ویتنامی آزمانکک
گوں کتاباں چکرّوکیں مرد
نبشتہ: لنھ ڈنھ
بلوچی: عبداللہ شوھاز
تُری چاگردے نوک دیمروی کنگ ءَ بہ بیت یا دیما شتگیں چاگردے بہ بیت، بلئے ھما مردم ءَ کہ کتاب گون ءُ ترّیت آئی ءَ ابید دگہ ترس ءُ لرز ءَ مردم گوں شرپ ءِ نگاھاں چار اَنت۔ ھمے ھاتر ءَ میکونگ ھور ءِ ھلک فاٹ ڈاٹ ءَ نشتگیں نا وانندگیں پیئرے بوئی کہ ٹالکی سیکلانی مستری یے ات، ھرجاھے کہ شت کتابے الّم گون ات ئِے۔
ھمے کرد ءِ ھجبیں سان یک دمان ءَ ودی بوھان بوت انت:
پنڈوک ءُ کھبگاں چہ آئی ءَ ترس اِت، دزّاں آئی ءَ را پُلگ ءِ توکل کت نہ کت ءُ آ ھرجاھے بوتیں چکّ دروا ترکّ ءُ نکّ بوت ءُ نشت اَنت۔
بندات ءَ پیئرے بوئی ءَ مدام یک کتابے گون ات، بلئے پدا سما ئِے کت کہ اگاں کتاب باز بہ بنت گڑا آئی ءَ گیشتر شرپ رسیت۔ نوں کہ ھرجاھے شت ءُ اتک یکیّں وھد ءَ سئے سئے کتابے گون ات۔ مراگہانی وھد ءَ کہ دمک ءُ بازاراں مچّی ءُ میڑی بوتگ گڑا پیرے بوئی ءَ بڈّے کتاب زرتگ ءُ گشتگ۔
اے جیڑہ یے نہ ات کہ کتاب چونیں بنت۔۔۔ چوکہ ”سنگت چوں جوڑ کنگ بیت“ ءُ ”مردماں چوں وتی نیمگ ءَ کارئے“ ، ”مئے بالاد“ ، ”مئے ذات“، ”گوں واباں زندگ بوھگ“ ءُ ھمے وڑیں بے سر ءُ پادیں کتاب۔۔۔ کتاب بس کتاب بوتین انت۔ انچو سما بوت کہ پیرے بوئی ءَ ھما کتاب دوست بوت انت کہ مزن بہ بنت ءُ نبشتہ اش ھورت بہ بنت۔ بگندئے آئی ءَ ھمے جیڑ اِتگ کہ اے ڈولیں کتابانی ارزشت گیشتر اِنت؟ آئی ءِ کتابجاہ ءَ دنیا ءِ بازیں جوانیں ءُ بے دروریں کتاب ءُ دنیا ءِ بلائیں شھرانی سر ءَ پٹّ ءُ پولی کتاب ایر اِتنت۔
پیرے بوئی ٹالکی سیکلانی مستری یے ات ءُ گوں کسانیں پگارے ءَ پہ آئی ءَ اینچو کتاب ءِ گرگ ارزان نہ ات۔ ورگ ءِ ھمبرائی ءَ آئی ءَ وتی ایندگہ ھرچ ءُ درچ ھم کم کنگی اتنت۔ برے برے تاں چنچو روچ ءَ ھشکیں نان ءُ شکرے وارت۔ پیرے بوئی ءَ وتی بے مٹّیں کتاب ھجبر بہا نہ کت انت۔ چہ لاپ ءِ گورّ گورّ ءَ آئی ءَ ھمے شرپ دوست تر اَت کہ چہ میتگ ءِ مردماں رستگ ات ئِے۔
کتابانی سر ءَ سِتک ءِ مزّ آئی ءَ 1972 ءِ جنگ ءَ رست، وھدے ھلک ءِ سر ءَ بلائیں اُرشے بوت ءُ ھمے کاشی کڈّک کہ ھمیشی ءِ تھا پیرے بوئی وتی دھیں ھزار کتابانی نیام ءَ نشتگ ءُ چہ ترس ءَ لرزینگ ءَ ات کہ باریں منی آسر چے بیت، ابید چہ ھمے کڈّک ءَ ھلک ءِ درائیں لوگ اش مانداشتگ اتنت۔
No comments:
Post a Comment