سپر گوں بنیادم ءِ اَبرم ءَ بندوک اِنت۔ بنیادم چہ کرناں سپر کنان ءُ پیداک اِنت۔ برے پہ وتئی لاپ ءِ شوھازگ ءِ ھاترا اے مُلک ءُ پرا مُلک اِنت ءُ برے پہ وتئی ارواہ ءِ وشنودی ءِ ھاترا اے وتن ءُ پرا وتن اِنت۔ سپر عربی زبان ءِ لبزے کہ ایشی بزانت سات ءُ مُساپِری یا یک ھند ءُ دمگے ءَ چہ دومی ھند ءُ دمگ ءِ روگ اِنت۔
سپرنامگ در کسھی لبزانک ءِ یک تھرے کہ بیانیہ تکنیک ءَ نبشتہ کنگ بیت۔ ایشی تہ ءَ چمّ دیست، مارشت، دیدن ءُ کُتہ کاریاں اَبید ھما جاہ ءُ دمگانی راجدپتر، زبان، دود ءُ ربیدگ، ھود ءِ سیاسی، نیکراھی، چاگردی جاورال ءُ لبزانکی چست ءُ ایرانی بابت ءَ نبشتہ کنگ بیت۔
یونان ءِ ہیروڈوٹس( پنچمی کرن پیش مسیح ) دنیا ءِ اوّلی سپرنامگ نویس گُشگ بیت۔ فاہیان، ژانگ چیان، ہیون سانگ، مارکو پولو، ابنِ بطوطہ، ناصر خسرو ءُ البیرونی دنیا ءِ نامدار تریں سپرنامگ نویسانی سْرپ ءَ ھوار اَنت۔ یوسف خان کمبل پوش ءِ سپرنامگ ،، عجائبات فرنگ،، اردو ءِ اوّلی سپرنامگ اِنت کہ 1847 ءَ نبشتہ کنگ بوتگ۔ بلوچی زبان ءِ اوّلی سپرنامگ ءِ کتاب منیر احمد بادینی ءِ ،، آگہیں چَمّانی واب ،، اِنت کہ 1996 ءَ چاپ ءُ شنگ بوتگ۔ چِد ءُ پد ڈاکٹر فضل خالق، غنی پرواز، مریم سُلیمان ءُ دگہ لھتیں نبشتہ کارانی کتاب چاپ ءُ شنگ بوتگ اَنت۔
کتاب ،،سپر روان کنت،، عبداللہ شوھاز ءِ نبشتہ کتگیں اوّلی سپرنامگ اِنت۔ عبداللہ شوھاز چوناھا جْوانیں شائر ءُ نبشتہ کارے بلئے آئی گیشتریں کار ءُ ھزمت رجانکاری ءِ پِڑ ءَ اَنت کہ ستا کرز اَنت۔ پیس بک ءَ وھدے اوّلی بر ءَ ھمئے سپرنامگ ءِ اوّلی بھر دیم ءَ گْوست، من زانت کہ اے ورنا ھردیں کارے دست ءَ کنت دانکہ سرجم ئے مہ کنت تاھیر نہ گیپت۔ اے یک مُلکی سپرنامگ ئے۔ اے سپر ءَ شوھاز گوں وتئی کالج ءِ نودربراں پاکستان ءِ چاریں سوبھانی تر ءُ گرد ءَ روت۔ سپر چہ کیچ ءَ بندات بیت ءُ دیم پہ کراچی ءَ روت۔ چہ تیاب دپی رھسراں بزاں مکران کوسٹل ہائی وے ءَ سپر کنان ءَ دانکہ کراچی ءَ سر بیت۔ راہ ءِ ھمک ھند ءُ دمگانی بابت ءَ گوں راجدپتری شونداتاں سرپدی دیان کنت۔ اَنچو کہ برے حمل ء جئیند ءِ جنگی کسّھاں کاریت ءُ برے کیا ءُ سدو ءِ مھری داستان ءَ بیان کنت۔ ءُ برے ھنگول پارک، نانی مندر ءُ بیلہ ءِ راجدپتر ءَ گُشان بیت۔
