۔۔۔۔۔۔۔۔۔۔۔۔۔۔۔
اے کتاب ءِ نام ءِ گندگ ءَ گوں مردم ھمے سما کنت کہ بگندئے آزمانکی کتابے، یا آزمانک ءِ بنگپّ ءِ سر ءَ نویسگ بوتگ، یا چو بوت کنت کہ نبشتہ کار ءَ بوسٹن شھر ءِ آزمانکانی یا آزمانکے ءِ بابت ءَ نبشتگ۔ بلئے چو نہ انت۔ اے منیر احمد بادینی ءِ امریکہ ءِ سپرنامہ یے کہ ھود ءَ بوسٹن شھر ءَ آئی ءَ وتی لھتیں روچانی سپر ءُ ھود ءَ نندگ ءِ کسّہ آؤرتگ۔
چوناھا کتاب سپرنامہ یے بیت، گدارے، شائری یے یا آزمانکی کتابے بیت بائد اِنت کُنجے ءَ کتاب ءِ تھر نویسگ بہ بیت دانکہ وانوک بہ زانت کہ اے کجام تھر ءِ کتابے۔ اگاں سرتاک ءِ سر ءَ نویسگ نہ بیت، کما کم کتاب ءِ توک ءَ ھمے چیز پدّر بہ بیت ءُ تھر نویسگ بہ بیت۔بلئے اے کتاب ءِ نہ سرتاک ءَ نبشتگ ءُ نہ کہ تھا، بلکیں وانگ ءَ بندات کن ئے نوں سما بیت کہ سپرنامہ یے۔
اے سپرنامہ کسان انت ءُ سرجمی ءَ 65 تاکدیم انت کہ 2011 ءَ چہ نیوکالج پبلی کیشنز کوئٹہ ءِ نیمگ ءَ چاپ بوتگ۔ اے کتاب ءَ اوں منیر ءِ زبان ءِ گلگ کنگ نہ بیت۔ چو ایندگہ کتاباں، نہ اشی ءِ ھورت وانی بوتگ ءُ نہ کہ گالسنج ءَ پد چارگ بوتگ۔ بلوچی ءَ وَ بلّ انگریزی ءِ بازیں لبزے کہ کتاب ءَ مان انت، آ اوں باز جاگہ ءَ رد نویسگ بوتگ انت۔ چو کہ منیر ءِ زبان ءِ نزوری ءُ نادلگوشی ءِ سر ءَ پیسر ءَ باز ھبر بوتگ، پمشکا منی ھیال ءَ ما اے پھنات ءَ ڈالچار بہ کن ایں یکبرے۔ آ وت ھم گشیت کہ منی زبان ھرچی انت نوں ھمیش انت۔
اے سپرنامہ آئی ءَ جتائیں درانی تھا بھر کتگ۔ اوّلی در ءِ نام ”سئے جنین آدم“ انت کہ اد ءَ آ امریکہ ءِ سئے جنینانی کسّہ ءَ کاریت کہ چون آئی ءَ را کمک کتگ اش۔ دومی در ”ہارورڈ سکوائر“ انت کہ اے چارّاھے ءُ ھود ءَ مردم کا انت سوت جن انت ءُ بازیں مردمے وتی ھنر ءُ ازم ءَ پیش داریت۔ اے در ءَ نبشتہ کار ءَ امریکہ ءَ ”ھم جنس پرستی“ ءِ سر ءَ نبشتگ کہ ھود ءَ اے چیز میارے نہ انت۔ اشی ءَ ابید یک درے جان ایف کینیڈی ءِ سر ءَ انت۔ امریکہ ءِ کافی ءُ ھود ءِ ھوٹلانی بابت ءَ تران کنت۔ بلئے ھچ جاگہ نبشتہ کار جھلانکی ءَ ایر نہ کپیت۔ ھرچی کہ گندیت بس کسانیں پیراگرافے ءِ دروشم ءَ بیان کنان ءَ دیما رؤت۔
