من کسّہ واناں ءُ بگندئے کسّہ وانگ منءَپمشکا دوست بیت کہ من چے ماراں آہاں نبشتہ کت نہ کناں، وہدے کسّہ یے واناں ءُہما کسّہ ءَمن سما کناں کہ من اوں ہمیشیءِکارستے آں۔ من ءَہمے ڈولیں کسّہ دوست بنت کہ من وتی مارشتءُجوزگاں آئیءِتہا بہ گنداں۔ اے ڈولیں کسّہ کار منی دوت تریں نبشتہ کارانی لڑءَہوار بنت۔ بلوچی ردانک نویساں منی دوست تریں نبشتہ کاراں چہ یکّے حنیف شریف اِنت۔
حنیفءَمن ہما وہدءَچہ زاناں کہ من سکولءِنودربرے بوتگاں، ہر جاہے سنگتانی دیوانءَآئیءِنام اِشکتگ۔ پدا آئیءِ آزمانکانی دپتر تیراں دسک ءُ اوّلی گدار ونت اَنت۔ منءَدوست بوت۔ من یک حبرےءَحیراناں کہ سکولءِنودربرے بوتگاں اوں من حنیف وتی حسابءَونتگءُمروچی عمرءِنیم گوازینتگ انگت حنیف منءَہما ڈول دوست بیت۔ آئیءِمستریں سوبینی ہمیش اِنت۔
آئی ءِدراجیں مدّتےءِدرانڈیھیءَ چہ انچو سما بوت کہ حنیفءَنبیسّگ یلہ کتگ۔ بلئے اناگتی آئیءِ آزمانکانی دپتر “حنیف نام“ چاپ بوت۔ اے کتاب انچو زوت بہا بوت کہ پہ ما سر نہ بوت۔ ہما وہدءَ پی۔ڈی۔ایفءَسنگتےءَدیم داتگ اَت، بلئے مئے واندگیں سنگتاں کتاب انچو ایر جت کہ من یکّءُدو آزمانکءَپد وانگ یلہ کت۔
اے دمانءَکتاب ءِچارومی ایڈیشن منءَدست کپت۔ کتاب میڑہ یےءَمنءَنودربرےءَ سوگات کت ، نوں وَ الّم وانگی اَت۔
پدا موسمءَاوں انچو کت کہ ابید کسّہءِوانگءَدگہ ہچ کارءَدل پِر نہ بوت۔ ہورءُ باران ، گْوادر آپءُ گوٛرم بوت، لوگءَچہ ڈنّ در آہگ نہ بوت۔ اے وڑیں موسمےءَتہنائیں مردمے نہ وانیت دگہ بہ کنت چے۔
حنیف نام من یکّیں روچءَسرجمی ءَونت۔ یک چیزے من سما کت کہ ہما زبانءِشیرکنیءُکسّہانی پلاٹءُ ردءُبند کہ حنیفءِ پجّار بوتگ، آئیءِگوٛرءَانگت ءَ است اِنت۔ کتابءِکسّہ سئے بہر ءَ اَنت۔ اوّلی بہرءِکسّہانی تہا یکّے ساجد حسینءِبیگواہیءُکوشءِپژدرءَ نبیسّگ بوتگ ءُ دگہ لہتیں کسّہ اَنت۔ دومی بہرءَآئیءِ جیلءِزمانگءِ بے گوٛمیں روچانی کسّہ اَنت ءُ سیمی بہرءَدرانڈیھیءِکسّہ اَنت۔ اوّلی بہرءِکسّہاں مہپریءُزبادیءِکسّہ انچیں کسّہ یے کہ استیں وہدءِ بازیں کارستے وتءَرا ہمے کسّہ ءَدیست کنت۔ بگندئے مئے بازیں وانوکاں ہمے واستءَاے کسّہ دوست نہ بیت کہ اِدءَحنیف ءِزبان بازاری یے یا آئیءَ فون سیکسءُدگہ لہتیں جیڑہانی نام گپتگ بلئے ہر کارستءِزبانءَآئیءَگپّ پرمائگ نبشتہ کارءِ سوب مندی انت، دومی اے جیڑہ اگاں کسے گشیت کہ نیست اِنت گڑا آ وت دگہ دنیا یے ءَاِنت۔
