دو روچ ءُ بیلے ءِ مہر

ساجد حسین ءِ یک ننشتانکے است ”ناول کہ بندات بیت“، اے نبشتانک ءَ آ ہمے ھبر ءِ سر ءَ زور دنت کہ گدار ءِ بندات سرجمیں گدار ءَ بیان کنت۔ اگاں بندات انچو پہ دیم بہ بیت وانوک بگندئے گدار ءَ اوّلی تاک ءَ یلہ بہ کنت ءُ پہ وانگ ءَ ساڑی مہ بیت۔ ہمے ھاتر ءَ گدار ءِ بندات گوں انچیں رِدے یا انچیں پیراگرافے ءَ کنگی اِنت دانکہ وانوک ءَ پہ وانگ ءَ مجبور بہ کنت۔

خیام ثنا ءِ اے گدارک ”ڈھائی دن محبت کے“ انچو کہ من پچ کت تہ بندات ءَ اے رِد نبشتہ اِتنت:

”سلطان کا اس دنیا میں دو کنواری بہنوں اور بوڑھی بیوہ ماں کے سوا کوئی نہ تھا۔ اس کا دوست، ساتھی اور ہمراہ و ہم خیال صرف اس کا مرحوم باپ تھا۔“

چہ بندات ءِ ہمے گالاں زانگ بیت کہ کسّہ ءِ بنجاہی کارست چورئیں بچکّے کہ جنوزامیں مات ءُ دو جنین چکّیں گوہارانی بار ہمائی ءِ کوپگان اِنت۔۔۔ اگاں کسّہ گوں بندات ءَ وانوک ءَ ہمبراہ بہ کنت ءُ آ ہمے ھبر ءَ بہ جیڑیت کہ آئی ءِ پت مرتگ گڑا پرچا مرتگ یا ہمے جنین چکّیں گوہار چون بوت کن انت یا چے کن اَنت۔۔۔یا ہمے بچکّ ءِ جند کہ اے درائیں ڈبّہ آئی ءِ سر ءَ اِنت آ اشاں چوں پودیت، الّم ہمے جستانی پداں گران ءَ وانوک گوں کسّہ ءَ ھمگام بیت۔

کسّہ ہرچی کہ دیما روان کنت نوں وانوک زانت کہ سلطان چونیں زندے گوازینگ ءَ اِنت۔ پت ءِ مرگ ءَ پد کہ لوگ ءِ ڈبّہ ہمائی ءِ سر ءَ بیت گڑا آ پہ وتی جنوزامیں مات ءُ گوہارانی والینگ ءَ این۔جیوزے ءَ رؤت ءُ کار کنت۔ ہمد ءَ آئی ءَ گوں شمائلہ نامیں ھمکاریں جنکّے ءَ مہر بیت۔ 

شمائلہ ءُ سلطان ہر دو گریبیں کہولاں گوں سیادی دار اَنت۔ شمائلہ ءِ مات مرتگ ءُ سلطان ءِ پت۔ شمائلہ گوں وتی ماتو ءَ نشتگ۔ ھمکاری ءِ وھد ءَ آہاں گوں یکّے دومیگ ءَ مہر بیت بلئے آ کارگس ءَ ابید در ءَ وت ماں نہ ملّ اِت کن انت ءُ نہ کہ اھوال کت کن انت۔ ہمے مہر ءُ ہمے تلوسگ ءُ پدا گریبیں بچکّے ءِ مہر ءِ درشان ءَ خیام ءَ کمال کتگ۔ آ وتی مہر ءَ انچو پہ ترس ءُ لرز درشان کنت کہ گشئے کسے ءَ کارچے آئی ءِ گردن ءَ ایر کتگ۔ پدا مہر ءِ درشان ھم انچو بیت کہ جنک ءَ نہ گشیت تو من ءَ دوست بئے بلکیں آئی ءَ گشیت کہ تو گوں من سور کن ئے؟

سلطان چو کہ انچائیں مردمے ءُ گریبیں لوگاں رستگیں چکّاں پہ مہر بس سور اِنت ءُ سور ءَابید آ دگہ چیز جیڑ ات نہ کن انت۔

کتاب ءِ نام پرچا ”ڈھائی دن محبت کے“ اِنت، اے چیز ءَ من پہ وانوکاں یلہ کناں کہ دو روچ ءُ بیلے ءَ مہر چوں بوت کنت ءُ اینچکیں کسانیں مدّتے ءِ سر ءَ سرجمیں گدارکے چوں نبشتہ بوت کنت۔