ہارورڈ یونیورسٹی ءِ ھم کسّھاں کاریت کہ ھمد ءَ آ پہ کورسے ءِ وانگ ءَ شتگ۔ اے یونیورسٹی چنچو کوھن انت ءُ ھود ءِ چاگرد چون انت، ھمے چیزاں بیان کنت۔ البت ھچ چیز ءَ گوں ھورتی ءَ نہ چاریت ءُ سرجمیں دروشمے ءَ بیان نہ کنت۔ پمشکا سپرنامہ ءِ رھبندانی رِد ءَ اے سرجمیں سپرنامہ یے گشگ نہ بیت۔ نبشتہ کار نہ وتی جند ءِ مارشتاں پہ جوانی بیان کنت ءُ نہ ایندگہ مردمانی سر ءُ پُراں۔ نہ ھرجاھے کہ گوٛزیت، آ جاگہ ءِ بابت ءَ راجدپتری وئیلانی کسّھاں کاریت ءُ نہ سرجمی ءَ مردمانی تب ءُ مئیل ءَ تپّاسیت۔ البت ھمے سئے ئیں جنینانی کسّہ ءُ یونینورسٹی ءِ ھما پروفیسر ءِ کسّہ ءَ پہ جوانی کاریت کہ آئی ءَ را گشتگ ئِے منی دیما پاد میا۔۔۔
اے کسانیں سپرنامہ ءَ امریکہ ءِ لس مردم ءُ ھود ءِ ادارھانی ءُ مئے دمگ ءِ وانندگ ءُ ادارھانی نیام ءَ پرک جوانیں وڑے ءَ گندگ ءُ سما کنگ بیت۔ ھمے اے سپری اھوال ءِ مستریں جوانی انت۔
دگہ یک ھبرے ءَ منی سر پِر نہ بوت کہ کتاب ءِ 22 تاکدیم یک مردے ءِ کتاب ءِ سر ءَ انت کہ آ وت ہارورڈ ءِ پروفیسرے۔ اے مرد ھوورڈ گارڈنر اِنت کہ آئی ءَ بدلی ءِ سر ءَ کتابے نبشتگ۔نبشتہ کار ھمے کتاب ءَ زوریت، وانیت ءُ پدا کتاب ءِ سر ءَ ھمنچو نبشتہ کنت دانکہ سپرنامہ ءِ سَیکّے سرجمی ءَ گوں ھمے کتاب ءَ رؤت۔ چوناھا سپرنامہ ءِ رھبند ءِ رِد ءَ نہ چیز گوں اینچو ھورتی ءَ بیان کنگی انت کہ وانوک بیزاری بہ بیت ءُ نہ کہ انچو راہ ءُ رواجی سرگوٛز کنگی انت۔ اگاں کتاب ءِ سر ءَ ھبر کنگی ات، بائد اِنت نبشتہ کار ءَ کسانیں پجّارے نبشتہ کتیں ءُ دیمتر ءَ جنزان بوتیں، بلئے آ گوں کتاب ءَ انچو مانگیشّ ایت کہ دیمتر ءَ نہ رؤت ءُ چمداں کسّہ ءَ آسر کنت۔
یک جوانی یے وَ اش انت کہ بازیں بے سریں ھبر اے کتاب ءَ مان نیست۔ چو کہ بازیں سپرنامھاں ما وان ایں، ھمے سما کن ایں کہ داں لوگ ءِ در آھگ ءَ بہ گر داں بالی پٹّ ءَ سر بوھگ ءَ سپرنامہ ءِ نیم ھمد ءَ ھلاس بیت۔ منیر ءَ اے وڑیں بے سر ءُ پادیں ھبر نبشتہ نہ کتگ انت۔ گپّے گوٛنڈ گپتگ، ابید چہ ھمے کتاب ءِ کسّہ ءَ۔ اگاں کتاب ءِ کسّہ کمو کستر بوتیں ءُ ایندگہ پھناتانی سر ءَ گیشتر نویسگ بوتیں، اے بوسٹن شھر ءِ جوانیں سپرنامہ یے بوتگ ات۔
۔۔۔۔۔۔۔۔۔
شوھاز
No comments:
Post a Comment