بلوچی کسّہ ءِ وانوک ءَ چو کہ سادہ بیانیہ تکنیک ءِ وانگ ھیل کتگ، ہمے ھاتر ءَ بلوچی ءَ ہر نبشتہ کارے کہ نوکیں کُتہ کاری یے کنگ لوٹیت آ یکبرے وتی وانوک ءَ چاریت کہ منی وانوک کئے انت۔ ہمے ھاتر ءَ بلوچی ءَ نوکیں تکنیکاں کسّہ نویسگ ءِ ربیت باز کمّ انت۔ منیر احمد بادینی حنیف شریف، اے۔آر داد، یونیس حسین، مقبول ناصر، مجیب آزاد ءُ دگہ بازیں انچیں نبشتہ کار است انت کہ وھد وھد ءِ سر ءَ بیانیہ تکنیک ءَ ابید ایندگہ تب ءِ کسّہ نویس انت بلئے وانوک چو کہ یک ھاسیں تبے ءَ ھیلدار اَنت پمشکا اے ڈولیں کسّہ لس مردم ءِ تب ءَ نہ کپ انت۔ البت اے ٹولی ءَ حنیف شریف چہ ایندگراں گیش سوبین بوتگ کہ آ کسّہ ءَ ہوار وانوک ءِ تب ءِ ھیالداری ءَ اوں کنت ءُ وتی کسّہاں چرپ ءُ چانگال کنت۔
بلوچ ءِ گوٛر ءَ چو کہ کسّہ ءَ مزنیں پندے نہ برّ اِتگ ءُ منیر احمد بادینی ءِ گداراں اگاں بہ کشّ ئے بلوچی ءِ ایندگہ درسیں گدار سد ءَ نہ گوٛز اَنت۔ پمشکا یکبرے وانوک ءَ ہمائی ءِ کدّ ءِ مواد دیئگ بہ بیت ءُ کسّہ نوں وتی نوکتریں گاماں دیما بہ جُنزیت۔ اگاں کسّہ گوں تکنیک ءُ بنگپّاں اوّلی پدیانک ءَ چہ تچک ءَ پنچمی پدیانک ءَ سٹّ بہ کنت گڑا وانوک ھبکّہ بیت ءُ کسّہ کار وتی سفر ءَ سوبین نہ بیت۔
دومی نیمگ ءَ اگاں اردو ءِ ھبر ءَ بہ کن ایں کہ مئے ہمساھگیں زبانے، ہود ءَ کسّہ ءِ جتائیں تب ءُ تکنیک یکّیں وھد ءَ رواج گپتگ انت۔ اشی ءِ مستریں سوَب اردو زبان ءِ سرکاری سرپرستی ءُ ملک ءِ راجی زبان بوہگ ءَ ہوار اردو ءِ وانوکانی بازی انت۔ وانوک کہ باز بنت ہر وانوکے وتی تب ءِ نکان شوہازیت ءُ ہر ڈولیں نوکیں کُتہ کاری یے کہ کنگ بیت آ پہ وت وانوک پیدا کنت۔
اردو ءَ اگاں کرشن چندر، منٹو ءُ قرۃ العین حیدر ءِ کسّہاں بہ تپّاس ئے، چریشاں ہر یکّے ءِ تب ءُ درشانداب جتا انت۔ بلئے ہرکس ءَ پہ وت وانوک پیدا کتگ ءُ ہرکسی وتی لبزانکی بالادے۔ منٹو چو کہ سکّیں دیم گش ءُ نہ ترسیں کسّہ کارے ہمے ھاتر ءَ آئی ءَ ہر تب ءِ مردم وان انت۔ کرشن ءِ گوٛر ءَ چہ بنگپّ ءَ ازم ءِ ارزشت گیشتر انت بلئے آ کسّہ ءَ بازیں پیچ ءُ تاب اے واست ءَ مان نہ کنت کہ آئی ءَ را وتی وانوک ءِ سما انت۔ چاگردی بنگپّاں آ ارزانیں زبانے ءَ گوں نبیسّ ایت ءُ لس مردم ءِ مارشتاں انچو کسّہ ءَ ہوار گیجیت کہ ہر وانوکے آئی ءَ وتی چاگرد ءِ عکاسی ءِ دروشم ءَ گندیت۔
بلئے بیا کہ قرۃ العین حیدر چرے ہر دو تباں جتا انت۔ نہ آ ارزان پسندی ءِ منّوگر اِنت ءُ نہ کہ پہ وانوک ءَ وتی کسّہ ءِ تب ءُ تکنیکانی مٹّینگ ءَ ساڑی انت۔ قرۃالعین کسّہ ءِ بنگپّ، ازم ءِ پیچ ءُ تاب ءُ وتی درشانداب ءَ ہر ھساب ءَ وتی رنگ ءَ رجینگ لوٹیت۔ پرے ھبر ءَ آ مامانگ نہ بیت کہ آئی ءِ وانوک کئے انت، بلکیں ہر بنگپّ ءَ کسّہ ءِ پوشاک ءَ وتی رجینتگیں رنگاں پروشیت۔
