لبزانک اگاں سرجمیں زند ءِ آدینک انت بلئے پدا ھم بنی آدم دنیا ءِ ہر کنڈے ءَ کہ نشتگ، تُری ہر وڑیں زندے گوازینگ ءَ انت، آ وتی مارشتاں الّم وڑے نہ وڑے ءَ درشان کنت۔ ایندگہ گنگدام ءُ مردمانی نیام ءَ۔مستریں تپاوت ہمیش انت کہ مردم ءَ را زبانے است ءُ آ وتی زبان ءِ وسلیگ ءَ وتی مارشتاں دانگازیت، پدا ہمے زبان انت کہ چمیشی ءَ لبزانک ودی بیت۔
دنیا ءِ جتائیں کنڈاں نشتگیں مردمانی نیام ءَ بازیں ھمگونگی یے است۔ رنگ ءُ نسل، ذات ءُ زریات ءُ ھند ءُ سیمسراں ابید اوں مردم یکّے دومیگ ءَ گوں وڑے نہ وڑے ءَ ھمگرنچ انت۔ پدا ہما مردم کہ یکّ ڈولیں جیڑہ ءُ جنجالانی آماچ انت، آہانی تب ءُ میل، جیڑگ ءِ راہ ءُ رپک ءُ پدکرد داں بازیں ھدّے ءَ ھمگونگ بنت۔
اگاں یک مردمے افریقہ ءِ بزّگیں ملکے ءَ نشتگ ءُ جنگ زدگ انت ءُ وتی روچ ءُ شپاں گوں گژن ءُ واری ءُ ترس ءِ آماچی ءَ تیلینگ ءَ انت، ہمے ڈولیں مردمے کہ بلوچستان ءِ کوچّگے ءَ نشتگ ءُ چہ ہمے جاوراں گوٛزگ انت، اے دوئیں مردمانی نیام ءَ بازیں ھمگونگی یے گندگ کئیت۔ ہمے ھاتر ءَ ما لبزانک کہ وان ایں گڑا بازیں درامدانی ساچشتانی آدینک ءَ اوں ما وتی جیڑہ ءُ جنجال ءُ درد ءُ تورشتاں دیست کن ایں۔
انچیں گدارکے چمّاں گوٛست کہ غسان کنفانی ءَ نبشتگ ات، ”دھوپ میں لوگ“۔ کنفانی من ءَ پمشکا دوست بیت کہ آ چو بازیں وتگڑ ءُ وتساچیں نبشتہ کارانی ڈول ءَ نہ اِنت، بلکیں نبشتہ کنگ ءَ ھوار آ وت اوں جنگ ءِ پِڑ ءَ اکر کپیت ءُ وتی کرد ءَ پیلو کنت۔ تہنا ھیالانی دنیا ءَ زندگ نہ انت ، بلکیں ہما کارے کہ آئی ءِ نزّ ءَ پہ راج ءَ سیتّ انت، آ کار ءِ کنگ ءَ ہچ چکّ ءُ پد نہ بیت۔ ہمنچو کہ گوں وتی قلم ءِ زور ءَ راج ءِ پہازگ ءِ جہد ءَ کنت، دگہ دو ہمنچو آ وت ہمے گرمیں پڑگ ءَ ایر کپیت ءُ ہود ءِ سارت ءُ گرم ءَ چکّاسیت۔
کنفانی فلسطین ءَ ودی بوت ءُ اسرائیل ءِ اُرش ءَ پد چوداں گوں وتی کہول ءَ درانڈیھ بوت ءُ دمشق ءَ شت۔ لہتیں وھد ءَ چوداں چہ کویت ءَ شت ءُ پدا بیروت ءَ واتر بوت ءُ ہمد ءَ آ ءَ نبشتہ کنگ ءَ ھوار فلسطینی راج ءِ آجوجی ءِ جہد ءَ ھوار بوت۔ اے گدار آئی ءَ ہمے دور ءَ نبشتگ کہ چہ وتی سرڈگار ءَ درانڈیھ بوتگ ءُ راج ءِ غلامی ءُ واری گوں وتی چمّاں دیستگ ئِے۔
کتاب ءِ پیشگال ءَ کیرن رائیلی نبشتہ کنت کہ اے گال کنفانی ءَ وتی رودپتر ءَ نبشتگ انت:
”منی مارشت چٹیں عجبین انت۔ اے انچیں مردمے ءِ مارشت انت کہ آ کار ءَ رؤگ ءَ بہ بیت ءُ اناگت ءَ راہ ءُ رواجی ساہ بہ دنت۔“
چہ ہمے دوئیں رِداں زانگ بیت کنفانی ءَ زند ءَ چہ دگہ بازیں اُمیتے نہ داشتگ ءُ چو سما کتگ ئِے کہ من ہما کار ءَ کہ کنگ لوٹگ آں اشی ءَ سرجم کت نہ کناں، بلئے پدا اوں داں کہ زندگ ات وتی کار ءَ دزگلائیش ات۔ نادراہی ءَ گوٛر جتگ ات ءُ سہت ءُ دمان سوچّن ءِ سر ءَ ات، بلئے پدا اوں کار ءَ ات ءُ پدا ھم نبشتہ کنگ ءَ ات۔
