من بائد اِنت بزاناں کہ،
شپ ءِ سفر ءَ
چراگ الّمی انت
ءُ الّمی انت
آگہی ءِ درمان ءِ ورگ۔۔۔۔
من بائد اِنت بزاناں کہ،
یک نازکیں مردمے ءَ
" سگّ " ءِ روچگ دارگی انت
"ارس " ءُ "دل " بے بیسہیں ہمسفر اَنت
کجام جاہے تئی چمّاں جہل کن انت۔۔۔۔
من بائد اِنت بزاناں کہ،
بازار ءِ رؤگ ءَ سر
کیسّگ پٹّگی انت،
ءُ زانگی انت کہ
بازار ءَ کجام چیز سستا تر اِنت۔۔۔
"تام"
دنیا ءِ گران تریں نام اِنت۔۔۔
من بائد اِنت بزاناں کہ،
کشک تہنا ہما دیما رؤ انت
کہ ہما دیما
ہمگرنچی یے بہ بیت
ہمگرنچی ءَ ابید
آ دیما کشک نہ بیت۔۔۔
من بائد اِنت بزاناں کہ،
لوگ ءِ دیوال ہم
توار ءَ جہہ کار اَنت
لوگ ءِ دیوالے،
ترکّ اِتگ
" منی حاموشی ءَ"
منی لوگ چہ تہا پروشتگ
من بائد اِنت بزاناں
اینچو وَ بزاناں
کہ من زندگاں
ءُ دم کشگ ءَ آں
No comments:
Post a Comment