قرۃ العین ءِ آزمانکانی دپتر ”شیشے کے گھر“ کہ من ونت، بندات ءَ منی سر پِر نہ بوت کہ کسّہ چہ کجا بندات بوہگ ءَ انت ءُ بنگپّ چے انت۔ پدا کہ گوں کسّہ کار ءِ تب ءَ کمّو رِتک ءُ ریچ بوتاں نوں من سما کت کہ آئی ءِ مستریں سوبینی اش انت کہ پلاٹ ءَ ہور ءُ تور کنت ءُ کسّہاں انچیں جاہے بندات کنت کہ وانوم یکبرے سرّا برّا بیت کہ بنگپّ چے انت ءُ کجا رؤگ ءَ انت۔ بنجاہی کارست وَ ہچ پجّارگ نہ بیت۔ گپّ ءُ ٹال ہم سادگیں زبان ءَ نہ انت۔ گپّانی نیام ءَ انچو سما بیت کہ کسّہ کار وت دل ءَ لَبجگ ءَ انت، بلئے اناگت ءَ جہل ءَ گندئے کہ کسّہ کار نہ انت بلکیں کارستے ھبر ءَ انت۔ کسّہ ءِ مہار ءَ انچو بارگ داریت کہ چو اوتاکے ءَ نازُرک انت ءُ کمّو اگاں وانوک بہ دلگوش بہ بیت، چہ کسّہءَ سدیت ءُ پدا ہرچی بہ کنت گوٛستگیں وئیلاں گوں دیم ئیگاں دپ ماں دپ کت نہ کنت۔ قرۃ العین ءِ کسّہانی پلاٹ سکّ نازُرک انت ءُ ہر آزمانک ءَ ہمنچو ترّ ءُ مان ترّ مان کنت کہ مئے بلوچی ءِ نبشتہ کارے بوتیں چرے آزمانکاں ہر آزمانکے جتا گدارکے کتگ ات ئِے۔
اے کتاب ءَ ہواریں گیشتریں کسّہانی بنگپّ ہندوستانی چاگرد، ہود ءِ مہلونک ءِ تب ءُ میل، جتائیں مذہبی ٹولیانی روِشت، ہندوستان ءِ بہر ءُ بانگ ءَ پد ءِ جیڑہ، آجوئی ءِ جنز ءِ کشّ ءُ چیلّ، اے جنز ءُ پدا آجوئی ءَ پد مردمانی سر ءَ اشی ءِ نفسیاتی، چاگردی ءُ مالی سان، اے درسیں جیڑہاں آ وتی کسّہاں جاگہ دنت۔ بلئے ہچ چیز چو منٹو ءِ کسّہاں گوں شدّت ءَ سہرا نہ بیت ءُ نہ چو کرشن ءِ ڈول ءَ گپّاں پاشک کنت۔
ہر کسّہ ءِ وانگ ءَ پد وانوک ءَ یکبرے جیڑگی بیت کہ کسّہ ءِ بنگپّ چے ات۔ چو کہ گڈسر ءِ دوئیں کسّہ ”لندن لیٹر“ ءُ ”جلا وطن“ انت۔ یکّے روکپتی چاگرد ءُ ہود ءَ پناہ گیریں ہندوستانیانی زند ءِ عکاسی ءَ کنت ءُ دومی 1947 ءِ بہر ءُ بانگ ءُ دوئیں ملکانی جوڑ بوہگ ءَ پد ءِ جیڑہاں چاگرد کنت۔ پدا اوں کسّہانی بندات ءَ وانوک ءَ ہچ گُمان نہ بیت کہ سیاسی بنگپّے۔ ہر ھبر چہ کارستانی ہمروچیں زند، ذہنی کشّ ءُ چیلّ، جبزگ ءُ مارشتاں بندات بیت ءُ آسر بیت۔ جنگ انت، بلئے جنگ ءِ نیام ءَ مہلونک مہر کنت، کندیت، دیوان کنت، جنگ ءَ پد نا اُمیتی بیت، واری بیت، بزّگی بیت بلئے کارستانی اندری مارشت فردی دروشم ءَ چہ چاگرد ءَ اینچو سان نہ زور انت اینچو کہ وتگڑیں کسّہاں پیش دارگ بیت۔
کسّہ کار ہما وھدی سوبین بوت کنت کہ کسّہ ءَ کسّہ ءِ دروشم ءَ ہمبراہ بہ کنت ءُ بنگپّ ءِ اینچو دلگوش مہ دنت کہ وانوک سما بہ کنت کہ آ تبلیغ کنگ ءَ انت۔ چیاکہ کسّہ کار ءِ کار کسّہ نویسگ انت، تبلیغ کنگ نہ انت۔ اگاں قرۃالعین ءَ ہمے کار کتیں، آ قرۃالعین نہ بوتگ ات بلکیں اسلم راہی یا نسیم حجازی بوتگ ات۔
”شیشے کے گھر“ ءِ ہر کسّہ ءِ وانگ ءَ پد منی دل ءَ گشتگ کہ اشی ءَ پدا نہ وان۔ ما کہ ارزانیں چیزانی وانگ ھیل کتگ مارا گڑ ءُ منجیں ساچشت دوسگ نہ بیت بلئے تاں کد ءَ ما انچو نند ایں ءُ نیم بُندگیں کسّہاں گوں وت ءَ وشنود کن ایں؟ دنیا ءَ وَ بلّ مئے ہمساھگیں زباناں ہما کتہ کاری کہ سی، چلّ سال ساری بوتگ انت ما انگت آہانی منّگ ءَ ساڑی نئیں۔ گڑا یا وَ بلوچی ءَ وانوک پیدا نہ کتگ یا ما انگت لبزانک ءَ بس وھد ءِ تیلانک دیئگ ءِ وسیلگے سرپد بئیں۔
No comments:
Post a Comment