مہر خان واجو ءَ من ہما وھد ءَ چہ زاناں کہ چہ بلیدہ ءَ ما زھگانی تاک ”سئے ماہی نودربر“ ءَ چاپ کنگ ءَ اتاں ءُ من ہمے تاک ءِ شونکار اِتاں۔ اے 15-2014 ءِ زمانگ اِنت۔ آ وھدی چہ پسنی ءَ کہ زھگاں پہ ما وتی نبشتانک ءُ شعر دیم دات اَنت مہرخان ہمیشانی رم ءَ ھوار اَت۔ آئی ءَ چہ کسانی ءَ گوں زبان ءُ لبزانک ءَ ھبّناکی یے است ات۔
رندتر ءَ من دیست کہ مہرخان شعر پِر بندگ ءَ اِنت۔ پدا ہر وھدے کہ ما دوچار کپت ایں، ھبر چہ لبزانک ءَ بندات بوت ءُ چمیشی ءَ کٹّ اِت۔ برے برے آئی ءَ شعر اوں ونت بلئے چو باز کمّ بوتگ کہ ما دوچار کپتگ ایں ءُ آئی ءَ شعر ونتگ، البت مئے واھگ مدام ہمے بوتگ کہ چون کنگ بہ بیت کہ بلوچی ءِ وانوک گیش بہ بنت ءُ بلوچ وانوک ءَ وتی تب ءِ نکان بہ رسیت۔ ہمے درگت ءَ آئی ءَ اوں وتی جہد کت ءُ پہ زھگاں یک تاکے چاپ کت ئِے ، بلئے اے تاک اوں چو نودربر ءَ وھد ءِ مُجاں اندیم بوت۔ اسل ءَ بلوچی تاکانی چیر ترّگ ءُ گار بوہگ ءِ مستریں سوَب نہادی ءِ نہ بوہگ اِنت۔ نہادی کہ نہ بیت ، تاکے ءَ پہ چاپ کنگ ءَ زرّ مدام پنڈگ بہ لوٹیت گڑا تا دیراں وت ءَ را داشت نہ کنت۔
ھیر آ کوہنیں کسّہ اَنت بلئے مہر خان واجو ءِ لبزانکی سفر انگت برجاہ اِنت کہ مدام برجاہ بات۔ ہمے زوتّاں آئی ءِ کتاب ”جنگل مردم رکّین انت“ چاپ بوت ءُ من ءَ اتک ءُ رست۔ شعری کتابے ات ، من چہ لوگ ءَ رسگ ءَ پیسر راہ ءُ رواجی ونت ءُ ھلاس کت۔ اے مہرخان ءِاوّلی شعرانی دپتر اِنت ءُ چہ شعرانی وانگ ءَ سما بیت کہ کتاب ءَ ھواریں گیشتریں شعر نوک پر بستگین انت۔
شاعری ءِ ھبر کنگ ءَ پہ مزنیں ھید شنچی لوٹیت ءُ شعر ریس ءُ پرّیس کنگ لوٹ اَنت ءُ اے تک ءَ منی جند اوں نزور اِنت۔ البت یک ھبرے گشت کناں کہ مہر ءَ وتی کتاب ءِ چاپ کنگ ءَ اشتاپ کتگ، آئی ءَ انگت کمّو ودار کنگی اَت۔ چیا کہ ہمے اشتاپ کاری من وت اوں کتگ ءُ داں روزگار ءِ مرچی من پشومان آں کہ من وتی اوّلی کتاب چاپ مہ کتیں، بلئے ھیر آئی ءِ ساچشت انت ءُ آئی ءِ واھگ بوتگ کہ وانوک ءَ سر بہ بنت ، سربوتگ انت ءُ نوں بائد اِنت آئی ءَ دلبڈّی دیئگ بہ بیت دانکہ آ وتی سفر ءَ دیمتر ءَ برجاہ بہ داریت۔ کتاب ءَ بازیں لچّہ ءُ دستونکے ھوار اَنت ، بلئے منی نزّ ءَ مہر بندر ءَ دستونک ءِ مردمے ءُ دستونک جوان تر نبشتہ کت کنت۔ آئی ءِ گیشتریں شعراں تیاب دپی ھند، تیاب ءِ گالوار، لبز، ندارگ، بلوچستان ءِ جیڑہ ءُ بلوچ دمگ ءِ سرجمیں عکسے درا بیت۔ اشی ءَ ابید آئی ءِ شاعری آئی ءِ اندر ءِ موسم، درد ءُ تورشت، شکر ورنائی ءِ باہند ءُ دوستدار ءِ زیباہی ءَ گیشتر زیبا کتگ۔ شعر ہرکس نبشتہ کنت ءُ گیشتریں شعرانی بنگپّ ہم یکّین انت بلئے اے ازم ءِ کلات اِنت کہ آ ہرچی مہکم تر بیت ہمنچو دیراں وھد ءِ ھیرّوپانی دیما داشت کنت ءُ اگاں نیم سو ءُ نیم بُندگ بیت گڑا وھد ءِ شہمات آئی ءَ انچو مان بند اَنت کہ گڈّی ءَ تُمپ ءُ بانڈم ھم پشت نہ کپ انت۔ پمشکا ہرکس نبشتہ کنت آئی ءِ واھگ ہمیش اِنت کہ من لبزانک ءِ آزمان ءَ داں زمانگے بہ مان آں۔ اے نوں نبشتہ کار ءِ ازمی سنچ ءُ آئی ءِ جہد ءَ کار داریت کہ آ داں چنچو وھد ءَ وت ءَ را زندگ داشت کنت۔
من شعری درور اے ھاتر ءَ نہ دیاں کہ منی مول ءُ مراد شعرانی پرّیچگ نہ اِنت کہ آہانی تام ءَ بہ براں۔ ءُ اے مہر ءِ اوّلی گامگیج اِنت، منی نزّ ءَ آ سوبین بوتگ بلئے چو ھم نہ اِنت کہ وتی نزوریاں چیر بہ دنت ءُ پہ کسے ءِ سر ءُ سوج ءَ برانز بہ گیپت۔ چو کہ بازیں دستونکاں آئی ءَ وتی پیشرد ھیال نہ کتگ انت، اُمیت اِنت دیمتر ءَ اشانی ھیال ءَ گوٛر کنت ءُ ازم ءِ نازرکیاں سرپد بوہگ ءِ جہد کنت۔
گڈّسر ءَ بس یک شعرے:
جنّتیں مانشانی وشبوہاں
وپتگاں سرمچار پلّانی
کسے کہ مانشانی وشبو ءَ سما کت بہ کنت بزاں کہ آئی ءِ تہا ساچشتی سنچ است۔ بس اوپار لوٹیت ءُ ہمے نازرکی دربرگ لوٹیت۔ اُمیت ہمیش انت کہ مہر ءِ دومی کتاب ءَ دگہ موسمے گون بیت ءُ مارا چہ نوکتریں رنگے ءَ آشنا کنائین ایت۔
No comments:
Post a Comment