ساجد ءِ ترس ہمیش اَت کہ آ بیگواہ مہ بیت ءُ آئی ءِ ژانگولیں جون اگارے ءَ مہ کپیت۔ بلئے بیگواہ بوت،وتی ملک ءَ اوں نہ بوت، دنیا ءِ دگہ کنڈے ءَ بیگواہ بوت، شہید بوت ءُ واتر اَتک۔
من اگاں بہ گشاں کہ ساجد حسین ءَ من پیسر ءَ ونتگ گڑا دروگے۔ آئی ءِ نام من اشکتگ ات ءُ وھدے ساجد سویڈن ءَ شہید کنگ بوت گڑا من کمّو پٹّ ءُ پول کت کہ اے بامرد ءِ بابت ءَ چیزے بزاناں۔ بازیں نکانے وَ دست نہ کپت بلئے چنڈے چارکے جاگہ جاگہے دیست ءُ ونت۔
ساچ در ءَ ساجد ءِ کتاب ”نہ ملک ملکے نہ درملک“ وھدے چاپ کت۔ اے اوّلی رند اَت کہ ساجد حسین ءِ وانگ ءُ پہمگ ءِ موہ یے رست۔
اے کتاب ءِ پنچ بہر اَنت، ساجد ءِ گلگدار، نبشتانک، نزّ آؤرتگیں کسّہ، سفر نامہ ءُ گڈّی بہر ءَ ساجد ءِ لہتیں کسّہ اَنت۔ من اگاں وتی ءَ بہ گشاں من ءَ ساجد ءِ نبشتانک چہ درستاں دوستر بوت اَنت۔ آئی ءِ اوّلی جوانی اش اِنت کہ ہچ ریا ءُ رو نہ کنت ءُ اے ھبر ءَ ہچ کِمار نہ کنت کہ کئے دل ءَ کاریت ءُ کئے گلگ کنت۔ دومی آئی ءِ نبشتانکاں چہ اے ھبر پدّر بیت کہ ساجد باز ونتگ ءُ آ ہرچی ءَ گوں وتی عینک ءَ چاریت، روایتی میل ءُ تب ءِ منّوک نہ اِنت۔ آئی ءِ نزّ ءَ ہرچی کہ زبان ءِ دیمروی ءِ دیما اڑاند انت آ میل یا تب یلہ کنگ بہ بیت۔ ساجد ءِ جیڑہ اش اِنت کہ آئی ءَ سیاست کتگ، تاکاری کتگ ءُ اشاں ہوار ساچشتکارے اوں بوتگ۔ اگاں ساجد تہنا لبزانتے بوتیں ءُ پدا بس نگدکارے بوتیں منی ھیال ءَ آ وتی دور ءِ جوان تریں نگدکار بوتگ اَت، بلئے کار کہ باز بنت مردم مان گیشّیت ءُ ہچ کار پہ جوانی کت نہ کنت۔۔۔
چو کہ وتی گلگدارے ءَ حمّل حیدر ءِ پسّو ءَ گشیت:”مئے چاگرد ءِ ہر پڑ ءَ مئے مردم آسان پسندی ءِ شکار اَنت۔“ گوں ہمے یکّیں رِد ءَ ساچشتکاری ءِ درگت ءَ ساجد ءِ لیکہ کیاس کنگ بیت کہ آ ہچ جاگہ آسان پسندی ءِ منّوک نہ اِنت۔ بلوچی ءِ نبشتہ کاراں چہ آئی ءِ گلگ اوں ہمیش اِنت کہ آ مدام رنگراہاں سر جن اَنت۔ پہ ساچشتکاری ءَ جہد ءُ جکانسری نہ کشّ اَنت۔ ہمے ھاتر ءَ آ نہ چہ بلوچ ءِ سیاست ءَ دلجم اِنت، نہ تاکاری ءَ نہ لبزانک ءَ ۔
بلوچی ءِ وانوک ءُ نبشتہ کارانی بابت ءَ آئی ءِ گشگ اِنت کہ، بلوچی وانوک ہم است انت ءُ نبشتہ کنوک ہم است بلئے اگاں نبشتہ کار وتی مواد یا کنٹنٹ ءِ سر ءَ دلگوش گوٛر مہ کن انت اے وانوک ہم کم ترّان بنت ءُ ھلاس بنت۔ من وت ہم ہمے ھبر ءِ منّوک آں کہ بلوچ نبشہ کار ءَ وھد ءِ ہمبراہی ءَ وت ءَ را ”اپڈیٹ“ بہ کن اَنت ءُ وانوک ءِ لوٹ ءُ میل ءِ ھیال ءَ گوٛر بہ کن اَنت۔
مئے گیشتریں نگد کار ہما لبزانکی مئیل ءِ کہ منّوگر اَنت ساجد آئی ءِ بگیر ءَ اوشتوک اِنت۔ آئی ءِ منّگ ہمیش اِنت کہ کسّہی لبزانک ءُ درکسّہی لبزانک ہردو جاہاں روایتی مئیل یلہ کنگ بہ بیت، چیاکہ اے نوکیں دور ءَ گوں زبان ءَ ھمگام کت نہ کنت۔ آئی ءِ دو کسانیں سفر نامہ کہ کتاب ءَ ہوار انت وت اے ھبر ءِ شاہدی ءَ دیئنت کہ ساجد روایتی تب ءِ منّوک نہ اِنت۔ سفر نامہاں آئی ءَ اھوال ءَ گیش ہما جاگہانی بن دپتر ءُ وتی مارشت بیان کتگ اَنت۔ منیر مومن ءُ عطاشاد ءِ شاعری ءِ سر ءَ نبشتگیں آئی ءِ نگدی نبشتانکانی وانگ ءَ چہ سما بیت کہ آ شعری نگد ءَ اوں بلد اِنت۔
اگاں ساجد ءِ کسّہانی ھبر ءَ بہ کن ایں گڑا آ کسّہ نویسی ءَ نوکیں مئیلے ءِ آرگ ءَ سوبین نہ بوتگ۔ مردمے کہ درانڈیھ بیت ءُ (Nostalgia) ءِ آماچ بیت آ کسّہ یے نبشتہ بہ کنت یا شعرے آئی ءَ وتی سرڈگار ءِ یات ءُ زہیر انچو مانروپ اَنت کہ ازم ءَ گیش آئی ءِ دلگوش ءَ لیکہ ءُ زبہری ءِ مارشت وتی گوٛر ءَ چکّ اَنت۔ ساجد ءِ کسّہ اوں انچوش اَنت۔۔۔ کسّہانی جوانی اش اِنت کہ آئی ءَ ریا ءُ رو نہ کتگ۔ چوکہ جاگہے جنینے ءَ جنّے گیپت،ملّا کہ جنّ ءَ گشیت درا ، جنّ درنئیت ءُ گشیت من بی۔ایس۔او ءِ صدر آں۔“ اے ڈولیں سیاسی تژن اوں آئی ءِ کسّہاں تامدار کنت۔
ساجد ءِ کسّہانی آدینک ءَ آئی ءِ زند، سیاسی لیکہ، بلوچستان ءِ سیاسی جاور، درانڈیھ ئیں بلوچانی جیڑہ ءُ زند، سرڈگار ءِ جگر برّیں زہیر ءُ بلوچانی مچّانکی تب گندگ بیت۔۔۔ بلئے من گشاں ساجد اگاں نگدکارے بوتیں ءُ است بوتیں بازیں ”لبزانکی ءُ سیاسی بُتے“ برہنگ بوت۔
No comments:
Post a Comment