ما چیٹ جی۔پی۔ٹی ءَ پہ بلوچی ءِ ھیل دیئگ ءَ چوں وتی ونڈ ءِ کار ءَ کت کن ایں؟
وھدے ما چیٹ جی۔پی۔ٹی ءِ ھبر ءَ کن ایں کہ آ مئے زبان ءِ ھبراں سرپد نہ بیت یا مئے زبان ءَ پرومپٹ نہ زوریت گڑا جیڑہ چے انت؟ وھدے گوگل ٹرانسلیٹر ءَ بلوچی است انت ءُ گوستگیں پوسٹ من وت درورے ھم داتگ ات کہ ھود ءَ تو بلوچی نبشتہ یے دئے گوگل آئی ءَ ایندگہ زباناں رجانک کت کنت۔ بلوچی چیٹ جی۔پی۔ٹی ءَ کہ بلوچی ءَ جست گرئے یا کجام ھم اے۔آئی ٹولے ءَ تو پہ کارے ءَ پرمان کن ئے ءُ پرومپٹ دئے آ تئی ھبر ءَ سرپد نہ بیت۔ پریشی ءَ یکبرے ترا وتی ھبر رؤگی انت گوگل ٹرانسلیٹر ءَ دگہ زبانے ءَ رجانک کنگی انت، (انچیں زبانے کہ آئی ءَ اے۔آئی ءِ ٹولز سرپد بہ بنت) پدا ھمے رجانک کتگیں نبشتہ نوں ترا چیٹ جی۔پی۔ٹی ءَ مان کنگی انے گڑا آ تئی ھبر ءَ سرپد بیت۔ بلئے اے گرانیں کارے ءُ اینچو رجانک ءَ ھما ھبر کہ تو کنگ لوٹ ئے بگندئے آ وڑ ءَ شرّی ءَ مہ گیشّیت۔ چیا کہ گوگل رجانک وت انچیں چیزے کہ آ لبزانی لبزی معنا ءَ زوریت ءُ باز رند ءَ دگہ لبزے ءِ دگہ معنا یے دنت۔
چو کہ یک روچے سنگتے ءَ خوشحال خان خٹک ءِ پشتو شعرے داتگ ءُ جہل ءَ نبشتگ ات ”خوشحال بابا“ من ھمے شعر کہ انگریزی ءَ چہ فیس بک ءَ رجانک کت، خوشحال بابا ءِ جاگہ ءَ رجانک ات، “Happy father”۔ اگاں بہ چارئے اِد ءَ گوگل ٹرانسلیٹر ءِ ردی نہ انت،لبزانی رد ءَ آئی ءِ رجانک وتی جاگہ ءَ شرّ اِنت بلئے ھما نام ءِ جند کہ است اِنت آ نہ منتگ۔ گوگل ٹرانسلیٹر ءِ جیڑہ ھمیش انت، پمشکا اشی ءِ سر ءَ باز بیسہ کنگ نہ بیت۔
نوں ھبر اش اِنت کہ ما چون بہ کن ایں کہ ھرکس وتی وس ءُ واک ءَ اے۔آئی ءِ ٹولاں بلوچی زبان ءِ سرپد کنگ ءَ وتی ونڈ ءِ کار ءَ کت بہ کنت۔ پریشی ءَ اے گامگیجاں ما ذاتی دروشم ءَزرت کن ایں۔
*ڈیٹا جوڑ کنگ: درساں پیسر مارا بلوچی ءِ بازیں نکانے نبشتہی دروشم ءَ یکجاہ کنگی انت ءُ پدا انگریزی ءَ چیٹ جی۔پی۔ٹی ءَ را ھمے سرپد کنگی انت۔ چریشی ءَ چیٹ جی۔پی۔ٹی یا ایندگہ اے۔آئی ٹولاں تو در آؤرت کنئے۔
*بلوچی شاعری، ردانک، جتائیں بنگپّانی سر ءَ نبشتگیں ردانک، ھال ءُ ایندگہ ھما لبز کہ ھر روچیں زند ءَ مئے چاگرد ءَ کارمرز بنت۔ ھمیشانی نبیسگ ءُ گوں رجانک ءَ یک ٹولے ءَ را سرپد کنگ۔
*ھما نکان کہ چہ دگہ زباناں بلوچی ءَ رجانک بوتگ انت، آھاں ھوار کنگ۔
*بلوچی ءَ جست ءُ پرسانی یک مزنیں درچے بندات کنگی اِنت دانکہ ھمے ماڈل پدا ھمے ڈولیں جستاں سرپد بہ بیت ءُ آھانی پسّواں بلوچی ءَ داتبہ کنت۔
*ڈومین اسپیس ءِ جوڑ کنگ ءُ بلوچی ءَ زند ءِ درائیں تک ءُ پہنات، چو کہ ربیدگ، جغرافیہ، نیکراہ ءُ ایندگہ چیزانی سر ءَ نکان ءِ نویسگ ءُ ھوار گیجگ دانکہ ماڈل اے درسیں چیزانی بابت ءَ سرپد بہ بیت ءُ اشانی درگت ءَ جستانی پسّواں دات بہ کنت۔
