سرگوستی گدار یا سرگوستی تکنیک ءَ نبشتگیں کسّہانی وانگ مردم ءَ سکّ دوست بیت۔ اشی ءِ یک سوٛبے وَ اش انت کہ جاگہانی نام ءُ کارست راستیں بنت۔ مجبوری ءَ برے برے کارستانی نام مٹّ کنگ بنت، چیاکہ اے ڈول کنگ مہ بیت جنگے الّم پا کئیت۔ بلوچی ءَ سرگوستی گدار باز کمّ منی دیما گوٛستگ۔ یکّے وَ نذیر ناصر ءِ ”اگریچ“ انت ءُ دومی اے۔آر داد ءِ گدار ”شھواھگ“ اِنت کہ زند جاورالی گدارے ءُ سید ہاشمی ءِ زند ءِ سر ءَ نویسگ بوتگ۔ اشاں ابید دگہ بگندئے بہ بیت، بلئے منی چمّاں نہ گوٛستگ۔
البت بلوچی ءَ اے تکینک ءَ گوں بازیں گدار ءُ آزمانکے نویسگ بوتگ، بلئے سرگوٛستی تکنیک دگہ چیزے ءُ سرگوستی کسّہ دگہ چیزے۔
خیام ثنا بلوچ دمگ ءَ اردو ءِ نامی ئیں شاعرے ءُ گیشتریں مردم آئی ءَ شاعرے ءِ جہت ءَ زان اَنت۔ بلئے شاعری ءَ ابید آ جوانیں کسّہ نویسے ھم، بلئے چو کہ اردو ءَ نبشتہ کنت پمشکا بلوچی لبزانک ءَ گوں آئی ءِ سیادی اینچو مہکم نہ اِنت۔ اے گدار ”کہانی لکھی جا رہی یے“ ھم اردو ءَ انت ءُ اے سرگوستی گدارے۔
گدار ءِ بنجاہی کارست گلفام اِنت کہ آئی ءِ پت دگ ءِ ویلے ءَ مرتگ ءُ مات ئِے چمّاں کور اِنت۔ آئی ءِ پت نبشتہ کارے بوتگ ءُ نوں مرگ ءَ پد مات آئی ءِ نکاناں ونت نہ کنت گڑا گلفام مات ءِ کرّ ءَ پت ءِ رودپتر ءَ وانیت دانکہ آئی ءِ پروف ءِ ردی راست کنگبہ بنت ءُ کسّہ ہرجاگہ کہ برّگ ءُ مان دیئگ لوٹیت، آ ہمےکار ءَ کت بہ کن انت۔
گندگ ءَ وَ اے انچائیں مردمے ءِ کسّہ اِنت ، بلئے اسل ءَ اے مئے درسانی کسّہ اِنت۔مئے چاگرد ءِ کسّہ انت، چاگردی سلکاریانی کسّہ انت، وانندگیں پہ نامیں شرپ مندیں مردمانی کسّہ اِنت، گوٛستگیں دہک ءِ شال ءِ کسّہ اِنت۔۔۔۔ دروگ ءُ راست ءِ کسّہ انت۔۔ پدا کسّہ کہ راستے بہ بیت وَ کسّہ یے نہ بیت ءُ فکشن اگاں سرجم ءَ دروگے بہ بیت، گڑا فکشن ءَ در بیت۔۔۔ ہمے دروگ ءُ راست ءِ ھواری کسّہ اِنت ءُ ہمے خیام ءِ گدار ءِ کسّہ اِنت۔
کسّہ کار ءِکار تبلیغ کنگ نہ انت ءُ نہ کہ آئی ءَ را آئیڈیل کارست ساچگی اِنت، کسّہ ہما چاگرد ءَ گوں بندوک اِنت آئی ءِ کارست اوں ہمود ءِ بنت ءُ آئی ءِ ویل ءُ کارستانی تب ھم ہمود ءِ بیت۔ اے کسّہ ءِ کارست چو کہ شال اِنت ءُ شال اگاں ہرکس ءَ برہنگ ءَ دیستگآ زانت کہ اے شہر ءِ جان ءَ چنچو ٹپّ پِر۔۔ اے ہمے آزگیں ٹپّانی کسّہ انت کہ شال ءُ خیام ءِ کرستانی جان ءَ پِر اَنت ءُ انچو کوہڑگ انت کہ دست جنگ نہ سگّ اَنت۔
