہ کنت۔ اے درد ءَ ہما مردم مار اِت کن اَنت کہ پہ زور دگہ دیارے درانڈیھ کنگ بوتگ اَنت۔ درانڈیھی ءِ مستریں جنجال اِش اِنت کہ درستاں پیسر تئی راجی پجّار ءَ پُلیت ءُ دومی وتی ملک ءَ رؤگ ءِ درائیں راہ ءُ در کہ بند بنت ءُ ہما ملک ءِ کہ باہوٹ ئے آئی ءِ گوٛر ءَ تئی ننگ ءُ زند پہازگ ءِ دلجمی مہ بیت گڑا اے ڈولیں مردمے کدی اوں ذہنی درگت ءَ سلامتیں مردمے بوت نہ کنت۔
ونڈسِچ وتی درائیں زوراں جنت بلئے پدا اوں آئی ءَ پاسپورٹ دیئگ نہ بیت۔ یک روچے کارجاہ ءِ شپ ءِ چوکیدار آئی ءَ گشیت کہ ہرکس ءَ اد ءَ پاسپورٹ رستگ آہاں وتی جن پولیس ءُ فادری ءِ گوٛر ءَ دیم داتگ اَنت۔ فادری ءُ پولیس ءِ سپاہی ءَ گوں وپت ءُ واب ءَ پد آہاں پاسپورٹ ءِ سَند رستگ۔ چوداں کہ آہاں سَند رستگ گڑا نوں پہ پاسپورٹ ءِ گِرگ ءَ شتگ اَنت۔ چوکیدار پہ ملنڈ گشیت کہ تئی جَن آہانی ہچّ ءِ کار ءَ نئیت کہ پیر اِنت، بلئے ترا شوکیں جنکّے است، ایملی۔
گڈسر ءَ اَنچو بیت۔ پہ سَند ءِ دیئگ ءِ ہُزر ءَ ایملی ءَ یکبرے فادری لوٹائہنیت ءُ آ گوں فادری ءَ وپت ءُ واب کنت ءُ پدا گوں پولیس ءِ سپاہی ءَ ، نوں آئی ءَ پاسپورٹ ءِ سَند دیئگ بیت۔
درانڈیھ ئیں مردم دومی ملک ءَ چینچو بے دزرس اَنت، اشی ءَ وانوک ہمے کسّہ ءَ سما کت کنت۔ ایملی ءِ پت ہمے تُرس ءَ چہ بازار ءَ درنئیت کہ مردم آئی ءَ گند اَنت ءُ گش اَنت نوں ہمیشی ءِ جنکّ ءِ باری اِنت، بزاں اے رندی فادری ءُ سپاہی ءَ گوں وپت ءُ واب کنگ ءِ باری ایملی ئیگ انت۔ بلئے پدا اوں پاسپورٹ ءِ گرگ ءِ بدل ءَ آ وتی جنکّ ءَ ہمے نہدریں فادری ءُ زوراکیں سپاہی ءِ گوٛر ءَ دیم دنت۔
کسّہ ءِ دگہ یک چیزے کہ گوں مئے چاگرد ءَ باز نزّیک اِنت آ بومّ ءِ بابت ءَ شرک ءُ پال انت۔ بومّ انچو کہ مئے گوٛر ءَ شومّی ءِ نشانی اِنت ءُ مئے مردمانی منّگ ہمیش اَنت کہ بومّ ءِ ساھگ ہر مردمے ءِ سر ءَ بہ کپیت یا بومّ ہر لوگے ءِ سر ءَ بہ نندیت ہود ءَ مردمے مریت۔ اے گدار ءَ اوں بومّ ءِ کارست ہمے ڈول ءَ پیشدارگ بوتگ۔ بلئے ہمے بومّ فارس ءَ دانائی ءِ چیدگ بوتگ۔ شرک ءُ پال ءُ کوہنگیں عقیدہانی سر ءَ مردم ءِ سِتک ہما وھدی مہکم بیت کہ آ بے وس بیت۔ اِد ءَ اوں انچو سما بیت کہ سرجمیں ھند ءِ نشتگیں مردم نادزرس اَنت۔ یا بگندئے بومّ چیدگے ءُ شومّی ءُ جیڑہ ءُ جنجالانی نشانی اِنت۔
کسّہ ءِ مدّت اینچو مزن نہ اِنت بلئے ہمے کسانیں چاگرد ءَ نبشتہ کار ءَ اے ھلک ءِ مردمانی ہما درد ءُ تورشت کہ بیان کتگ اَنت آ داں زمانگاں است اَنت ءُ آؤکیں وھد ءَ اوں دنیا ءِ کنڈے نہ کنڈے ءَ درانڈیھ ئیں مردمانی چادر ءَ بندوک بنت۔ کسّہ ءِ بنگپّ چوشیں بنگپّے نہ اِنت کہ آئی ءِ سر ءَ اوّلی رند اِنت ملّر ءَ نبشتہ کتگ، بلئے ملّر ءِ پجّار آئی ءِ شعری زبان ءُ بنی آدم ءِ مارشتانی بیان کنگ ءِ جتائیں داب اِنت۔ ہمے چیز ءَ اے کسّہ ءَ را فکشن ءِ سرٹلّ ءَ رسینگ۔
No comments:
Post a Comment