دیمترءَدگہ کسّہ یے “ من تچگءَاِتاں “ اشیءِتہا آئیءَ ردانکءِتہا بلوچءِ چہ وتی ڈیھءَ تچگءِ جیڑہ ءَجوانیں رنگےءَ جاگہ داتگ۔ پہ درور اے چنڈءَ بہ چار اِت:
” پدا تیرےءَ توار کت۔ اے رندی ما گیشتر سست تر اتیں۔ تچگءُ روگ ءِ نیامءَ رستگ اتیں۔ ہمینکس ءَما دیست تیر چو ہور ءَ شلگءَ اِتنت۔ بمبانی توار بندات بوتگ اَت۔ “
دیمتر ءَ نبشتہ کنت:
”پدا منی دیم ءِ مردمےءَ تیرے وارت۔ آ کپتءُ پدا کش ءَ دگرے کپتءُ پدا تچکائی اَتءُ رندءَ مردم کہ نہ تچگءَ اِتنت نہ کپگءَ اتنت ءُ نہ کہ کوکارءَ اتنت۔ آ بس گار بوہگءَ اتنت، بال کنگءَ اِتنت، دوتّ بوہان اتنت ءُ پدا لاؤڈ اسپیکر ءَ اعلان بوہگ ءَ اَت، تچگءِ سکین دیئگ بوہگ ءَ اَت۔“
اے کسّہ ءَ سرجمی ءَ بلوچستان ءِ ہمے وہد ءِ جاور ءُ چداں مردمانی تچگءُ دگہ ملکاں درانڈیھی ءِ جاور بیان کنگ بوتگ اَنت۔ چوناہا اوں حنیف انچیں نبشتہ کارے کہ آ وت راج دوستیں جہدکارےءِ جہتءَ زانگ بوتگ ، ہمے آئیءِ مہر اِنت کہ انگت درانڈیھیءَ آئیءَ پہ لکّگءَ پرمان کنت۔
دگہ یکّ کسّہ یے ” آ سبزے اَت “ اشیءِ تہا مردینانی تبءُ میلے بیان کتگ۔ اسل ءَ کسّہ ءِ بنجاہی کارست جنکے بلئے ادءَ بنجاہی حیال مردینانی تبءُ میل اِنت۔ چو کہ ہمے کسّہ ءَ جنکّے مردینانی بابتءَ گشیت :” Men are dogs." درائیناں کند اِت۔
بلئے کس مادر بے اپا ڈوگز اَنت ، ہمیشانی تہا یکّے ءَ گشت ءُ پدا پری ءَ ٹہک دات ءُ کند اِت۔“
دگہ آزمانکے روباہءُ آئیءِ مرگ ، اے چیدگی آزمانکے کہ روباہ ئیں کارست چاگردءَ چوں بے وس اَنت ءُ پیری پدا کائیگرانی پادانی چیرءَ کا اَنت یا گوات ءَ گوں شیکّو ور اَنت۔ بلئے ورنائیءَ ہمے روباہ روچے نوکیں پندلے ساز اَنت، پدا اوں چہ وتی زمینءَ سست نہ کن اَنت۔
اے کتاب ءِ جوان تریں کسّہ ہما اَنت کہ آہانی تہا درانڈیھی ءِ بزّگیءُ بے وسی ءِ مارشت ہوار اَنت۔ چو کہ یک روچے حفیظ رؤفءِ شعرے ءِ بابت ءَ حسام بلوچءَ نبشتگ اَت کہ حفیظ ءِ شعرانی وانگءَ پد مردم ءَ انچو سما بیت گشئے ما درانڈیھ ایں۔ ہمے وڑءَ حنیف ءِ کسّہ ” من ، اُتمانءُ۔۔۔۔۔ ءُ پدا زراتون ءَ ہچ نہ گشت “ اے دوئیں کسہانی وانگءَ چہ مردم سما کت کنت کہ درانڈیھی ءِ درد چنچو گران اِنت۔
میلان کنڈیرا ءَ کہ من ونتگ حاص آئی ءِ گدار ” مراجعت “ منءَ اءنچو سما بوتگ کہ یک دمانے من اوں وتی جند ءَ چہ سستگ آں ءُ درامدیں ملکے ءَ دگےءِ سرءَ نشتگ ءُ پنڈگ ءَ آں۔ ادءَ نہ من کسے ءَ زاناں ءُ نہ کسے من ءَ پجّا کاریت۔ حنیف ءِ اے کسّہانی تہا اوں بیگواہی ، تہنائی ءُ درانڈیھیءِ درد سوزمان مارگ بنت۔ پہ درور اے رداں بہ چار اِت:
”موبائل سکّ جنگ ءَ اَت۔ کئی بوت کنت، اے شہرءَ کئے منءَ پجّا کاریت۔ “ مردم کمّے گمان بہ کنت کہ انچیں جاہے کہ ہودءَ کس ترا مہ زانتءُ تو کسءَ مہ زان ئے، ملک اوں دگرےءِ بہ بیت، زبان اوں دگرانی بہ بیت، ہودءَانسانے کجام بزّگیءُ ذہنی اذیتاں چہ گوٛزیت۔ اے جیڑہ حنیفءَ وتی درانڈیھی ءِ دوئیں کسّہانی تہا جوانی ءَ جاگہ داتگ۔
حنیف وانوکاں ہمے واست ءَ دوست بیت کہ آ کسّہ نبشتہ کنت، ءُ ہما کسّہاں نبشتہ کنت کہ آ جاگہ نہ جاگہے الّم چاگردءِ یکّ ٹولی یے ءِ مارشتانی در انگازی ءَ کن اَنت۔ ورناہاں دوست بیت، نودربراں دوست بیت ءُ لبزانکی مردم کہ آہانی وانگءِ راہءُ رہبند چٹ جتا اَنت آ اوں حنیفءَ وان اَنت۔
منءَ کہ حنیفءِ وانگءَ درستاں چہ گیش متاثر کتگ آئیءِ کارستانی زبان اِنت۔ کسّہ ہرچی جوان بہ بیت بلئے کارست گرءُ دار کنگ مہ بنت، آہانءَ ہما جاگہءَ ایر کنگ مہ بیت یا ہماہانی جندءِزبانءَ حبر کنائینگ مہ نیت کسّہ بے تام بیت۔ پہ درور ” گبّی ءِ دیم دانگ اَت “اے آزمانک ءَ کہبگے ءِ کارست ءِ حبر چوش اَنت:” جن کس ! “ آئیءِ ٹہک دارگ نہ بوت انت۔
برو نوں تئی ٹیمب ہلاس بوتگ۔“
یا
” انچو وَ منی ماہواری نیا اَنت ، پدا انچو درد کن انت ہچ وپسگ ہم نہ بیت۔“ اے کارست اگاں لوگےءِ جنینے بوتیں ءُ اوّلی رندءَ یک مردے ءَ دُچار کپتیں، اے ڈولیں حبرے کتیں گڑا کسّہ درءَ نیاتکگ اَت بلئے حنیف زانت کہ کئے ءَ چون حبر پرماہگی اِنت۔
دگہ جاہے کہ آ وتی کسّہ ءِ کارست وت اِنت ءُ اے وہدی جیلءَ اِنت۔ اِدءَ گشیت :” من وتی گدانی سرءَ رتکگیں مسّ ءِ ترمپ کہ دیست انت ، جیڑ اِت ، ما بلوچ دروا مسّ ءِ ڈبّی ایں۔“
اِد ءَ یک بندیگےءِزبانءَ حبرءَ اِنت ءُ ہمے یکّیں رِدءَ سرجمیں بلوچ ءِ بزّگیءُ بے وسیءَ بیان کنت۔ وت کہ سیاسی بندیگے آئی ءِ حبر اوں چو سرپدیں مردم ءَ اَنت۔
گشگءِ مول ءُ مراد اِش اَنت کہ حنیف ءَ وتی کارست مرّین انتءُ آ وتی کسّہانی مہارءَ داشت کنت۔ ہمے چیزءَ آئی ءَ را چہ وتی عہدءِ ایندگہ ردانک نویساں جتائیں پجّارے داتگ۔ حنیف زی وانگ بوتگ ءُ مروچی اوں ہما ڈول وانگ بوہگءَ اِنت۔
آئی ءِ نوک تریں گدار ”افسانہ “ ءِ چاپ بوہگءَ گوں ہزارانی کساس ءَ بہا بوہگ وت اے گپّ ءِ مانزمان اِنت۔
No comments:
Post a Comment