ریمنڈ ڈیوس ءِ سرگوٛست

 

ریمنڈ ڈیوس ءِ سرگوٛست

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

برے برے انچیں کتاباں گوں سر کپیت کہ آھاں نہ گوں مئے زند ءَ سیادی یے است ءُ نہ گوں مئے چاگرد ءَ، بلئے پدا اوں دل پہ وانگ ءَ اومان کنت۔ اسل ءَ وانوک ھر کتاب ءِ وانگ ءَ پد کیاس کت کنت کہ اے کتاب وانگی انت یا نہءُ داں مزنیں اُمرے ءَ مردم برے یک دیمے سر جنت ءُ انچیں کتاب وانیت کہ رند ءَ آئی ءَ سما بیت من زند ءِ مزنیں بھرے بے سر ءُ پادیں چیزانی وانگ ءَ زیان کتگ۔ 

انچو یک رندے من شال ءَ جناح روڈ  ءَ تڑہ ءِ سر ءَ کتابے زرت کہ نامے ”ع سے عشق“ ات۔ آ وھدی مارا اوں ھمے اِشک ءِ نادراہی ءَ گوٛر جتگ ات، پمشکا چوشیں ھرکتابے دپ ءَ کپتیں ما ھما دمان ءَ زرت ءُ ونت۔ بلئے اے کتاب کہ من پنجاہ کلدار ءَ زُرتگ ات، وانگ ءَ پد دل ءَ گشت دریگتیں ھمے زرّاں من کوپے چاہ بہ وارتیں بلئے اے کتاب مہ زُرتیں۔ تنیگت ءَ اوں اے ڈولیں بے سریں کتاب بے کساس چاپ بیت ءُ نھادی ءَ ھرجاہ دست کپ انت کہ آھانی وانگ ءَ پد مردم دستاں سر ءَ کنت ءُ نندیت۔ وانگ ءِ سند ھرچی کہ گیشتر بیت، نوں مردم کتابانی گچین ءَ کمّے ھژّار بیت، دانکہ ھما وھد ءَ کہ آ پہ وانگ ءَ کشّیت، ھما وھد زوال مہ بیت۔

اے کتاب ”کرائے کا فوجی“ من چوش گشت نہ کناں کہ بے دریں کتابے، بلئے ھئو اشی ءَ تچک ءَ گوں ما ھاسیں سیادی نیست۔ البت پاکستان ءِ سیاستدان، اِد ءِ فوج ءُ ایندگہ ادارھانی رؤشت ءُ کارپدانی بابت ءَ اگاں کسے زانگ لوٹیت ،آئی ءَ بازیں سرپدی یے رسیت۔

اے ریمنڈ ڈیوس ءِ سرگوٛست انت کہ اے ملک ءَ بندیگی ءِ وھد ءَ آ کجام جنجالانی آماچ بوتگ ءُ پدا چونی ءَ چداں رکّ اِتگ ءُ واتر شتگ۔

ریمنڈ بندر ءَ امریکی یے بیت کہ آ فوجی کنٹریکٹرے ءِ جھت ءَ کار کنت۔ دنیا ءِ جتائیں ملکاں رؤت ءُ ھود ءَ امریکی سپاھی ءُ ایندگہ اپسرانی پانگپائیءَ کنت۔  نوک نوک کہ لاھور ءَ کئیت، گڑا ھمد ءَ یک روچے دو مردم آئی ءِ سر ءَ پستول کشّ اَنت۔ ریمنڈ ھمے مردماں کُشیت ءُ ھمیشانی کوش ءِ ڈوہ ءَ گرگ ءُ بندی کنگ بیت۔ امریکہ ءِ سرکار وس کنت کہ آئی ءَ زوتّاں زوتّ چہ پاکستان ءِ بندی جاہ ءَ بہ کشّیت، بلئے پاکستان اوں آئی ءَ ارزانی ءَ یلہ نہ کنت۔ گڈّسر ءَ ملک ءِ چیریں ادارہ گوں امریکہ ءِ سرکار ءَ شئور کن انت، مرتگینانی کھولاں ھون بھا دیئنت ءُ ریمنڈ ءَ چہ پاکستان ءَ کشّ اَنت۔