ھبر بوہگ ءَ ات کنفانی ءِ گدار ”دھوپ میں لوگ“ ءِ، اے کسّہ گوں مئے جاوراں دپ وارت، چیا کہ ما اوں غلام ایں، مئے مردم اوں درانڈیھ انت ءُ گژن ءُ واری ءِ ھوپ ءَ مارا ھم گپتگ۔ گدار ءِ ہمے سئے ئیں کارست کہ کسّہانی ہمیشانی چاگرد ءَ ترّیت، مروان ، اسد ءُ ابو قیس، اے ڈولیں کارست من گوں وتی چمّاں دیستگ انت۔ کسانی ءَ من ءَ یات انت کہ مئے مردم چہ واری ءَ دبئی ءَ پہ دزّی ءَ کار ءَ شت انت۔ چداں لانچانی سر ءَ شت انت ءُ ہود ءَ نوں آہانی بھت ات کہ گرگ نہ بوت انت وَ زرّ اِش کٹّ ات، اگاں گرگ بوت انت بزاں آہانی دیم سیاہ ات۔ ہمے ڈولیں مردے است ات کہ پدءَ وتی پرپٹ ءِ سر ءَ گشت ءُ ماھیگے بہا کت، ہمیشی ءَ کسّہ کت کہ ما چداں کہ شتگ ایں دلّار ءَ مارا گیابانے ءَ یلہ داتط ءُ وت جستگ۔ دبئی ءَ شرتا ءَ مارا گپتگ ءُ بندیگ کتگ۔ مارا انچیں سزا اش داتگ کہ دژمن ءِ بھت ءَ مہ بات۔ مئے دستانی ناکن اش کشّ اِتگ انت۔
کنفانی ءِ اے کارست کہ مم دیست انت من ہما مرد ءِ ترانگ ءَ کپتاں۔
درانڈیھی ءِ زند، درامدیں ملکانی چمداری، پناہ گیرانی کیمپاں کپگ، گژن ءُ واری ءُ اے ڈولیں جیڑہاں چہ ہما مردم کہ وت گوٛستگ انت ءُ اے درائیں واری اش وتی چمّاں گوں دیستگ انت آ زان انت کہ چنچو گران انت۔ زند بے معنا بہ بیت، باندات ءِ شادمانی ءُ وشّی ءِ ہچی نشانی یے درا مہ بیت، چہ شد ءَ مردم ءِ چمّ شونز بہ بنت آ ہرچی کت کنت۔
ہمے سئے ئیں کارستانی وسیلگ ءَ آئی ءَ سرجمیں فلسطینی راج ءِ درانڈیھ ئیں مردمانی زند جاورال بیان کتگ۔ کسے کہ چہ وتی سر ڈگار ءَ سدیت پہ آئی ءَ ہچ پشت نہ کپیت۔ راجی پجّار ءَ وَ کلام بارت، پہ چنڈے نان ءَ آ باریں کئی کئی در ءَ ٹکّیت۔ چو کہ پیریں مردے چہ کیمپ ءَ در کپیت، وتی جن ءُ چکّاں ھدا ءِ اوست ءَ یلہ دنت ءُ رؤت گوں انچیں جنکے ءَ سور کنت کہ آ پیسر ءَ چہ لنگ انت ءُ آئی ءَ یک پادے پِر نہ انت۔ بلئے ہمے جنک ءَ را پکّا ءِ لوگے است ءُ چہ ایندگراں سیر ءُ ھزگار تر اِنت۔ چہ شد ءَ کہ مردم ءِ چمّ سیاہی کار اَنت آ ہرچی کنت۔ انچو کہ مروان، اسد ءُ ابوقیس کن انت۔
سئے ئیں کارست دلّارے ءِ کارگس ءِ دیما گوں ڈیورے ءَ دچار کپ انت۔ آ اے دلّار ءِ کرّ ءَ پمشکا کا انت کہ آہان ءَ دزّی ءَ کویت ءَ دیم بہ دنت، دانکہ آ ہود ءَ کار بہ کن انت ءُ چار کلدار بہ کٹّ انت ءُ وتی کہولاں والینت کت بہ کن انت۔ چہ بصرہ ءَ آہان ءَ چیرُکائی درکپگی انت دانکہ کویت ءِ سرکار آہاں مہ گیپت ءُ بندیگ مہ کنت۔
چنچو مشکل انت چہ وتی سرڈگار ءَ جَسگ ءُ درانڈیھ بوہگ۔ پدا ہمے درانڈیھی ءَ روچے کنڈے سرجنگ ءُ انچیں راہاں راہ کپگ کہ ہود ءَ کس تئی زند ءِ گواہی ءَ دات نہ کنت۔ پہ چنڈے نان ءَ وت ءَ ملکموت ءِ دپ ءَ دیئگ ءُ قہریں ریگزاراں پند جنگ۔
