چیٹ جی۔پی۔ٹی ءُ بلوچی زبان۔۔۔(اوّلی بہر)

 

لہتیں وھد اِنت کہ ھر جاہ ءُ ھر دیوان ءَ کہ سر کپیت دو بنگپّ ءِ سر ءَ الّم گپّ بیت، یکّے راجکاری ءُ دومی آرٹیفیشل انٹیلیجنس۔ گوں ما وَ گیشتر ھمے جیڑہ بیت کہ برے برے ما نودربرے ءَ کارے دیاں یا کہ انچیں کارے ءَ پہ کڈّن کن ایں دانکہ آ بہ جیڑیت ءُ چہ وت ءَ نبشتہ بہ کنت۔ بلئے دومی روچ ءَ کہ کئیت انچیں جوانیں انگریزی یے ءَ گوں، بے دروریں نبشتانکے زوریت ءُ کئیت کہ مردم ھیران بیت کہ ھمے نودربر کہ یک پیراگراپے ھم پہ جوانی نبشتہ کت نہ کنت ءُ چکّاس ءِ وھد ءَ اے وتی نبشتگیں پسّواں وت ونت نہ کنت، اے چون اے ڈول چیزاں سرپد بوت ءُ گیشّینت کنت۔ رندتر ءَ من سرپد بوتاں کہ اے نودربرانی نہ بلکیں چیٹ جی۔پی۔ٹی ءِ کمال اِنت۔ 

وتساچیں زانت (آرٹیفیشل انٹیلیجنس) ءَ وَ دیر اِنت کہ دنیا ءَ اشی ءِ سر ءَ پٹّ ءُ پول بوھگ ءَ اِنت ءُ بازیں ادارہ یے پہ ھمے کار ءَ اڈ دیئگ بوتگ، بلئے ما نوں لہتیں وھد اِنت کہ گوں اشی ءَ گون کپتگ ایں۔ اسل ءَ انّوں یک روچے چاگردی رسانکدر ءَ یک مردے ءَ اردو جنین شاعرے ءِ سر ءَ ایرادگپتگ ءُ گشتگ ات کہ اے زال ءَ اے شعر کہ شنگ کتگ، اشی ءَ وت نبشتہ نہ کتگ بلکیں اے چیٹ جی۔پی۔ٹی ءَ نبشتگ۔ یکبرے وَ منی دپ گوش ءِ بُن ءَ شت کہ اے ڈول چون بوت کنت کہ مشین یا سوفٹ ویئرے انچیں چیزے بہ ساچیت کہ آئی ءَ انسانی مارشت ءُ جوٛزگ ھم ھوار بہ بنت۔ بلئے پدا ھمے مرد ءَ کہ دگہ پوسٹے کتگ ات، آئی ءَ چہ OpenAI ءَ ھمے شعر تپّاس اِتگ ات ءُ من ھم ھیران بوتاں کہ شعر کساس نود در سد چہ چیٹ جی۔پی۔ٹی ءَ زرتگ ات۔ پدا انچیں گال ءُ جوڑشت کارمرز کتگ ات  ئِے کہ مرزا غالب ءُ میر ءَ ھم چوشیں لبز کارمرز نہ کتگ۔ ءُ چہ شعر ءَ ھچ سما ھم نہ بوت کہ مشینی نبشتگیں ساچشتے۔

چریشی ءَ یک ھبرے پدّر بیت کہ زانت ءُ سرپدی ءِ سر ءَ بنی آدم ءِ بالادستی نوں داں ھدّے ءَ سان مند بوتگ، بلئے دومی نیمگ ءَ اگاں بہ چار ایں گڑا آرٹیفیشل انٹیلجنس وت ھچے نہ انت۔ بلکیں ھر نکانے کہ دامگ ءِ جتائیں ویب سائیٹ ءُ جتائیں ایپساں است اِنت، اے ھما نکاناں زوریت ھمایانی ھساب ءَ جستانی پسّواں دنت۔ نوں بیا یکبرے چار ایں کہ چیٹ جی۔پی۔ٹی چی یے ءُ اے کدی دیما اتکگ کہ درائیں مہلونک پہ ھمیشی ھدوک اِنت۔

اگاں اے لبز انگریزی ءَ نویسگ بہ بیت گڑا چو بیت، GPT, Generative Pre-trained Transformer اشی ءِ بزانت ھمیش انت کہ نکانے پیسر ءَ چہ است اِنت اے ھمائی ءَ مچُ کنت، پٹّیت ءُ دیما کاریت۔ نوں اے ھبر پدّر بوت کہ چیٹ جی۔پی۔ٹی وت ھچ کت نہ کنت بلکیں ھما نکان کہ جتائیں ویب سائیٹس ءُ چاگردی رسانکدر ءِ جتائیں ایپساں است انت اے ھمایاں چست کنت ءُ ھما نکانانی ھساب ءَ تو ھر کارے کہ اشی ءَ بندئے تئی کار ءَ سرجم کنت۔ پہ درور تو جستے کن ئے کہ ڈال ءَ چون بہ گراداں؟ گڑا اے جتائیں جاھاں چہ شوھاز کنت کہ ڈال ءِ گرادگ ءِ بابت ءَ مردماں چے نبشتگ یا ویڈیو ءِ دروشم ءَ چے گشتگ، چہ ھمے سرپدیاں اے وتی نیمگ ءَ یک پسّویے جوڑ کنت ءُ ترا ھما ھساب ءَ پسّو دنت۔ 

