لبزانکی ادارہ ءُ گلّانی سر ءَ اشی ءِ سان چے بوت کن انت؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بلوچستان ءِ ھرچی کہ ھندی زبانانی لبزانکی گلّ ءُ ادارہ انت، ھمیشانی درگت ءَ بلوچستان ءِ سرکار ءَ چہ کابینہ ءَ یک بلّے منّارینتگ کہ اے بلّ ءَ را ” بلوچستان ریجنل لینگویجز، اکیڈمیز اینڈ لٹریری سوسائٹیز بلّ 2025“ ءِ نام دیئگ بوتگ۔ اے بلّ ءِ رد ءَ ھما ادارہ کہ چہ کلچر ڈیپارٹمنٹ ءُ ایجوکیشن ڈیپارٹمنٹ ءَ گرانٹ گرگ ءَ انت، ھمے ادارھانی یک ھواریں بورڈے جوڑ کنگ بیت ءُ اے ادارہ سرکار ءِ چیردستی ءَ کار کن انت۔ ھمے بورڈ ءِ کماش ایجوکیشن ڈیپارٹمنٹ ءِ وزیر بیت ءُ ایندگہ اگدہ دار درست بیوروکریٹ بنت۔ لبزانکی ادارھانی کماش تھنا اے کمیٹی ءِ باسک بنت۔
پدا ھمے ادارہ ھر ڈولیں کارے کہ کنگ لوٹ انت آھاں چہ ھمے کمیٹی ءَ اجازت گرگ لوٹیت۔ اے ادارھانی مالی گر ءُ دار ھم سرجم ءَ ھمے کمیٹی ءِ دست ءَ بیت۔ بزاں ادارھانی وت واکی سرجمی ءَ ھلاس کنگ بیت۔ نہ آھانی جند ءِ راہ ءُ رھبند منّگ بنت ءُ نہ اے ھبر گیشّ اِتگ کہ ادارھانی باسک چونین بنت ءُ آھانی گچین کاری کجام ھساب ءَ بنت ءُ ھر ادارہ وتی کابینہ ءَ چون جوڑ کنت ءُ کماش ءَ چے ھساب ءَ گچین کنت۔ پدا ادارھانی درائیں کاردار سرکاری ملازمانی ھساب ءَ دارگ بنت۔ اے ڈول ءَ یک ھسابے ءَ سرجمیں لبزانکی ادارہ سرکاری بنت ءُ پہ ھرکار ءَ سرکار ءِ چمدار بنت۔
نوں مئے بازیں سنگتے ھمے سرپد بیت کہ اے جیڑہ تھنا گرانٹ ئیگ انت ءُ اشی ءِ سان تھنا ھما ادارھانی سر ءَ کپ انت کہ آ چہ سرکار ءَ گرانٹ گرگ ءَ انت۔ چیا کہ گیشتریں نبشتہ کار ءُ ھاس بلوچی ءِ نبشتہ کار ھمے گش انت کہ اے ادارھانی مردم نشتگ انت ھمے زرّاں ورگ ءَ اَنت ءُ کار ھچ نہ کن انت۔ چوناھا ھچ ادارہ پھک ءُ پلگار نہ انت، نزوری ھر ادارہ ءَ بنت، بلئے اشی ءِ مول ءُ مراد اے نہ انت کہ ما وتی ادارھاں تھنا یلہ بہ کن ایں ءُ پہ ھمے ھبر ءَ شاتکامی بہ کن ایں کہ سرکار ءَ مئے ادارہ پُشت ءَ کشّ اِتگ انت۔ اگاں ھمے ادارہ ھر ڈولیں کارے کنگ ءَ انت، بلئے کنگ ءَ انت ءُ اے کار زبان ءَ داں ھدّے ءَ نپ اوں دیئگ ءَ انت۔ پہ درور مزنیں پروجیکٹاں کسانیں گلّ نہ بندات کت کن انت ءُ نہ آھاں سرجم کت کن انت دانکہ آھانی گوٛر ءَمزنیں بجٹے مہ بیت۔ چار کتاب وَ بگندئے ھر ادارہ چاپ کنت ءُ چار مردم یکجاہ کت کنت، بلئے اشی ءِ متلب اے نہ انت کہ ما وتی ادارھاں کربان بہ کن ایں۔
چرے بلّ ءَ اوّلی تاوان کہ ادارھاں بیت آھانی وت واکی ءِ ھلاس بوھگ انت۔ ھما ادارہ کہ وتی دستور ءِ رد ءَ کار ءَ انت ءُ مالی رِد ءَ وت واک انت، آ سرکاری ادارہ یے ءِ جھت ءَ کار کن انت۔
دومی ھر نکانے کہ چاپ بیت آئی ءَ یکبرے ھمے بورڈ چاریت ءُ وھدے نکان سرکار ءِ پالیسیانی رِد ءَ بیت نوں آئی ءِ چاپ ءُ شنگ ءِ اجازت رسیت۔ ادارہ ھر ڈولیں مراگشے کنگ لوٹ انت، آ ھم یک ھسابے ءَ کمیٹی ءِ منّگ ءَ پد بیت۔
بزاں کمیٹی ھمے ادارھاں ھرچی کہ گشیت آھاں کنگی انت۔ ھر ڈولیں مراگش ءُ پروگرامے پرمائیت آ اوں کنگی انت۔ چریشی ءَ ادارھانی وت واکی ءُ آجوئی ھلاس بیت۔
سرجمی ءَ اگاں بہ چار ایں اے بلّ ءِ مول ءُ مراد تھنا ھمیش انت۔ پدا اگاں اے کمیٹی پہ دل ھندی زبانانی دیمروی ءِ واست ءَ جوڑ کنگ بوتیں وَ نیکیں ھالے ات۔ چو کہ سندھ ءَ ”سندھی لیگویجز اتھارٹی“ یا پاکستان ءِ ایندگہ جاھاں، ”اردو سائنس بورڈ“ ءُ دگہ بازیں ادارہ است انت۔ آ سرکار ءَ وت جوڑ کتگ انت ءُ آھانی کار زبان ءُ لبزانک ءِ دیمروی انت۔ بلئے اد ءَ چو نہ انت۔ یکّے وَ اے ادارہ مئے مردماں وت جوڑ کتگ انت ءُ دومی مئے کرّ ءَ انچیں مردم اوں است کہ یکّیں وھد ءَ دو دو رجسٹرڈ ادارہ ءِ کماش انت، سرکار ءَ چہ گرانٹ ھم گر اَنت، بلئے کار ھچ پہ ھچ۔ اے کمیٹی ءِ جوڑ بوھگ ءَ پد تھنا ھمے ڈولیں ادارہ پشت کپ انت ءُ آدگہ بہ نند اَنت مکسک بہ جن انت۔
دیمتر ءَ بگندئے چو ھم بیت کہ اے ابید ءِ رجسٹریں ادارھاں ایندگراں کار ءَ مئیل انت ءُ رجسٹری ءَ پد ادارہ کجام ھال ءَ بنت آئی ءَ ما درست سرپد ایں۔
نوں مئے دست ءَ اگاں دگہ زھمے جنگ نہ بیت ما کم ءَ کم ھمے بلّ ءَ ایر وَ بہ جن ایں۔ چو مہ بیت براتانی کست ءَ ما ھمنچو بے سدّ بہ بئیں کہ دژمن ءِ پندلاں سرپد بوت مہ کن ایں ءُ وت ءَ تاوان بار بہ کن ایں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شوھاز
No comments:
Post a Comment