*زبان زانتی ءِ تک ءَ کار کنگ۔ بلوچی زبان ءِ بن رھبند ءُ ساخت ءِ سر ءَ نکان دیما آرگ دانکہ ماڈل بلوچی زبان ءِ ساخت Syntax ءُ معنا Semantics ءَ سرپد بہ بیت۔ زبان ءِجتائیں پہنات، لبزانی بزانت، ساخت ءُ بن رھبند ءَ سرپد بیت۔ اے رد ءَ بلوچی انگریزی لبز بلد کہ ایپے ءِ دروشم ءَ بیت آ وت ھم باز کمک کت کنت۔ چریشی ءَ ماڈل بلوچی ءِ گالرد، گالبند ءُ لبزیاتاں سرپد بیت۔ پدا گڑا چو نہ بیت کہ ماڈل ”جمعہ گل“ ءَ friday flower“ سرپد بہ بیت ءُ گالردانی دیما سیاہ بہ کنت۔
*ڈیٹا ٹریننگ:
اے درسیں نکان کہ تیار بنت پدا ماڈل ءِ ٹریننگ ءُ چکّاسگ ءِ باری کئیت۔ اے نکاناں نہ تہنا یک مردمے نبشتہ کت کنت ءُ نہ کہ یک ادارہ یے۔ انچو کہ من پیسر ءَ گشتگ ات مارا درساں وتی ونڈ ھوار کنگی انت۔ نوں نکان کہ بنت تو اشاں چیٹ جی۔پی۔ٹی یا دگہ ماڈلے ءِ درارگ ءَ پہ کارمرز کت کنئے۔ اے کار اے ڈول ءَ کنگ بیت۔
اوّلی رھبند supervised learning اِنت کہ مردمانی رجانک کتگیں گالرداں تو ماڈل ءَ سرپد کنئے۔ دومی رھبند Unsupervised learning اِنت کہ ماڈل ءَ تو نکاناں گوں رجانک ءَ ھوار کنئے ءُ آ وت زوران کنت ءُ وت ھیل کنان کنت۔ دومی پجّارتگیں زبان ءِ ھساب ءَ بلوچی ءِ نکاناں دربارت۔
*نیچرل لینگویج پروسیسنگ NLP دیمتری گامگیج اِنت کہ آئی ءِ بابت ءَ ما پیسری پوسٹ ءَ ھبر کتگ ات کہ اے چی یے ءُ ضیاء بلوچ ءَ اشی ءِ سر ءَ سرجمی ءَ تران ھم کت۔
اشاں پد دیمتری گامگیج ڈیٹا ءَ وھد وھد ءِ سر ءَ نوکاز کنگ ءُ نوکیں چیزانی ھوار گیجگ ھم الّمی اِنت۔ چیا کہ ھرچی نوکیں چیزے کئیت دانکہ ماڈل ھمائی ءَ تئی زبان ءَ سرپد مہ بیت آ ھما گالبند یا لبز ءِ بابت ءَ تئی جست ءِ پسّو ءَ دات نہ کنت۔
اے ھما کار اَنت کہ فردی دروشم ءَ ما اے کار ءِ بہر بوت کن ایں۔ اگاں ھمے کار بنگیج کنگ بہ بیت ءُ ھرکس وتی وس ءُ واک ءَ ڈیٹا جوڑ بہ کنت۔ پدا ھمے داتگیں رھبند ءِ ھساب ءَ ماڈلے ءَ ھوار کنگ ءُ چکّاسگ بہ بنت گڑا چیٹ جی۔پی۔ٹی ءَ ھوار درائیں اے۔آئی ٹول مئے زبان ءَ سرپد بوت کن انت ءُ اے ڈول ءَ بلوچی انچیں زبانے بوت کنت کہ دنیا ءِ ھر کنڈ ءَ نشتگیں بلوچے اے۔آئی ءِ ٹولاں چہ ھر ڈولیں کارے گرگ لوٹیت وتی زبان ءَ گپت کن ئِے۔
یا اے ڈول ھم بوت کنت کہ بلوچی ءِ ادارہاں انچیں زرّے بہ رسیت کہ آ لہتیں کمپوٹر ءِ بلدیں مردم ءُ ڈیٹا سائنسداناں پگار دات ءُ کار گپت بہ کن انت دانکہ ھمے مردم بلوچی ءِ نکاناں یک ماڈلے ءَ ھوار کت ءُ آئی ءَ ھیل دات بہ کن انت گڑا کار باز ارزانی ءَ ءُ گوں ٹیکنیکلی بوت کنت۔ بلئے مئے ادارہاں اینکاسیں بجٹے نیست کہ چوشیں بلائیں کارے یکپارگی ءَ کت بہ کن اَنت، پمشکا بلوچی ءِ ھرچی کہ نبشتہ کار ءُ کمپیوٹر ءَ بلدیں مردم انت تہنا ھمے وتی کچّ ءَ کار بہ کن اَنت۔ مئے اے واب پورا بیت ءُ بلوچی ھم ھما زبانانی رم ءَ ھوار بیت کہ آئی ءَ اے۔آئی ءِ ھر ڈولیں ٹول سرپد بوت کن انت۔
No comments:
Post a Comment