اے کارست گوں ہمے ڈیور ءَ دچار کپ انت، آ ہمیشاں زوریتءُ آہان ءَ گشیت کہ من ءَ آپ ءِ ٹینکرے گون انت۔ ہرجاگہ کہ چک ءُ تان بیت من شمارا ہمے ٹینکر ءَ بند کناں، چونگیاں کہ گوز ایں پدا شمارا ڈنّ ءَ کشّاں ءُ دانکہ کویت ءَ رسیناں۔
سئے ئیں مرد گوں ہمے ڈیور ءَ راہ کپ انت۔ ریگزاراں روچ انچو ترند انت کہ آہانی جاناں پاشینیت۔ بلئے پدا اوں آہان ءَ جنزگی انت کہ زرّ کٹّگی انت، وتی کہول والینگی انت ءُ شدیکیں لاپ سیر کنگی انت۔
ریگزاراں آ گوں ہمے ٹینکر ءَ لچّ اِتگ انت ءُ داں اوّلی چونگی ءَ ٹینکر ءِ توک ءَ بنت ءُ چونگی ءَ پد در کا اَنت۔ اے رندی زندگ ءَ پشت کپ انت۔ بلئے ہمے ٹینکر ءِ توک، ریگزار ءِ آسگواریں تبد ءُ تہاریں ٹینکر ءِ لاپ، آہان ءَ انچو کنت کہ وھدے ڈنّ ءَ در کپ انت ہمنچو بنت کہ رینگڑ بنت۔
دیمتر ءِ چونگی ءَ پدا ڈیور آہان ءَ ٹینکر ءَ بند کنت ءُ دپ ءِ بندیت۔ اد ءَ وھد باز لگّیت ءُ سپاہی پہ زورے ڈیور ءَ دار اَنت ءُ گوں آئی ءَ ناچوئیں جنکے ءِ بابت ءَ گپّ کن انت۔ گوں انچیں مردے ءَ آئی ءِ ناچوئیں یار ءِ بابت ءَ گپّ کن انت کہ آ چہ مردی ءَ ھلاس انت ءُ ہچ کت نہ کنت۔ پدا اوں وھد گوٛزیت۔ ڈیور کہ چونگی ءَ پد ٹینکر ءِ دپ ءَ پچ کنت تاں ہر سئے لاش انت ءُ کپتگ انت۔
پدا ہمے لاشاں رؤت ءُ چیرکائی ہاکوٹے ءَ دور دنت۔ ہما مردم کہ پہ زرّ ءِ کٹّگ ءَ، پہ وتی شدیکیں لاپ ءِ سیر کنگ ءَ ، ءُ پہ وتی کہول ءِ والینگ ءَ در کپتگ اتنت، آہانی جون ہمے ہاکوٹ ءِ سر ءَ ایر بنت ءُ ڈیور وتی ٹینکر ءَ زوریت ءُ رھادگ بیت۔
اے ڈولیں جاوراں زندگ بوہگ چنچو مشکل انت، اے پہ بلوچ ءَ نوکیں گپّے نہ انت۔ داں زمانگے ءَ مئے مردم عمان ءَ جنگ ءَ شتگ انت ءُ ہمود ءَ بازیں مردمے جنگ ءُ کشگ بوتگ۔ مروچی اگاں کسے گشیت کہ اے مردم وت سر بوتگ انت بزاں آئی ءَ گژن ءُ واری نہ دیستگ۔ ہمے گژن ءُ نادزرسی ءَ آہان ءَ ہمنچو مجبور کتگ کہ چہ وتی ملک ءَ درانڈیھ بوتگ انت ءُ دگہ ملکے ءَ پہ جنگ اش داتگ۔
کنفانی ءِ سیادی گوں ما ہمیش انت۔ فلسطینیانی سیادی گوں ما ہمے واری ، بزّگی، درانڈیھی، شد ءُ غلامی انت۔ کنفانی ءِ اے گدار پمشکا من ءَ دوست بوت کہ اد ءَ من وتی مہلونک ءَ گنداں، وتی مردمانی بزّگی ءَ گنداں، وتی درانڈیھ ئیں مردمانی بن گپتگیں دل ءَ گنداں۔ بگندئے پہ چیز پہ ہما راجاں نوک انت کہ آہانی زند پہ آسودگی گوٛستگ، بلئے پہ ما نوک نہ انت۔ جنگ، غلامی ءُ واری ہرچی کہ گیش کپان بیت آئی ءِ پد ہمنچو ترسناک بوہان بنت۔ جنگ درائیں چاگردی راہ ءُ رھبند، اخلاقیات ءُ نسل ءُ ذات ءُ زریاتاں لپاشیت، ہود ءَ درس غلام بنت، درس درانڈیھ بنت ءُ درس بے پجّار بنت، چو ہما سئے ئیں جوناں کہ ہاکوٹ ءِ سر ءَ پشت کپت انت۔
No comments:
Post a Comment