ناگمان وانگ بیت ءُ آئی ءَ وانوک باز اِنت۔ بلوچی ءِ جوانیں ردانک نویسانی رمءَ ہوار اِنت، آئی ءِ تہا کسّہ گشگءِ سنچ اوں است بلئے ”شیتان“ ءِآزمانکاں ناگمانءَ وتی سنچ کار نہ گپتگ یا بگندئے کسّہاں ہمنچو وہد کہ پکار اِنت آئی ءَ اینچو وہد دات نہ کتگ۔
آ ناگمان کہ من ”دارءِ اسپ“ ءَ دیستگ ، آ اِدءَ گندگ نہ بیت۔ ”شیتان“ آئی ءِ نوک چاپ بوتگیں آزمانکانی دپتر اِنت ءُ اے کتاب ءَ چاردہ آزمانک ہوار اَنت، اشانی تہا لہتیں آزمانک ناگمانءِ کدّ ءِ آزمانک نہ اَنت۔ آئی ءَ چہ گیشتر اُمیت دارگ بیت۔
گیشتریں آزمانک انچیں ویل ءُ واقعہ انت کہ بس نبشتہ کتگ اَنت، چاگردی ءُ اندری مارشت ڈالچار کنگ بوتگ اَنت۔ چو کہ ”ناگمان ءِ سیر کدیگ بیت؟“ اے آزمانک گپّ ءُ ٹالے ءُ بنگپّ چاگردی جیڑہ یے ، بلئے ابید گپّ ءُ ٹالءَ کسّہ ءِ ایندگہ لوٹانی ھیال دارگ نہ بوتگ۔ ”سائنس آباد“ ءُ ”شیتان“ ءِ تہا اَنچو سما بیت کہ نبشتہ کار ءَ تہنا وتی دل ءِ لہڑ درشانتگ اَنت ءُ کسّہ ڈالچار کتگ۔ ہمے ڈول ءَ ”ماشبٹّ“ کہ چاگرد ءَ یک ٹولی یے ءِ نشون ءَ دنت اشی ءِ تہا اوں ناگمان ءَ کسّہ دلگوش نہ کتگ۔
”چندہ“ جوانیں آزمانکے کہ زہگانی تب ءُ چاگرد ءِ بزّگی اشی ءِ تہا جاگہ دیئگ بوتگ۔ چو کہ چکّ وہدے اچ ما اَنچیں جست کن اَنت کہ مئے گوٛر ءَ آہانی پسّو نیست گڑا ما گوں وتگڑیں حبراں آہاں ریپیناں، بلئے ہمے حبر آہانی بودناکی ءُ جست ءِ سِنچ ءَ وارت ءُ ھلاس کنت۔ اے آزمانک ءَ زہگ ءِ کارست ہم پہ جوانی جاگہ داتگ ءُ چکّ چو چکّےءَ گپّ ءَ اِنت۔ ایندگہ گیشتریں آزمانکانی تہا اگاں کارست ءِ نام درا مہ بیت آئی ءِ حبر زانگ نہ بنت۔ بگندئے نبشتہ کار ءَ رد وارتگ یا پہ زانت آئی ءَ وتی گپّ ءُ ٹالانی تہا آہانی چاگرد ءُ سند ءِ ھیال گوٛر نہ کتگ۔ چو کہ آزمانک ”ناگمان ءِ سیر کدیگ بیت؟“ ءِ گیشتریں کارستانی گپّ ءِ میل یکّ اِنت۔
”دیوانگ “ ھم م م م۔۔۔“ “Stupid“ ءُ ”لیب“ یکّیں تکینک ءِ آزمانک اَنت۔ چاریں آزمانک دو کارست ءِ چاگرد ءَ ترّ اَنت ءِ ہمیشانی نیام ءَ گپّ ءُ تران اَنت۔ اشانی تہا جوان تریں آزمانک ”ھم م م م۔۔۔ “ انت، اے کسّہ واناک اِنت ءُ مزنیں چاگردی جیڑہ یے ءِ نشون ءَ دنت۔ کسّہ ءِ تہا دگہ کسّہ یے ءِ گشگ آزمانک ءَ واناک کنت، اے کتہ کاری جوانیں رنگے ءَ بوتگ ءُ اے آزمانک ءِ پلاٹ اوں ہمنچو مہکم اِنت کہ وانوک ءَ ہچ سِدگ نئیلیت۔ اِد ءَ کسّہ کار ءَ کارستانی ھبر ءُ کسّہ ءِ تب ہردکانی دلگوش گوٛر اِنت۔ پہ درور اے رِداَنت:
”اُہ، اے کسّہ راستے ، دروگے؟“
”اے آزمانکے۔ اشی ءِ تہا دروگ ءُ راست دوئیں ہوار۔“
”ہاہاہاہا۔ باز زان ئے تو!“
”چنچک زاناں؟“
”من چے زاناں۔“
”ہاہاہاہا۔ نہ زانئے گڑا دیم ءَ گوش دار۔۔۔۔“
کسّہانی زبان اوں شیرکن اِنت ءُ بلوچی ءِ ذگریں رنگ کہ دشت ءِ گالوار اِنت ناگمان ءَ ہما رنگ انگت برجاہ داشتگ۔ وتی ہند ءِ گال ءُ گالریچے ھیال کتگ اَنت، بلئے باز جاہ ءَ اَنچو سما بیت کہ ناگمان اگاں بہ لوٹ اِتیں اے کسّہ شرتر بوتگ اِتنت ءُ چہ آئی ءَ اُمیت اوں ہمیش اِنت۔ بلئے ناگمان شیتانے،۔۔۔ءُ شیتان پہ وت ءَ وانوک وت درگیج ایت۔
No comments:
Post a Comment