.jpeg)
او پلّ ءُ گلاں باریں جنک
او کپوتانی سیلہ
او ماھیگانی ماھور
او پلّانی درچکاں
شمئے ارواہ تنّگیں واداں چکاریں بوتلے
ءُ شمئے بالاد انگوری شاہے
وائے قسمت کہ پہ شما سوگات کنگ ءَ من ءَ ہچ نیست، ابید ءِ
لنککانی ناخن ءُ متاچاں
ءُ ہما پیانو ءَ کہ مہراں آپ کتگ
ءُ ہما واب کہ چو ھار ءَ چہ منی دل ءَ کا اَنت
واب کہ دنزاں گپتگ اَنت
چو سیاہیں بور سواراں تردّان اَنت
بد بھتی ءِ شوندار ءُ چڑکّیں واب
من گوں تو مہر کت کناں زمانگے، بس گوں بوسگ ءُ،
ھور ءَ میسّینتگیں ھشاش ءِ پلّاں
منی آسگواریں چمّ سہریں اسپ ءُ زردیں کچکّ ءَ پُر اَنت
من گوں تو مہر کت کناں، تئی کوپگاں چو چولاں بوساں
بے گوٛمیں دریکّگانی نیام ءَ ، ماں ھیالانی زر ءَ گار بیاں
بے برمشیں شہر ءَ اوژناگ کنان ءَ
ہما کہ گچینی زراں اوژناگ کن اَنت
ابیتکیں وابجاہ ءِ سر ءَ چہ رُستگیں کاہاں
چہ پرشتگیں دلانی پد ءَ اوژناگ کنان ءَ
ءُ بے قبریں چکّانی اردلیں زردیں تاکانی سر ءَ
اِد ءَ مرگ ءِ موہ باز اِنت
اد ءَ قبر ءُ کسارت ءِ مراگہ بنت
منی بے وسیں جبزگ ءُ ویرانیں بوسگ
آپ اَنت کہ پِر گوٛز اَنت سر ءَ چہ منی
وھدے منی مود کہ مزن بنت
وھد گونگیں آپ
سیاہ ءُ بے چاڑیں آپ
بے وابیں آوازاں ھوار
چو ھور ءَ میسّ اِتگیں مرگاں
گوں بے آسریں چیہانٹاں ھوار
ساھگ! میسّ اِتگیں مُرگانی ساھگ
ہمائی ءَ کہ پہریز اِتنت منی ہڈّ
وھدے من پچّ پوش اِتنت
ءُ وھد ءِ زندان ءَ چہ آجوئیں آدینک ءَ روکّ روکّ ءَ وت ءَ را چار اِت
ءُ چہ دریگ ءِ شیشگ ءَ
من اِشکت تہ کسے منی رند ءَ کپتگ! کوکار کنان ءَ من ءَ گوانک جنان اِنت
وھد ءِ دریگ ءَ شنگ اِتگیں
گوں ملوریں توارے ءَ
تو زمین ءِ سر ءَ اوشتاتگ ئے
چہ دنتان ءُ روژنائی ءَ چکاریں
تو بوسان کت ءُ کُشت موران ءَ
تو سلامتی ءِ ارسان ءَ شل ئے
چہ پیمازاں، چہ بینگ مکسکاں
چہ ستکگیں آباں
تو چو زھم ءَ ئے
سبز ءُ شونز!
ءُ تو پہ دزجنگ چو کور ءَ تچان بئے
بیا منی اسپیت پوشیں ارواہ ءِ نزیک ءَ بیا
گوں تچوکیں پلّانی شاہڑ ءُ پُرانی کدّہ ءَ
یک سروپے ءُ اسپے بزور ءُ بیا
کہ اِد ءَ کوٹی تہار اِنت
گوں کوہنگیں چراگ ءَ
لہتیں چوٹ ءُ چپوٹیں کرسی پہ زمستان ءِ ودار ءَ
ءُ مرتگیں عشق
گوں یک نمبرے ءَ
پابلو نرودا
No comments:
Post a Comment