ہردکاں مہر بیت، سلطان ءِ بے سر دریں زند ءَ پدا اُمیتانی چراگے شہم کنت ءُ آئی ءِ دل ءَ زند ءِ درائیں وشّی یکپارگی ءَ آئی ءَ رستگ انت۔ بلئے اناگت ءَ درائیں وشّی ھاکاں ھوار بنت۔ شمائلہ پہ سانگ ءَ رزا بیت بلئے ہمے نیام ءَ شال ءَ بمب تراکے بیت ءُ آ گوں وتی کہول ءَ ہمے تراک ءَ مریت۔ سلطان ءِ واھگانی ملگزار پدا ویرندان بنت ءُ آ پدا چو پیشی ڈول ءَ شنگیت۔

گدارک ندارگ کشّی من ءَ بے کساس دوست بوت۔ اسل ءَ من نہ زاناں چیا بلئے من ءَ کسّہانی ندارگ چہ ہرچیز ءَ گیش وتی نیمگ ءَ چکّ انت۔ اے کسّہ ءَ ھم گوں من انچو کت۔

پہ درور شمائلہ ءِ کارست ءِ عکاسی اے ڈول ءَ کتگ  ئِے:

”جسم کی تراش، نین نقش، لب و رخسار اور دودھ سے دھلی رنگت ۔۔۔۔ سر سے پاؤں تک کسی نوجوان شاعر اور مصّور کے خواب و خیالوں کی طرح وہ۔۔۔“

جنکے ءِ زیباہی ءَ اے ڈول بیان کنگ ءُ اینچو نزّ آرگ ہما مردم ءِ کار انت کہ آئی ءِ تہا ساچشتی بود بہ بیت ءُ آ فکشن ءِ رپکاں اوں بلد بہ بیت۔ پدا جنکے ءَ گوں ورنائیں شاعرے ءِ ھیالاں تشبیہہ دیئگ، ورنائیں شاعر کہ آئی ءِ ھیال چہ جوزگ ءُ گرمجوشی ءَ چکار انت۔اگاں ورنائیں شاعرے ءِ جاگہ ءَ تہنا شاعرے ءُ واب ءُ ھیال بوتین انت، اے جنک ءِ زیباہی ءُ گوناپ ما اے رنگ ءَ نہ دیستگ ات۔

دومی ندارگ کشّی اوں انچو بوتگ کہ کسّہ ءِ درائیں کارستانی مارشت ءُ درد ءُ تورشتاں چہ گیش ہمے ندارگ وانوک ءَ چہ وت سدگ نئیل انت۔ پہ درور:

”رات کی بارش سے نہایا ہوا سورج اپنی اجلی دھوپ کی زلفیں وادیوں کے حسیں شانے پر نہایت ہی آہستگی سے پھیلا رہا تھا۔۔۔۔“

یا

”رات تھی۔۔۔۔۔

کسی گناہگار ۔۔۔۔ ملحد و ملعون کے قبر کی سی سیاہ، اور تنگ و  تاریک رات۔۔۔“

گیشیں درور دیئگ نہ بیت کک گپّ دور رؤت بلئے کسّہ سرجمی ءَ جوان انت۔۔۔ اے تہنا یک بچکے ءُ جنکے ءِ مہر ءِ کسّہ نہ انت بلکیں شہرے ءِ کسّہ انت، دودمانے ءِ کسّہ انت، وھدے ءِ کسّہ انت ءُ شہراں نشتگیں گریبیں مردمانی زندمان ءِ کسّہ انت کہ مہر ءُ جتائی پہ نیزگاریں مردمے ءَ چے معنا دار اَنت۔۔۔  شال ءِ بمب تراک ءُ ہر راچیں بے گناہیں مردمانی مرگ، اد ءِ مردمانی مالی جاور ءُ تب ءُ میل سرجمی ءَ کسّہ ءَ گندگ بنت۔

بس گڈسر ءَ یک ھبرے کناں اگاں نبشتہ کار دل ءَ مہ کنت، آئی ءَ اگاں ہمے مہر ءِ عمر پہ زورے دو روچ ءُ بیلے مہ کتیں ءُ کسّہ ءِ شہار انگت کمّو مستر بوتیں گڑا جوان تر بوتگ ات۔۔۔۔

پدا اوں اے گدارک ءِ سیمی چاپ انت۔ یک گدارے کہ سئے رند نہادی یے ءَ بئیت ءُ ھلاس بہ بیت آئی ءَ الّم چیزے مان۔ پہ ورنا ءُ نیزگاریں مہر کنوکاں ءُ زند ءِ معنا ءِ شوہاز ءَ سربتگیں وانوکاں اے شوکیں کسّہ یے۔