کسّہ ءِ جند کہ دیما رؤت ہود ڈائری تکینک ءَ روان کنت۔ ڈائری تکنیک ءَ ھم بازیں کسّہ یے نبشتہ بوتگ۔ چو کہ نامی ئیں کسّہ ”گنوکے ءِ رودپتر“ بلئے اد ءَ یک بچّے وتی کوریں مات ءِ دیما پت ءِ رودپتر ءَ وانگ ءَ اِنت ءُ ہما پت کہ آئی ءِ درائیں زند پہ شگالی گوٛستگءُ روچے گوں جنکے ءَ سر ءُ لینڈ بوتگ۔ نوں چکّ مات ءِ دیما اے ڈولیں گپّاں چون ونت کنت کہ من جنک ءَ گوں چو واس ءُ امباز کت یا وپت ءُ واب کت۔ اشی ءِ علاج نبشتہ کار ءَ اے درگیتکگ کہ آئی ءِ بدل ءَ برے برے ترو پہ مات ءَ ہمے رودپتر ءَوانیت ءُ لہتیں تاک گلفام تہنا وانیت۔ بزاں نبشتہ کار ءَ کسّہ ءِ ھیال ہر وڑءَ گوٛر اِنت ءُ آئی ءَ کسّہ ءِ مہارداشتگ۔
کسے بگندئے بہ گشیت کہ اتے تہنا یک مردے ءِ عیاشی ءِ کسّہ انت بلئے چو نہ انت۔ اے شہرے ءِ کسّہ اِنت، کہ اےشہر کسانیں مدّتے ءَ چنچو پرشت ءُ پروش گندیت، اد ءَ چنچو زبان ءُ مذہب ءِ سوٛب ءَ کست ءُ کینگ است، اد ءَ ہمے مردم کہ سر زاھر ءَ ساپ ءُ سلّہ انت چہ تہا چنچوسیاہ ترّ اِتگ انت ءُ گھ اِتگ انت۔
پدا خیام ءِ دگہ جوانی یے اش انت کہ آئی ءَ کسّہ ہچ جاگہ چو آسر نہ کتگ کہ وانوک ءِ تنّ بہ پرشیت۔ ہرجاگہ وانوک ءَ ھیران کنت ءُ یلہ کنت ، البت لہتیں جاگہ ءُ لہتیں کارست انچین انت کہ سکّ پدّر اَنت، اے نزوری بائد اِنت زندگیں مردمے ءِ سرگوٛستی گدار ءَ مان مہ بوتین انت۔
ندارگ کشّی ءُ مارشتانی در انگازی ءَ نبشتہ کار ءَ کمال کتگ۔ کسّہ ترا گوں وت انچو ھمبراہ کنت کہ من یکیں نشت ءَ 140 تاکدیم ونت ءُ نوں سما کت۔ ہمے جاہ ءَ کہ آئی ءِ دشتار گیس ءِ تراک ءِ سوٛب ءَ وتی لوگ ءَ سچیت ءُ مریت۔ اے ندارگ گوں من وانگ نہ بوت۔ پدا کسّہ کار ءَ نہ تہنا مہر ءِ کسّہ آؤرتگ انت بلکیں کسانیں زھگے ءَ بہ گر داں نیم عمریں مردماں ہر یکّے ءِ کارست ساچی پہ جوانی کتگ ئِے۔ آئی ءَ نہ لس مردمان ءَ بکش اِتگ ءُ نہ کہ ملّا ءُ میاہان ءَ۔۔۔ چوکہ ثانیہ وتی کسانیں بچکّ ءِ شلوار ءَ کہ آئی ءَ را پیش داریت کہ مدرسہ ءَ وانگ ءَ بوتگ ءُ نوں بچک ءِ شلوار ھون ءَ مین اِنت ءُ کسانیں زردیں ٹکّے پِر انت ئِے۔۔۔ اے ڈولیں کسّہ مئے گوٛر ءَ سکّ باز اِنت کہ انگت نویسگ نہ بوتگ انت۔
کسّہ سرجمی ءَ جوان ات البت خیام ءَ بندات ءَ لہتیں چیز گیش کتگ۔ چو کہ گلفام ءِ نام ءِ بابت ءَ لہتیں ھبر یا دگہ ہمے ڈولیں کسانیں چیز بلئے سرجمی ءَ اے شوکیں سرگوٛستی گدارے۔۔۔۔ ءُ اے گپّ ءَ من اےواست ءَ نہ کناں کہ خیام منی سنگت اِنت بلکیں آئی ءِ ساچشت وت گپّ کنت۔
No comments:
Post a Comment