.jpeg)
نبشتہ کن
من عربے آں
منی پجّار کاڈ نمبر پنجاہ ہزار اِنت
ھشت چکّ انت منی
ءُ نہمی چکّ گرماگ ءَ پد اے دنیا ءَ ودی بیت
ترا زہر کئیت زانا؟
نبشتہ کن!
من عربے آں
ءُ گوں مزّوریں سنگتاں من سنگ پروشاں
ھشت چکّ انت منی
من پہ ہمایاں
نان ءُ پوشاک ءُ کاپی
چہ ہمے سنگاں کشّاں
من تئی چانٹ ءِ دپ ءَ چہ تو ھیرات نہ لوٹاں
نہ در ءِ دپ ءَ تئی بزّگ کناں وت ءَ
گڑا ترا زہر کئیت زانا؟
نبشتہ کن!
من عربے آں
من ءَ بس نامے پِر
دگہ پنّام نیست
من انچیں سرڈگارے نشتگ ءُ اوپار کناں
کہ ہود ءَ ہرکسی زند زوراکی ءِ ھرجان انت گوٛزیت
چہ زمانگ ءِ ودی بوہگ ءَ سر
چہ دور ءُ وھد ءِ بنداتی ءَ سر
ساھگی درچک ءُ چہ زیتوناں سر
ءُ چہ کاہانی ردوم ءَ ساری
منی روتگاں ہمے زمین ءَ ہنڈال جتگ
منی پسّ چہ ہما ننگاریانی کہول ءَ انت
چہ شرّ ذاتیں کہولاں نہ انت
منی پیرک دہکانے ات!
نہ ذاتے است ات ءُ ناں زُریات
نہ بوت کہ آئی من ءَ کتاب ءِ وانگ ھیل بہ داتیں
من ءَ گشت ئِےگوں کہ روچ چوں در کئیت
منی گس چو پانگپاہ ءِ کڈّک ءَ انت
گوں لُٹ ءُ کاشاں بستگ
گڑا تو منی اے بستار ءَ منّ ئے؟
من ءَ بس نامے پِر
پنّام دگہ نیست
نبشتہ کن!
من عربے آں
منی مودانی رنگ: چو اشکر ءَ سیاہ انت
چمانی رنگ: کیرگ انت
ءُ دگہ پجّاری نشان:
عربی دزمالے سر ءَ انت من ءَ، ءُ سیاہیں اگالے
کہ چو سنگ ءَ ڈڈّ اِنت
ءُ دست جنوک ءِ دستاں تل دنت
منی دوست تریں وردن
موز ءُ زیتون ءِ ٹیل
منی ڈسّ:
من دور ءُ در نشتگاں گاریں ھلکے
کہ نام پِر نیست ہود ءِ کشکاں
ءُ ہود ءِ درائیں مردین دہکانی کن انت، سنگ پروش انت
ترا زہر کئیت زانا؟
نبشتہ کن!
من عربے آں
تو پشت ءَ کش اتگاں مئے باگ پسّ ءُ پیرکی
ءُ ہما زمین ھم
ہمود ءَ کہ گوں وتی چکّاں من کِشت ءُ کشار کتگ
تو پہ من ءَ، ءُ پہ منی نماسگاں کلّیں
ہچی نئیشتگ
ابید چہ ہمے سنگاں۔۔۔۔
گڑا تئی سرکار
انچو کہ گش انت
اے سنگاں اوں پُلیت
چو کن
نبشتہ کن
اوّلی تاکدیم ءَ چہ درساں سربر:
من ءَ کسّی سر ءَ زہر نئیت
نہ چہ کسّے ءِ ابیل ءَ گوٛزاں
بلئے۔۔۔۔
من کہ وھدے شدیک بیاں
گڑا زوراک ءِ گوشت ءَ ھامگ ءَ جاہاں
وت ءَ پہریز۔۔۔۔۔۔
وت ءَ پہریز ۔۔۔۔۔۔
چہ منی گژن
ءُ کینگ ءَ چہ منی
No comments:
Post a Comment