بلئے چرے کتاب ءَ لھتیں چیز پدّر بیت۔ یکّے وَ پاکستان ءِ چاگردی رسانکدر ءِ کِرد کہ آئی ءِ کار مدام دروگ بندگ ءُ دروگیں ھالانی شنگ کنگ انت۔ دومی اے ملک ءِ سیاستدانانی بے وسی کہ آ گندگ ءَ وَ ملک ءِ ھاکم انت، بلئے ملک ءِ درائیں واک ءُ اکتیار اسل ءَ چیریں ادارگانی دست ءَ انت، آ ھرچی بہ لوٹ انت کت کن انت۔ پہ درور ھچ راہ ءُ در کہ پشت نہ کپیت گڑا آ ریمنڈ ءِ کیس ءِ سرکاری وکیل ءَ مٹّین انت۔ کیس ءَ چہ سیشن کورٹ ءَ قاضی کورٹ ءَ بر اَنت ءُ مرتگینانی کھولاں پہ زور گر اَنت ءُ ھون بھا ءِ واست ءَ رازی کن انت۔ اے وڑ ءَ کیس ھلاس بیت ءُ ریمنڈ یلہ بیت۔

اشاں ابید امریکہ ءِ سرکار ءِ گوں وتی مردماں نزّیکی ءُ آھانی ھیالداری اوں جوان کیاس کنگ بیت۔ ریمنڈ یک انچائیں نوکرے کہ اِد ءَ پاکستان ءَ کار ءَ اِنت ءُ ھمد ءَ  گرگ بیت۔ بلئے آئی ءِ ملک اے جیڑہ ءَ انچو گوں سنگینی ءَ زوریت کہ ھمے ھبر داں صدر ءَ رؤت ءُ سر بیت ءُ ملک ءِ درائیں ادارہ ریمنڈ ءِ بندی جاہ ءَ چہ کشّگءِ تچ ءُ تاگ ءَ بنت۔ آھانی گوٛر ءَ وتی شھریانی بستار ھمنچو باز اِنت کہ پہ یک مردمے ءِ بندیگی ءَ سرجمیں ملک جکسیت۔

ھمے نیام ءَ ریمنڈ ءَ جوانیں ھبرے نبشتگ کہ چریشی ءَ اے ملک ءِ بے وسی ءُ لجوزی ءِ کسّہ پہ جوانی سما کنگ بیت۔ آئی ءِ قونصلیٹ ءِ دیم ءِ مردم کارمیلا کہ آئی ءَ گشیت ما وتی نیمگ ءَ وس کنگ ءَ ایں، بلئے اے ملک ءِ اسلامی ٹولی ءُ چاگردی رسانکدر اے کیس ءِ دیما مستریں اڑاند اَنت۔ بلئے گڈّی راہ تھنا ھمے پشت کپیت کہ امریکہ ءَ ھمے پنچ سد ملین ڈالر ءِ کمک  کہ پاکستان ءَ دیئگی انت، سرکار ھمیشاں داریت گڑا اے ملک وت راہءَ کئیت۔ چیاکہ ابید امریکہ ءُ آئی۔ایم۔ایف ءِ کمک ءَ اے ملک ءِ گزران ھچ وڑ ءَ نہ بیت۔ چداں اے ملک ءِ نا وسی ءِ راستی پدّر بیت۔

ھیر اے وَ ریمنڈ ءِ کسّہ انت نوں آ وت بہ زانت کہ چنچو دروگ ءُ چنچو راست انت۔ البت اے وئیل کہ 2011ءَ لاھور ءَ بوتگ، اے راستیں وئیلے ءُ اشی ءَ را اِد ءِ مردماں چون پیش داشتگ، اے ھم درستاں دیستگ۔ 

چرے کتاب ءَ مردم یک چیزے دربارت کہ اے ملک ءِ اسل راستی چے انت، اے ملک ءِ واگ کئی دست ءَ انت، ءُ اد ءَ وئیل ءَ پد کید ءُ بند ءُ اد ءِ آمیدگسانی جیڑہ ءُ جنجال چے انت۔ اشانی کاریچ چون انت ءُ گوں درملکی مردماں اشانی رؤشت چون انت۔ بزاں اے کتاب چوں اوں بے در نہ اِنت کہ اشی ءِ وانگ ءَ مردم کمو وھد مہ دنت۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

شوھاز