ڈاکٹر نجیبہ عارف ءِبلوچی اکیڈمی ءِ ترّ ءُ تاب ءُ اکیڈمیانی جیڑہانی سر ءَ تران

 

بلوچی بتلے کہ:

”ھور گواریت یا نہ گواریت کہ مئے نگن کپّے“

اے ملک ءَ کئے ھاکم بیت، کجام سیاسی ٹولی باج بارت ءُ کجام ببا دنت، کجام وڑیں ھکومتے بیت، پہ ما اشاں ھچ معنا نیست۔ چیا کہ بلوچ ایر دست اِنت ءُ پہ ایردست ءَ درستانی معنا یکّ۔ کئے وتی ، کئے درامد قول ءِ ارشاد پرواز ئیگ ءَ درس یکّ ھساب ءَ اَنت۔ ھمے کشّ ءُ چیلّ ءُ جھک ءَ جیکّانی سان نوں مئے لبزانکی ءُ راجی ادارھانی سر ءَ اوں کپتگ انت۔ 

برے یکے باھند کنت ءُ گشیت کہ چہ شھدربرجاھاں  بلوچی ءُ برابوئی ڈیپارٹمنٹاں ھلاس کن اِت کہ اشاں ھچ نپ نیست۔ دگرے پاد کئیت ءُ گشیت کلچر ڈیپارٹمنٹ ءِ پتّر ءَ پیچ اِت کہ اد  ءَ ابید ءِ ڈومب ءُ لوڈیاں دگہ کسّ نئیت ءُ اے مپتیں زرّ زوالی یے۔ دگہ کسے بود کنت ءُ گشیت کہ بلوچی ءِ اکیڈمیانی فنڈاں کم کن اِت کہ اے پرچا بلوچی ءِ سر ءَ کار کن انت ءُ بلوچی کتاب چاپ کن انت۔

کسے اسمبلی ءَ کوکار کنت ءُ وتی زبان دوستی ءُ راج دوستی ءِ جار ءَ جنت ، بلئے پدا ھمے مرد بلوچی کتابانی سر ءَ پابندی جنت کہ اے کتاب ”دھشت گرد“ پیدا کنگ ءَ انت۔ دکاناں بند کنت ءُ چاپکاراں گیپت ءُ بیگواہ کنت۔ دگہ جاھے بچار نوکتریں شوشایے گندگ بیت، سرکار لکّاں زرّ ھرچ کنت ءُ میڑہ کنائینیت ءُ پہ پھر جار جنت کہ اینچو لکّ ءِ کتاب بھا بوتگ، بلئے ھمے شھر ءَ اگاں لس مردمے کتابانی سٹالے جنت آ گوں کتاباں گرگ ءُ بندیگ کنگ بیت۔ چوشیں دو تل ءُ دو پوستی کہ اد ءَ گندگ بیت اینچو ھنر ءُ ھیلہ وَ مداری اوں نہ زان انت۔ قول ءِ بلوچاں اشاں  مشک ءِ ءُ مور ءِ ھنر یات انت۔

بلئے بیا کہ گپّ چداں نہ انت۔ ما وَ ایردستیں گوں ما وَ ھرچی بوت کنت، بلئے ملک ءِ بنجل ءُ بنجاھی ادارھانی ھال اوں ھمیش انت۔

انوں کہ اکادمی ادبیات پاکستان ءِ کماش ڈاکٹر نجیبہ عارف پہ بلوچی اکیڈمی ءِ ترّ ءُ تاب ءَ اتکگ ات، اے دیوان ءَ بلوچی ءَ ھوار براھوئی اکیڈمی، پشتو اکیڈمی ءُ براھوئی ادبی سوسائٹی ءِ باسک اوں نندوک اتنت۔ درستاں وتی بزّگی ءِ کسّہ بیان کت انت کہ مئے گوٛر ءَ کار اینچو باز انت ءُ مئے مالی جیڑہ ایش ءُ ایش انت۔ بلوچستان ءَ سرکار نہ پہ شھم زرّ دنت ءُ نہ پہ زبانانی دیمروی ءَ دگہ پروجیکٹے ءَ پہ فنڈ ءُ بگر بدارے دنت۔ بلکیں ھمے بازیں پابندیانی سوٛب ءَ اکیڈمی اوں وتی کار ءَ پہ جوانی کت نہ کن انت۔

اے درستاں پد وھدے اکادمی ادبیات ءِ کماش ءَ کہ وتی گپّ جت انت درس ھیران بوت انت۔  اے اکیڈمی وتی جند ءِ جیڑھاں گیشوارکت نہ کنت اے باریں پہ دگر ءَ زھمے جنت۔ کماش ءِ گشگ ءِرِد ءَ نہ آھاں پہ نوکیں پروجیکٹاں فنڈ دیئگ بیت ءُ نہ کہ نوں آھانی گوٛر ءَ اینچو مردم است کہ وتی دپتراں اوں پہ شھم داشت بہ کن انت۔ کتابانی ھال ایش اِنت کہ ھر کتابے ءِ دو سد تاک چاپ  کن انت ءُ ھما ھم بھا نہ بنت۔

وھدے سرکار ءَ گش انت کہ مارا پرے کاراں بجٹ پکار اِنت گڑا سرکار ءِ گشگ ھمیش اِنت کہ چرے کاراں مارا چے رسیت؟ مپت ءَ نبشتہ کار نند اَنت پیتّاری کن انت، چار کتاب چاپ بیت ءُ آسر ھچ پہ ھچ۔ 

اسل ءَ اے سرجمیں ملک ءَ زرّ تھنا ھما جاگہ ھرچ کنگ بیت کہ ھود ءَ ور ءُ چرے بہ بیت ءُ زبان ءُ لبزانک پہ دل مردماں دگہ مالی نپ ءُ سیتّے دات نہ کنت۔

نوں ملک ءِ بنجاھی اکیڈمی ءُ ادارھانی ھال کہ ایش انت گڑا بلوچ ءَ گلہ کنگی نہ انت۔ بلوچ ءَ چوناھا ھم مدام وتی بار وتی کوپگاں بوتگ ءُ وتی وس ءُ واک ءَ جنزان بوتگ۔ انگت ھم جنزان اِنت۔۔۔۔ بس نوں اے ھبر پدّر اِنت کہ چرے ملک ءَ مارا گیشیں اُمیت دارگی نہ انت ءُ پہ زبان ءُ لبزانک ءَ ھر ادارہ یے ھرچی کہ کت کنت، وتی وس ءُ واک ءَ بہ کنت۔

#Literature

#BalochiLanguage

#BalochiAcademyQuetta

#Balochistan

#AcademyOLettersPakistan

#DrNajeebaArif

#Quetta