لیاری ءَ شوھاز گوں وتئی ھمدلیں بیلاں( اصغر لال ءُ سھیل مھرانی )دُچار کپیت گُڑا دل ءِ سیر ءَ وتئی دل ءِ زنگاں شودیت۔ ھود ءِ جھمندیں مہلوک ءِ واری ءُ بزگی ءِ کسّھاں کاریت، لیاری ءِ گْوست ءُ ھَست ءِ سیاسی جاور ءُ لبزانکی چست ءُ ایرانی سرا گپ ءُ باوست کنت۔
کسانیں وھدے ءِ مَھتلی ءَ پد چہ کراچی ءَ قراقرم ایکسپریس ءَ سپر دیم پہ پنجاب ءَ رھادگ بیت۔ ریل چہ سندھ ءِ کیلگ ءُ ملگزاراں گْوزان کنت۔ شوھاز جاھے سندھی تہذیب ءَ بیان کنت ءُ جاھے سسّی ءُ پنّوں ءِ مھری داستان ءَ کاریت دانکہ ریل لاھور ءَ کیت ءُ سر بیت۔ پدا ھمئے رنگ ءَ اسلام آباد، مری ءُ پشاور ءَ تر ءُ تاب کن اَنت۔ لاھور ءِ پنجاب یونیورسٹی، مینار پاکستان، شاہی قلعہ، بادشاہی مسجد ءُ انارکلی بازار اسلام آباد ءِ قائدِ اعظم یونیورسٹی، فیصل مسجد پشاور ءِ یونیورسٹی آف ایگریکلچر، قلعہ بالا حصار ءُ قصہ خوانی بازار ءُ دگہ بازیں جاھاں سئیل ءُ سواد کن اَنت۔ دیمتر ءَ ڈیرہ اسماعیل خان ءِ راہ ءَ سپر کنان ءَ دیم پہ شال ءَ کائنت ءُ سر بنت۔ ادا ھم شوھاز ءِ جُھد گیشتر ھمئے بیت کہ نودربراں زانشتی ادارگاں پیش بداریت۔ آ بلوچستان یونیورسٹی، سائنس کالج، بیوٹمز ءُ دگہ بازیں جاھانی تر ءُ تاب ءَ پد دیم پہ کیچ ءَ واتر کن اَنت ءُ اے سپر آسر بیت۔
ردانک ءِ پِڑ ءَ شوھاز ءَ تنیگتہ ھرچ کارے کہ کتگ پہ ایمانداری ءُ دل ءُ سِتک کتگ ئے۔ اے کار آئی نوکتریں کار اِنت کہ وت آئی کتگیں مھنت ءِ شاہدی ءَ دیگ ءَ اِنت۔ اے اسٹڈی ٹور ءَ شوھاز ءَ ھرچی کہ دیستگ ءُ سما کتگ ھما رنگ ءَ بیان کتگ ئے۔ نیکہ چہ راستی ءَ سستگ ءُ نیکہ اِزمے پولنگ کتگ۔ بلکیں سرجمیں لوٹے پیلو کتگ اَنت۔ آ ھمینچو گوں سادگیں درشاندابے ءَ نبشتہ کنت دو ھمینچو آئی زبان زَگر ءُ روان بیت۔ ءُ ھر کُجا کہ شئیر، گُشتن ءُ گالریچ کارمرز کنان بیت سپر ءِ زیبائی گیشتر ودان بیت۔ اے سپرنامگ آئی گوں واناکیں نبشتھی دْروشمے ءَ سمبھینتگ۔ ھر چُنت کہ سپر دیم ءَ جُنزان کنت وانوک وت ءَ را داشت نہ کنت ءُ ھمراھی ءَ جُنزان کنت گوں۔ گُڈسرا، من بس ھمینچو گُشاں کہ شوھاز یک جْوانیں سپرنامگ ئے ءِ نویسگ ءَ سوبین بوتگ۔ چرے سپرنامگ ءِ وانگ ءَ بازیں سرپدی رسیت۔ بلوچی سپرنامگ ءِ واھگدار الّم ایشی ءَ بْوان اَنت ءُ وتئی ھوشام ءَ بِہ پْروش اَنت۔
No comments:
Post a Comment