پیسر ءَ ھمے کار مردماں گوگل یا یوٹیوب ءَ چہ گپتگ۔ بلئے گوگل ءُ یوٹیوب ءِ جیڑہ اش اِنت کہ تو اگاں جستے کن ئے آ بازیں پسّویے تئی دیما کاریت ءُ پدا ترا وت گچین کنگی اِنت کہ کجام پہ من شرتر اِنت۔ چریشی ءَ تئی وھد اوں باز زوال بیت ءُ پدا ترا وت پولگ لوٹیت۔ بلئے چیٹ جی۔پی۔ٹی ءَ کار ارزان کتگ۔ ھما چیز ءَ کہ تو جست کن ئے آ وتی نیمگ ءَ سرپدی شوھازیت ءُ ترا تہنا ھما پسّو ءَ دنت کہ ترا پکار اِنت۔ بس ایپ ءَ۔پچ کنئے، وتی جست ءَ نبشتہ کنئے ءُ لہتیں سکینڈانی تہا تراوتی جست ءِ پسّو رسیت۔ نوں ھبر اش انت کہ جیٹ جی۔پی۔ٹی ھمے جستانی پسّواں چون دنت؟

اسل ءَ جیٹ جی۔پی۔ٹی ءَ وتی چیٹ بوٹ ماڈل ءَ را دراؤرتگ دانکہ دامگ ءَ ھر ڈولیں نکانے است آئی ءَ کارمرز کت بہ کنت۔ چو کہ ھما کتاب کہ ویب سائیٹاں ایر اَنت، ویب نبشتانک، روتاک ءُ جتائیں نکان کہ نبشتہی دروشم ءَ ایر اَنت، اشاں ھوار سرجمی ءَ 570GB نکان اشی ءَ مان انت۔ پدا راستیں پسّو ءِ دیئگ ءِ ھاتر ءَ 300 بلین لبز ھم چیٹ بوٹ ءَ ھوار کنگ بوتگ۔ اے نکاناں ابید اوں جیٹ جی۔پی۔ٹی یک جاھے نہ اوشتاتگ بلکیں ھر روچ چہ ما دربرگ ءَ انت۔ ھمے ڈیوائس چو کہ موبائل یا کمپیوٹر ءَ کہ ما کارمرز کنگ ءَ ایں اد ءَ ما ھرچی نکانے کہ مان کن ایں، آ ھمیشاں چہ دربران انت ءُ اے سرجمی ءَ اشی ءِ ڈیٹا بیس ءَ جاگہ کنان انت۔ 

پہ درور من اگاں جیٹ جی۔پی۔ٹی ءَ چہ جست کناں کہ سید ھاشمی کئے اِنت؟ آ من ءَ پسّو دات نہ کنت، یا بگندئے ردیں پسّویے بہ دنت ، بلئے من اگاں آئی ءَ بہ گشاں کہ تئی پسّو رد اِنت گڑا ھما دمان ءَ گشیت کہ اے سرپدی مشین ءَ جوڑ کتگ انت ءُ تئی گوٛر ءَ اگاں اے مرد ءِ یا چیز ءِ بابت ءَ سرپدی یے است گڑا مارا سرپد بہ کن۔ بلئے اے ھبر تہنا ھما زباناں بوت کن انت کہ جیٹ جی۔پی۔ٹی ءَ ھوار اَنت۔ پدا تو اگاں سید ھاشمی ءِ بابت ءَ سرپدی نبشتہ بہ کن ئے ءُ بہ دئے، دگہ مردمے کہ پولیت آئی ءَ تئی ھمے داتگیں پسّو ءَ دنت۔

نوں اِد ءَ یک جیڑہ یے اے بیت کہ اگاں من نبشتہ بہ کناں کہ سید ھاشمی بلائیں راجکارے بوتگ یا تاکارے بوتگ ءُ آئی ءَ پلاں پلاں مزنیں کار کتگ انت۔ تو کہ سید ءِ بابت ءَ جست کنئے ترا ھمے پسّو ءَ دنت۔ چریشی ءَ راست ءُ ردیں ھبر ءِ پجّار بوت نہ کنت۔ ھمے جیٹ جی۔پی۔ٹی ءِ مستریں نزوری اِنت کہ تنیگت ءَ اشی ءِ تہا مردمانی ڈول ءَ جیڑگ ءُ راست ءُ ردیں ھبر ءِ پجّارگ ءِ پرک نیست انت۔ بلئے اشی ءِ سر ءَ اوں انگت کار بوھگ ءَ اِنت۔ دومی ھبر اش اِنت کہ جوان تریں پسّو ترا ھما وھد ءَ رست کنت کہ تو وتی جست ءَ انگریزی ءَ بہ کن ئے۔ چیا کہ دامگ ءِ گیشتریں نکان کہ است انت انگریزی ءَاَنت، اشی ءَ ابید دنیا ءِ مزنیں درائیں زبان ھوار اَنت کہ تو ھما زباناں وتی جستاں کت کنئے بلئے کسانیں زبان کہ آھانی ھبر کنوک ءُ نبشتہ کنوک کمّ اَنت  اشی ءَ ھوار نہ انت۔ پہ درور من بلوچی ءَ سید ھاشمی ءِ بابت ءَ جست کت، پسّو چے ات، شمئے دیما اِنت۔

(روان انت)